వేలంలో కొన్న సూట్‌కేసులు, ఇంటికి తెచ్చి చూస్తే అందులో మానవ అవశేషాలు

వేలంలో కొనుక్కున్న ఓ స్టోర్ రూముల్లో ఉన్న సూట్ కేసుల్లో మానవ అవశేషాలు ఉన్నట్లు తేలడంతో పోలీసులు రంగంలోకి దిగారు. ఈ ఘటన న్యూజీలాండ్ లో జరిగింది.

దక్షిణ అక్లాండ్ కు చెందిన ఓ కుటుంబం గత గురువారం ఓ స్టోర్ రూమ్‌ను వేలంలో కొనుక్కుంది.

తాము కొనుగోలు చేసిన స్టోర్ రూమ్ ను ఓపెన్ చేసిన ఆ కుటుంబానికి అందులో అనేక వస్తువులతోపాటు సూట్ కేసులు కనిపించాయి.

వాటిని ఇంటికి తీసుకు వచ్చి తెరిచి చూడగా వాటిలో మానవ అవశేషాలు కనిపించాయి.

ఈ వ్యవహారంపై పోలీసులు హత్య కేసు నమోదు చేసి దర్యాప్తు ప్రారంభించారు. ఈ అవశేషాలు ఎవరివి అన్న కోణంలో విచారణ జరుపుతున్నారు.

అయితే, ఈ కుటుంబానికి, ఈ హత్యలకు సంబంధం ఉండకపోవచ్చని అక్కడి పోలీసు అధికారులు భావిస్తున్నారు.

సూట్‌కేసుల్లో ఒకటి కంటే ఎక్కువమంది మనుషుల అవశేషాలు ఉన్నట్లు తెలుస్తోంది.

ఒక స్టోరేజ్ యూనిట్ నుంచి ఈ కుటుంబం, ఒక ట్రాలీకి సరిపడా సామాన్లను వేలం ద్వారా కొనుక్కున్నారు. ఇలా కొన్న సరుకులు వీరు ట్రాలీలో ఇంటికి తెచ్చారు.

ఇంటికి తెచ్చినప్పుడే, వాటి నుంచి ఒకరకమైన వాసన వస్తోందంటూ స్థానికులు వారికి ఫిర్యాదు చేశారని స్థానిక మీడియా సంస్థ 'స్టఫ్' పేర్కొంది.

ఈ వాసన వచ్చిన వెంటనే నాకు అనుమానం వచ్చిందని స్థానిక స్మశాన వాటికలో పని చేసే ఓ వ్యక్తి వెల్లడించారు.

''ఈ వాసనను వెంటనే గుర్తు పట్టాను. అది ఎక్కడి నుంచి వస్తుందో నాకు అర్దమైంది'' అంటూ ఆయన ఆ ఇంటిని చూపిస్తూ వెల్లడించారు.

ఒక సూట్ కేసు ఇంట్లోకి తీసుకెళుతుండగా తన కొడుకు చూశాడని, తర్వాత దానిని ఫొరెన్సిక్ టెంట్ కిందకు చేర్చారని ఆ ఇంటికి పొరుగున ఉన్న మరో మహిళ వెల్లడించారు.

‘‘వాళ్లు తెలియక ఈ సామాను కొనుక్కున్నారు. ఇందులో వాళ్ల తప్పేమీ ఉండకపోవచ్చు. కానీ, ఇది చాలా భయానకమైన విషయం’’ అని ఆ కుటుంబం పొరుగున ఉండే మరో వ్యక్తి వ్యాఖ్యానించినట్లు ది గార్డియన్ పత్రిక పేర్కొంది.

‘‘ఈ తప్పు చేసిన వారెవరో ముందుకొచ్చి ఒప్పుకుంటే మంచిది’’అని ఆయన కోరారు.

ప్రస్తుతం ఈ సరుకులు తీసుకొచ్చిన వాహనాన్ని క్లెండన్‌ పార్క్‌లో ఆ కుటుంబ సభ్యులు నివసించే ఇంటికి దగ్గర్లో పార్క్ చేసి ఉంచారు.

దీనిపై పోలీసులు విచారణ జరుపుతున్నారని 'స్టఫ్' మీడియా సంస్థ ఒక వీడియో ఫుటేజ్‌ను ప్రసారం చేసింది.

ఈ వీడియోలో ఆ ఇంటి చుట్టూ పోలీసులు, పీపీఈ కిట్లు ధరించి ఉన్న పోస్టుమార్టం సిబ్బంది ఉన్న దృశ్యాలు కనిపించాయి.

స్పెషల్ సెర్చ్ గ్రూప్ ఈ ఇంటి చుట్టూ టెంట్ వేసి, ఈ సామాన్లను తన ఆధీనంలోకి తీసుకుని దర్యాప్తు చేస్తోంది.

పోలీసుల సూచన మేరకు తాము మీడియాతో మాట్లాడలేమని ఆ కుటుంబ సభ్యులు వెల్లడించినట్లు స్థానిక మీడియా పేర్కొంది.

చనిపోయిన వారు ఎవరు అన్నది తెలుసుకోవడానికే మా ప్రాధాన్యత అని పోలీసులు వెల్లడించారు. ఆ తర్వాత దీనికి కారకులెవరు అన్న విషయాలు తెలుస్తాయని వారు వెల్లడించారు.

సూట్ కేసుల్లో దొరికిన మానవ అవశేషాలకు పోస్ట్ మార్టం జరుగుతోందని, ఈ కేసు తీవ్రత దృష్ట్యా అనేక కోణాలలో దర్యాప్తు జరపాల్సి ఉంటుందని పోలీసులు తెలిపారు.

‘‘ఇప్పటికైతే ప్రజలకు వచ్చిన ప్రమాదం ఏమీ లేదు’’ అని స్థానిక డిటెక్టివ్ ఫామినియా వాలువా వెల్లడించారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)