పీవీ సింధు విజయం: బీడబ్ల్యూఎఫ్ వరల్డ్ చాంపియన్‌‌గా చరిత్ర సృష్టించిన తెలుగుతేజం..

తెలుగుతేజం, భారత స్టార్ షట్లర్ పీవీ సింధు బీడబ్ల్యూఎఫ్ వరల్డ్ టూర్ ఫైనల్స్‌ 2018లో జపాన్‌కు చెందిన నొజోమీ ఒకుహరాను ఓడించి టైటిల్ కైవసం చేసుకుంది.

తొలి గేమ్‌ను 21-19తో గెలుచుకున్న సింధు, రెండో గేమ్‌లో 21-16తో విజయం సాధించింది.

ప్రతిష్ఠాత్మక వరల్డ్‌ టూర్‌ ఫైనల్స్‌ టోర్నమెంట్‌లో భారత క్రీడాకారిణి విజేతగా నిలవడం ఇదే తొలిసారి. గత ఏడాది ఈ టోర్నీలో సింధు రన్నరప్‌గా నిలిచారు.

ఫైనల్స్ వరకు వచ్చి ఓడిపోతారనే విమర్శలకు సింధు ఈ విజయంతో బదులిచ్చింది.

టైటిల్‌ పోరులో సింధు-ఒకుహారాలు నువ్వా-నేనా అన్నట్లు తలపడ్డారు. తొలి గేమ్‌లో సింధు 14-6 తేడాతో ఆధిక్యంలో ఉన్న దశలో ఒకుహరా వరుసగా నాలుగు పాయింట్లు సాధించి సింధు ఆధిక్యాన్ని తగ్గించింది.

ఆ తర్వాత ఒకుహరా రెండు పాయింట్లు సాధించగా, సింధు పాయింట్‌ మాత్రమే సాధించింది. ఈ దశలో ఒకుహరా నాలుగు పాయింట్లు సాధించగా, సింధు పాయింట్‌ దక్కించింది. దాంతో స్కోరు 16-16తో సమమైంది.

ఆ వెంటనే సింధు వరుస పాయింట్లతో పైచేయి సాధించి తొలి గేమ్‌ దక్కించుకున్నారు.

రెండో గేమ్‌లో సింధు ఏ దశలోనూ ఆధిక్యాన్ని కోల‍్పోకుండా గేమ్, మ్యాచ్ గెలుచుకున్నారు.

కాగా ఈ ఫైనల్‌కు ముందు గ్వాంగ్‌ఝౌలో శనివారం జరిగిన మ్యాచ్‌లో రత్చనోక్‌ ఇంతనోన్‌పై 21-16, 25-23 తేడాతో సింధు విజయం సాధించి ఫైనల్‌కు చేరింది.

ఫైనల్ చేరే క్రమంలో సింధు యమగుచి, తై జుయింగ్ వంటి అగ్రశ్రేణి షట్లర్లను ఓడించారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)