ቃዛ፡ ንሰዓተት ውግእ ደው ኣናበልካ ዝካየድ ወፍሪ ክታበት ጸረ-ፖሊዮ ተጀሚሩ

ኣብ ቃዛ ኣብ ዝካየድ ዘሎ ወፍሪ ጸረ-ፖልዮ ብኣሽሓት ዝቑጸሩ ህጻናትን ክታበት ይወስዱ ከምዘለዉ ተገሊጹ።

እቲ ወፍሪ ሓደ ፍልስጤማዊ ህጻን ብሕማም ፖልዮ ከምዝተለኸፈ ምርግጋጹ ስዒቡ’ዩ ዝካየድ ዘሎ።

እዚ መልከፍቲ ኣብ ቃዛ ድሕሪ 25 ዓመታት ንፈለማ እዋን ዘጋጠመ እዩ።

ብመሰረት ውጥን ውድብ ጥዕና ዓለም፡ 640 ሽሕ ህጻናት ጸረ-ፖልዮ ክኽተቡ እዮም።

እቲ ወፍሪ ክታበት "ኣዝዩ እወታዊ" ጅማሮ ከምዘለዎ ሓደ ላዕለዋይ በዓል ስልጣን ናይቲ ብሓማስ ዝመሓደር ሚኒስትሪ ጥዕና ቃዛ ገሊጹ።

ዳይረክተር መባእታዊ ክንክን ጥዕና ዶክተር ሙሳ ዓበድ፡ “ብዙሓት ሰባት ኣብ ሓያሎ ነቑጣታት ንክታበት ሪጋ ይሕዙ ኣለዉ” ኢሉ።

"ውላዱ ክታበት ክሳብ ዝረክብ ዝወጽእ ሰብ የለን - እዚ ኣዝዩ እወታዊ ነገር'ዩ" ክብል ኣረዲኡ።

ዶክተር ዓበድ፡ እቲ ወፍሪ ክታበት "ሎሚ ብዝተኻእለ መጠን ናብ ብዙሓት ክበጽሕ" ዘለዎ ተስፋ እውን ገሊጹ።

ንሱ ወሲኹ፡ እስራኤል ነቲ ኣብ ማእከላይ ቃዛ ክታበት ክወሃብ ንምፍቃድ ዝተሓተተ "ሰብኣዊ ምቁራጽ ተጻብኦ" ከተኽብር ከምዝጸንሐት'ውን ሓቢሩ።

"ከምዚ ክቕጽል ተስፋ ድማ ንገብር።" ኢሉ።

እቲ ክታበት ፖልዮ ብሰለስተ ዝተፈላለየ ደረጃታት፡ ኣብ መላእ ማእከላይ፡ ደቡባውን ሰሜናውን ክፋላት ናይቲ ወሽመጥ ክካየድ ምዃኑ ተፈሊጡ'ሎ።

ኣብ ነፍሲ ወከፍ እቲ ደረጃ ድማ ንሰለስተ ተኸታተልቲ መዓልታት ካብ ሰዓት 06፡00 ክሳብ 15፡00 ብኣቆጻጽራ እቲ ከባቢ ደው ውግእ ክብል እዩ።

እዚ ከምዚ ኢሉ እንከሎ ክልተ ደቂ ተባዕትዮን ሓንቲ ጓል ኣንስተይትን ዝርከብዎም ሰለስተ ኣባላት ፖሊስ እስራኤል ኣብቲ ዝተጎበጠ ምዕራባዊ ገማግም ኣብ ጥቓ ከተማ ኬብሮን ኣብ መኪንኦም ብዝተፈጸመ መጥቃዕቲ ተዅሲ ከምዝተቐትሉ ሰብመዚ እስራኤል ገሊጾም።

ኮሚሽነር ፖሊስ እስራኤል ዳንኤል ሌቪ ኣብቲ ተኹሲ ዝተፈጸመሉ ቦታ ኣብ ዝሃቦ መግለጺ፡ እቶም ሰለስተ መኮንናት ኣብ ኣውራጃ ይሁዳን ሰማርያን ክሰርሑ ከምዝጸንሑ ሓቢሩ።