గ్రామీణ భారతానికి ఈ బడ్జెట్ ఏమిచ్చింది?

బడ్జెట్

ఫొటో సోర్స్, SANJAY KANOJIA/Getty Images

ఈ బడ్జెట్‌లో గ్రామీణ, వ్యవసాయ రంగాలకు అధిక ప్రాధాన్యత ఇచ్చినట్టు కేంద్ర ఆర్థిక మంత్రి అరుణ్ జైట్లీ అన్నారు. మరి గ్రామీణ భారతానికి ఈ బడ్జెట్‌లో కేటాయింపులు ఎలా ఉన్నాయి?

  • 2022లోగా దేశంలోని పేదలందరి సొంతింటి కల నెరవేర్చాలని లక్ష్యంగా పెట్టుకున్నట్టు బడ్జెట్ ప్రసంగంలో అరుణ్ జైట్లీ అన్నారు. అందుకోసం ప్రధాన్‌ మంత్రి ఆవాస్ యోజన(గ్రామీణ) పథకం కింద 2018-19 ఆర్థిక సంవత్సరంలో గ్రామీణ ప్రాంతాల్లో 51 లక్షల గృహాలు నిర్మిస్తామని తెలిపారు. అందుకు రూ. 33,000 కోట్లు కేటాయించినట్లు బడ్జెట్ పేర్కొన్నారు.
  • ప్రధాన్‌ మంత్రి గ్రామ్ సడక్ యోజన(గ్రామీణ) పథకానికి రూ.19,000 కోట్లు కేటాయించారు. ఈ పథకం కింద దేశవ్యాప్తంగా 57,000 కిలోమీటర్ల రోడ్లు అభివృద్ధి చేస్తామన్నారు. దాంతో కార్మికులకు 28 కోట్ల 35 లక్షల పనిదినాల ఉపాధి లభిస్తుందని తెలిపారు.
  • మహాత్మాగాంధీ జాతీయ ఉపాధి హామీ పథకం కింద 230 కోట్ల పనిదినాలు కల్పిస్తామని, అందుకోసం రూ. 55,000 కోట్లు కేటాయిస్తున్నట్లు పేర్కొన్నారు. 2017-18 బడ్జెట్‌లో ఈ పథకానికి రూ. 48,000 కోట్లు కేటాయించారు.
  • నేషనల్ రూరల్ జీవనోపాధి మిషన్ కింద రూ. 5,750 కోట్లు కేటాయించారు. ఈ మిషన్ కింద కొత్తగా 9 లక్షల స్వయం సహాయక సంఘాలను ప్రారంభిస్తారు. 5 లక్షల మంది మహిళా రైతులకు సాయం అందిస్తారు. 4 లక్షల మందికి శిక్షణ ఇస్తారు.
  • వాటర్ షెడ్ పథకం కింద 1.30 లక్షల నీటి కుంటలను అభివృద్ధి చేస్తారు. 1.81 లక్షల హెక్టార్ల సాగు భూమికి నీటి భద్రత కల్పిస్తారు. దాంతో 5.01 లక్షల మంది రైతులు లబ్ధి పొందుతారు.
  • భారత్‌నెట్ ఫేజ్ 2కి రూ. 10,000 కోట్లు కేటాయించారు. ఇందులో భాగంగా గ్రామీణ ప్రాంతాల్లో 5 లక్షల వైఫై హాట్‌స్పాట్‌లు ఏర్పాటు చేస్తారు.
  • జాతీయ గ్రామీణ తాగునీటి పథకానికి రూ. 7,000 కోట్లు కేటాయించారు. ఈ పథకం కింద పైపు లైన్లు, నీటి శుద్ధి ప్లాంట్ల ఏర్పాటు చేస్తారు. దీంతో 84,000 మందికి ఉపాధి దొరుకుతుందని మంత్రి అరుజైట్లీ పేర్కొన్నారు.

ఇవి కూడా చూడండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి)