కింబర్లీ కప్పల్లో ప్రాణం తీసే విషం... ఆ విషాన్ని మాత్రం వదిలేసి వాటిని నేర్పుగా తినే ఎలుకలు

అనేక జీవజాతులను నాశనం చేస్తున్న విషపూరితమైన, ప్రమాదకరమైన గోదురుకప్పలను చంపి వాటి గుండెను మాత్రమే తినడంలో ఎలుకలు విజయవంతం అయ్యాయి.

ప్రమాదకరమైన ఆ కప్పల వృద్ధిని కట్టడి చేసేందుకు ఆస్ట్రేలియా శాస్త్రవేత్తలు కొన్నేళ్లుగా తీవ్ర ప్రయత్నాలు చేస్తున్నారు.

'రకాలి' అని పిలిచే ఈ ఎలుకలు అందులో విజయవంతం అయ్యాయి.

ఈ గోదురుకప్పల్లో గుండె, కాలేయం తప్పించి మిగతా శరీరం అంతా విషపూరితమై ఉంటుంది. దాంతో, వాటిని చంపి తినడం వల్ల అనేక జీవులు ప్రాణాలు కోల్పోతున్నాయి.

ఈ ఎలుకలు మాత్రం వాటిని అత్యంత చాకచక్యంగా చంపేసి, వాటి శరీరాలను జాగ్రత్తగా చీల్చేసి... లోపల ఉండే గుండెను, కాలేయాన్ని మాత్రమే ఎలా తినాలో నేర్చుకున్నాయి.

ఈ ఎలుకలు ఎలా జాగ్రత్తపడుతున్నాయన్న వివరాలను ఇటీవల యూనివర్సిటీ ఆఫ్ మెల్బోర్న్‌లో పరిశోధకులు వెల్లడించారు.

ఇప్పటి వరకు ఆ కప్పలను జాగ్రత్తగా చంపగలిగేది ఈ ఎలుకలు మాత్రమేనని శాస్త్రవేత్తలు చెబుతున్నారు.

వాటిని తింటే ఉడుములు కూడా చనిపోతాయి

చెరకు మొదళ్లను తినేస్తున్న కీటకాలను చంపేందుకు మొట్టమొదట 1935లో 101 గోదురు కప్పలను ఎక్కడి నుంచో తీసుకొచ్చి ఈశాన్య ఆస్ట్రేలియా ప్రాంతంలో వదిలారు.

ఈ కప్పలు ఎలాంటి వాతావరణ పరిస్థితులకైనా సులువుగా అలవాటు పడతాయి. భారీ సంఖ్యలో పిల్లలను పెడతాయి. ఒక ఏడాదిలో 60 కిలోమీటర్ల దూరం వరకూ వలస వెళ్తాయి.

అలా ఈ కప్పలు 2011, 2012 నాటికి ఈశాన్య ఆస్ట్రేలియా నుంచి పశ్చిమ ఆస్ట్రేలియాలోని కింబర్లీ ప్రాంతానికి చేరుకున్నాయి. అంటే, 74 ఏళ్లలో 2000 కిలోమీటర్లకు పైగా దూరం విస్తరించాయి.

ప్రస్తుతం దేశవ్యాప్తంగా ఈ కప్పల సంఖ్య 150 కోట్లకు పైనే ఉంటుందని జీవశాస్త్ర నిపుణులు అంచనా వేస్తున్నారు.

ఈ ఏడెనిమిది ఏళ్లలో ఈ కప్పలను తినడం వల్ల కింబర్లీ ప్రాంతంలో అనేక జంతువులు చనిపోయాయి. ఉడుములతో పాటు ఇతర బల్లిజాతి జీవులు, మొసళ్లు, ముంగీసల లాంటివి అంతరించిపోయే పరిస్థితి ఏర్పడింది.

ఈ కప్పల లాలాజల గ్రంథుల్లో విషం ఉంటుంది. దానిన్ని కొద్దిగా మింగినా అడవి జంతువులైనా, పెంపుడు జంతువులైనా తీవ్ర అనారోగ్యానికి గురై చనిపోయే ప్రమాదం ఉంటుంది.

ఈ కప్పలను తినడం ప్రమాదకరమన్న విషయాన్ని గుర్తించేలా శాస్త్రవేత్తలు కొన్ని జంతువులకు పలు విధాలుగా శిక్షణ ఇచ్చారు. అయినా, పెద్దగా ఫలితం కనిపించలేదు.

రకాలి అనే నీటి ఎలుకలు మాత్రం ఎలాంటి శిక్షణ లేకుండానే స్వయంగా ఆ కప్పలను ఎలా చంపి తినాలో నేర్చుకున్నాయి.

పరిశోధన ఎలా జరిగింది?

గోదురు కప్పల వృద్ధిని అడ్డుకునేందుకు శాస్త్రవేత్తలు చాలా ఏళ్లుగా పరిశోధనలు చేస్తున్నారు. 2014లో ఒకరోజు కొన్ని కంప్పల మీద ఏదో జంతువు దాడి చేసినట్లు గుర్తించారు. ఆ తర్వాత రోజూ నాలుగైదు కప్పలు పొట్టపై చిన్నచిన్న గాయాలతో చనిపోయి కనిపిస్తుండేవి.

ఆ గాయాలు ఎలా అవుతున్నాయి? వాటిని చంపుతున్న జంతువు ఏది? అన్నది తెలుసుకునేందుకు శాస్త్రవేత్తలు కొన్ని రిమోట్ కెమెరాలను ఏర్పాటు చేశారు. కప్పల మీద ఉన్న గాయాలను విశ్లేషించారు. ఆఖరికి, ఆ కప్పల 'హంతకులు' ఎలుకలే అని వెల్లడైంది.

"పెద్ద కప్పల శరీరాలను ఈ ఎలుకలు చాలా జాగ్రత్తగా చీల్చుతాయి. గుండెను, కాలేయాన్ని వేరు చేస్తాయి. విషం ఎక్కువగా ఉండే గాల్‌బ్లాడర్‌‌ను కప్ప శరీరం నుంచి అత్యంత చాకచక్యంగా తొలగిస్తాయి" అని శాస్త్రవేత్తలు తెలిపారు.

చిన్న కప్పల కంటే పెద్ద వాటినే ఈ ఎలుకలు ఎక్కువగా తింటాయని శాస్త్రవేత్తలు చెబుతున్నారు.

ఈ ఎలుకల సంఖ్య మరింత వృద్ధి చెందితే, అనేక జీవజాతులను నాశనం చేస్తున్న ప్రమాదకర గోదురు కప్పల వృద్ధిని నిలువరించేందుకు వీలవుతుందని అంటున్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి)