ట్రంప్-కిమ్ భేటీ: జరగదంటున్న ఉత్తర కొరియా.. జరుగుతుందంటున్న అమెరికా

అమెరికా అధ్యక్షుడు డొనాల్డ్ ట్రంప్‌తో శిఖరాగ్ర సమావేశాన్ని రద్దు చేస్తామని ఉత్తర కొరియా హెచ్చరిస్తున్నప్పటికీ.. కిమ్ జోంగ్-ఉన్‌తో ట్రంప్ భేటీ జరుగుతుందని తాము ఆశావహంగా ఉన్నట్లు అమెరికా చెప్పింది.

కిమ్‌తో సమావేశానికి అమెరికా అధ్యక్షుడు సిద్ధంగానే ఉన్నారని అధ్యక్ష భవనం అధికార ప్రతినిధి ఒకరు పేర్కొన్నారు.

ఉత్తర కొరియా అణ్వస్త్రాలను త్యజించాలని అమెరికా పట్టుపడితే ట్రంప్‌తో భేటీ నుంచి వైదొలగుతామంటూ ఉత్తర కొరియా బుధవారం ఆగ్రహంగా ప్రకటన జారీ చేసిన కొన్ని గంటల తర్వాత అమెరికా పైవిధంగా స్పందించింది.

ప్రపంచం ఎంతో ఆసక్తిగా ఎదురుచూస్తున్న ట్రంప్ - కిమ్ భేటీ జూన్ 12వ తేదీన జరగాల్సి ఉంది.

''ఆ భేటీ జరిగేటట్లయితే అందుకు అధ్యక్షుడు సిద్ధంగా ఉన్నారు. ఒకవేళ జరగకపోతే.. ప్రస్తుతం కొనసాగిస్తున్న తీవ్ర ఒత్తడిని కొనసాగిస్తాం'' అని శ్వేత సౌధం అధికార ప్రతినిధి సారా సాండర్స్ పేర్కొన్నారు.

తాజా పరిణామంపై ట్రంప్ ఇంకా వ్యాఖ్యానించలేదు.

కొరియా ద్వీపకల్పాన్ని అణ్వస్త్ర రహితంగా మార్చటానికి కట్టుబడి ఉన్నామని ఉత్తర కొరియా ప్రకటించిన తర్వాత.. చరిత్రాత్మకంగా భావిస్తున్న కిమ్ - ట్రంప్ భేటీకి అంగీకారం కుదిరింది.

అయితే.. ఇందుకోసం ఖచ్చితంగా ఏం జరుగుతుందనేది అస్పష్టంగానే ఉంది. కానీ.. ఈ నెలాఖరులో తన ప్రధాన అణ్వస్త్ర పరీక్షా కేంద్రాన్ని కూల్చివేయటాన్ని ప్రత్యక్షంగా వీక్షించటానికి రావలసిందిగా విదేశీ మీడియాను ఉత్తర కొరియా ఆహ్వానించింది.

ఉత్తర కొరియా ఏం చెప్పింది?

అణు ఆయుధాలను వదిలిపెట్టాలని అమెరికా బలవంతం చేస్తే అమెరికా అధ్యక్షుడు ట్రంప్‌తో తమ అధ్యక్షుడు కిమ్ భేటీని పునఃపరిశీలిస్తామని ఉత్తర కొరియా తెలిపింది.

అంతకు ముందు బుధవారం దక్షిణ కొరియాతో జరగాల్సిన ఉన్నతస్థాయి చర్చలను రద్దు చేసుకుంది.

అమెరికాతో కలసి దక్షిణ కొరియా ఉమ్మడిగా సైనిక విన్యాసాలు చేయడంపై ఆగ్రహం వ్యక్తం చేస్తూ ఈ నిర్ణయం తీసుకుంది.

ఉత్తరకొరియా అధికారిక వార్తా సంస్థ దీనిపై స్పందిస్తూ, ''ఆ రెండు దేశాల ఉమ్మడి సైనిక విన్యాసాలు తమను రెచ్చగెట్టేలా ఉన్నాయి. తమపై దాడి చేసే ముందస్తు సైనిక విన్యాసాలుగా వాటిని భావిస్తున్నాం'' అని పేర్కొంది.

అలాగే, దీని ప్రభావం చారిత్రాత్మక కిమ్- ట్రంప్ భేటీపై పడుతుందని అమెరికాను హెచ్చరించింది.

సింగపూర్‌లో జూన్ 12న అమెరికా అధ్యక్షుడు డొనాల్డ్ ట్రంప్- ఉత్తర కొరియా అధినేత కిమ్ భేటీ కావాల్సి ఉంది.

కిమ్‌ పంపిన చర్చల ఆహ్వానానికి ఆమోదం తెలుపుతూ గత మార్చిలో ట్రంప్ నిర్ణయం తీసుకొని ప్రపంచాన్ని ఆశ్చర్యపరిచారు.

''మా భేటీతో ప్రపంచ శాంతికి ప్రయత్నిస్తాం'' అని ట్రంప్ ట్వీట్ కూడా చేశారు.

మరోవైపు, ట్రంప్-కిమ్ భేటీకి సన్నాహాలు చేస్తున్నామని, ఉత్తర కొరియా ప్రకటనపై తమకు సమాచారం లేదని అమెరికా ప్రభుత్వం తెలిపింది.

ఉత్తర కొరియా ఆగ్రహం ఎందుకు?

గత ఏప్రిల్ 27న ఉత్తర, దక్షిణ కొరియాల మధ్య జరిగిన చర్చలకు కొనసాగింపుగా ఈ భేటీ నిర్వహించాల్సి ఉంది.

ఇరు దేశాల మధ్యన ఉన్న నిస్సైనిక కేంద్రం పాన్‌మున్‌జొమ్‌ (దీన్ని సంధి పట్టణంగా పిలుస్తారు)ప్రాంతంలో భేటీ కావాలని ఈ వారం మొదట్లోనే ఇరు దేశాలు అంగీకరించాయి.

ఈ చారిత్రక సదస్సులో అణు ఆయుధాల తొలగింపు, యుద్ధ విరమణ, శాంతి ఒప్పందాలపై చర్చించేందుకు ఇరు దేశాల ప్రతినిధులు ప్రణాళికలు రచించారు.

మరో వైపు, ఇరు దేశాల మధ్య చర్చల కొనసాగింపునకు అమెరికా, చైనాలు ప్రయత్నిస్తున్నాయి.

ట్రంప్-కిమ్ భేటీ జరిగేనా?

ఉత్తర కొరియా .. బుధవారం దక్షిణ కొరియాతో జరగాల్సిన చర్చలను రద్దు చేసుకుంటున్నట్లు ప్రకటించడంతో అమెరికాకు హెచ్చరికలు పంపినట్లైంది.

''దక్షిణ కొరియాతో అమెరికా ఉమ్మడిగా సైనిక విన్యాసాలు చేయడంతోనే మేం చర్చలను రద్దు చేసుకున్నాం. దీని ప్రభావం కిమ్ ట్రంప్ భేటీపైనా ఉంటుంది. ఈ విషయం అమెరికా నిశితంగా పరిశీలిస్తుందని భావిస్తున్నాం'' అని ఉత్తర కొరియా వార్తా సంస్థ తెలిపింది.

ఈ పరిణామాలపై బీబీసీ దక్షిణ కొరియా ప్రతినిధి లారా బికెర్ మాట్లాడుతూ, ''ఉత్తర కొరియా ప్రకటనను గమనిస్తే ట్రంప్‌తో భేటీపై ఆ దేశం సందేహంలో పడినట్లు అనిపిస్తుంది. ట్రంప్‌తో చర్చలు రద్దు చేసుకుంటున్నాం అని చెప్పడానికి బదులుగా భేటీపై అనుమానాలు వ్యక్తం చేస్తోంది.' అని విశ్లేషించారు.

భేటీ రద్దు పై వస్తున్న ఊహాగానాలపై స్పందించేందుకు అమెరికా నిరాకరించింది.

దక్షిణ కొరియాతో చర్చలను రద్దు చేసుకుంటున్నట్లు ఉత్తర కొరియా ప్రకటించిన వెంటనే అమెరికా ఒక ప్రకటన విడుదల చేసింది.

''ట్రంప్- కిమ్ భేటీపై సన్నాహాలు చేస్తున్నాం'' అని అమెరికా అధికార ప్రతినిధి ఒకరు మీడియాకు ఒక ప్రకటనలో తెలిపారు.

చర్చల రద్దుపై ఉత్తర కొరియా నుంచి తమకు అధికారికంగా ఎలాంటి సమాచారం అందలేదని పేర్కొన్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)