బోట్స్‌వానా: వందల సంఖ్యలో ఏనుగులు అక్కడ ఎలా చనిపోతున్నాయి? ఏమిటీ మిస్టరీ?

ఫొటో క్యాప్షన్, బోట్స్‌వానాలో అసాధారణ రీతిలో మరణిస్తున్న వందలాది ఏనుగులు

3 జులై 2020

బోట్స్‌వానాలో గత రెండునెలలుగా అసాధారణ రీతిలో వందలాది ఏనుగులు చనిపోవడం మిస్టరీగా మారింది.

ఈ సంవత్సరం మే నెల నుంచి బోట్స్‌వానాలో అసాధారణ రీతిలో మరణిస్తున్న వందలాది ఏనుగుల మిస్టరీ గురించి బోట్స్వానా పరిశోధనలు జరపనున్నది

మరణించిన ఏనుగుల నుంచి సేకరించిన శాంపిళ్ళను కెనడా, దక్షిణ ఆఫ్రికా, జింబాబ్వే లోని ల్యాబ్ లకు పంపిస్తారు.

బోట్స్‌వానాలోని ఒకవాంగో డెల్టా ప్రాంతంలో గత రెండు నెలల్లో 350 కి పైగా ఏనుగు మృత దేహాలు కనిపించినట్లు డాక్టర్ నియాల్ మక్కాన్ చెప్పారు.

“ఎందుకు చనిపోతున్నాయో ఎవరికీ అర్థం కావట్లేదు”. ల్యాబ్‌కు పంపిన శాంపిల్స్ ఫలితాలు రావడానికి కొన్ని వారాలు పట్టవచ్చని ప్రభుత్వం పేర్కొంది.

హెచ్చరిక: ఈ కింది చిత్రాలు ఆందోళన కలిగించవచ్చు.

ఈ మరణాలను మొదట స్థానిక పర్యావరణ పరిరక్షకులు గుర్తించి ప్రభుత్వాన్ని అప్రమత్తం చేశారని యూకే స్వచ్ఛంద సంస్థ నేషనల్ పార్క్ రెస్క్యూలో పనిచేస్తున్న డా. నియల్ మక్కాన్ బీబీసీ కి తెలిపారు.

"మూడు గంటల పాటు డెల్టా ప్రాంతంలో సాగిన విమాన ప్రయాణంలో 169 ఏనుగుల మృతదేహాలను గుర్తించారు. అంత తక్కువ సమయంలో అన్ని మృతదేహాలను గుర్తించడం అసాధారణమైన విషయం. తరువాతి నెలల్లో మరిన్ని మృతదేహాలు బయటపడ్దాయి. మొత్తం 350కి పైగా మృతదేహాలు బయటపడ్డాయి" అని మక్కాన్ చెప్పారు.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

“కరువు కాటకాలు లేకపోయినా అనూహ్యంగా ఇన్ని ఏనుగులు చనిపోవడం వింతగా ఉంది” అని ఆయన అన్నారు.

చనిపోయిన ఏనుగుల దంతాలు సవ్యంగానే ఉనాయని, ఇది ఏనుగుల వేట కాదని బోట్స్‌వానా ప్రభుత్వం నిర్థరించింది.

వేట కాకపోతే మరేమై ఉంటుంది?

“ఏనుగులు మాత్రమే చనిపోయాయి. వేటగాళ్ల పనే అయితే సైనేడ్ ప్రభావం వలన ఇతర జంతువులు కూడా చనిపోయుండాలి. కానీ అలా జరగలేదు.” అని మక్కాన్ అన్నారు.

గత ఏడాది సహజ ఆంత్రాక్స్ విషవాయువులు వెలువడి బోట్స్‌వానాలో దాదాపు వంద ఏనుగులు చనిపోయాయి. ఈసారి కూడా అదే కారణమై ఉంటుందనే అనుమానాన్ని డా. మక్కాన్ తాత్కాలికంగా తోసిపుచ్చారు.

అయితే విషయవాయువుల ప్రభావం లేదా ఏదైనా వ్యాధి సోకి చనిపోయుండొచ్చనే కారణాలను పూర్తిగా కొట్టివేయలేమని అన్నారు.

ముఖ్యంగా వాటి ముఖాలు వడలిపోయి ఉండడం, చనిపోయేముందు అవి గుండ్రంగా తిరుగుతూ ఉన్నాయనే గుర్తులు పై కారణాలను సూచిస్తున్నాయని, వాటి నాడీ వ్యవస్థ దెబ్బతినడం వలన అలా గుండ్రంగా తిరిగి ఉండొచ్చని డా. మక్కాన్ అభిప్రాయపడ్డారు.

ఏది ఏమైనా, సరైనా కారణాలు తెలిసేవరకూ, ఈ వ్యాధి మానవులకు సంక్రమించే అవకాశాన్ని కొట్టివేయలేమని ఆయన అన్నారు. ముఖ్యంగా వ్యాధికి మూలం నీటి వనరులు లేదా మట్టి అయితే మనుషులకు సంక్రమించే అవకాశాలు మెండుగా ఉన్నాయని అన్నారు. కోవిడ్-19 జంతువులనుంచీ మనుషులకు సంక్రమించిన విషయాన్ని డా. మక్కాన్ గుర్తు చేసారు.

బోట్స్‌వానా వన్యప్రాణి, జాతీయ ఉద్యానవనాల విభాగం డైరెక్టర్ డా. సైరిల్ టోలో, ది గార్డియన్ పత్రికతో మాట్లాడుతూ ఇప్పటివరకూ 280 ఏనుగులు చనిపోయినట్టు తేలింది. మిగతావి ఇంకా నిర్థరణ కావల్సి ఉందని అన్నారు.

ఇలా అనూహ్యంగా ఏనుగులు చనిపోవడానికి కారణాలు ఇంకా తెలీదు. పరీక్షలకు శాంపిల్స్ పంపించాం. ఫలితాలు రావడానికి ఇంక కొన్ని వారాలు పట్టొచ్చు అని ఆయన అన్నారు.