కేంద్ర బడ్జెట్లో మీ జేబుకు చిల్లు వేసే అంశాలు.. ఊరట కలిగించేవి

1 ఫిబ్రవరి 2018

ఈ బడ్జెట్‌లో ఆదాయపు పన్ను శ్లాబుల్లో ఎటువంటి మార్పులు లేవు. అంటే 2017-18 ఆర్థిక సంవత్సరానికి పన్ను ఎలా చెల్లించారో ఈసారీ అంతే.

వ్యక్తిగత ఆదాయపు పన్నులో సింహభాగం వేతన జీవుల నుంచే ప్రభుత్వానికి సమకూరుతోంది. 2017-18లో 1.89 కోట్ల మంది రిటర్నులు దాఖలు చేశారు. రూ.1.44 లక్షల కోట్లు పన్ను రూపంలో చెల్లించినట్లు బడ్జెట్ ప్రసంగంలో జైట్లీ చెప్పారు.

మెడికల్, రవాణా రీయంబర్స్‌మెంట్‌ మినహాయింపును రూ.40,000 ప్రతిపాదించారు. దీని ద్వారా రూ.8,000 కోట్ల ఆదాయాన్ని ప్రభుత్వం కోల్పోతున్నట్లు మంత్రి చెప్పుకొచ్చారు.
విద్యా సుంకాన్ని 3 శాతం నుంచి 4 శాతానికి పెంచారు. తద్వారా రూ.11,000 కోట్ల ఆదాయం ప్రభుత్వానికి అదనంగా చేకూరుతుంది. ఆమేరకు పన్ను చెల్లింపుదార్ల జేబులకు కత్తెర పడుతుంది.

సీనియర్ సిటిజన్లు

2018-19 బడ్జెట్‌లో సీనియర్ సిటిజన్లకు ప్రభుత్వం కాస్త ఊరటను ఇచ్చే చర్యలు తీసుకొంది. ఆరోగ్య బీమా ప్రీమియంపై పన్ను మినహాయింపు రూ.30,000 నుంచి రూ.50,000కు పెంచింది. కాబట్టి ఆరోగ్య బీమా మరింత మంది వృద్ధులకు అందుబాటులోకి వచ్చే అవకాశం ఉంది.

అలాగే బ్యాంకులు, పోస్టాఫీసుల్లో డిపాజిట్ల ద్వారా వచ్చే వడ్డీ ఆదాయంపై పన్ను మినహాయింపును రూ.10,000 నుంచి రూ.50,000కు పెంచారు. వడ్డీ ఆదాయంపై ఆధారపడి జీవించే వృద్ధులకు ఇది మంచి వార్తే.
క్యాన్సర్ వంటి ప్రమాదకరమైన రోగాలకు సంబంధించి పన్ను మినహాయింపును రూ.1,00,000కు పెంచారు.
పింఛను పథకం ప్రధాన మంత్రి వయ వందన యోజనను 2020 మార్చి వరకు పొడిగించారు. ఇందులో పెట్టుబడుల పరిమితిని రూ.7.5 లక్షల నుంచి రూ.15 లక్షలకు పెంచారు.