శాండ్‌విచ్‌లు తిన్న 500 మందికి అస్వస్థత, అసలేం జరిగిందంటే...

ఆహారం — ఫొటో క్యాప్షన్, ఇది మాంసం, ఊరగాయతో తయారుచేసే పాపులర్ వియత్నమీజ్ స్ట్రీట్‌ ఫుడ్

7 మే 2024

దక్షిణ వియత్నాంలోని ఒక దుకాణంలో బన్‌ మి శాండ్‌విచ్‌లు తిన్న సుమారు 500 మంది అస్వస్థతకు గురయ్యారు. ఫుడ్ పాయిజనింగ్ అనుమానంతో వారిని ఆస్పత్రికి తరలించారు.

వారిలో ఆరు, ఏడేళ్ల మధ్య వయసున్న ఇద్దరు అబ్బాయిలు సహా 12 మంది పరిస్థితి విషమంగా ఉంది.

డాంగ్ నై ప్రావిన్స్‌లోని ఈ బేకరీని తాత్కాలికంగా మూసేశారు. తీవ్రమైన ఎండల కారణంగానే శాండ్‌విచ్‌లు పాడైపోయి ఉండొచ్చని భావిస్తున్నారు. బేకరీలో భద్రతా ప్రమాణాలు పాటించడం లేదని ప్రాథమిక తనిఖీల్లో తేలింది.

బన్ మి సంప్రదాయ వియత్నమీజ్ శాండ్‌విచ్. ఇది ఫ్రెంచ్ స్టైల్ బ్రెడ్‌లో మాంసం, కూరగాయలతో నింపి ఉంటుంది.

ఏప్రిల్ 30న లాంగ్ ఖాన్ నగరంలోని బ్యాంగ్ బేకరీలో శాండ్‌విచ్‌లు తిన్న 560 మంది అస్వస్థతకు గురైనట్లు లాంగ్ ఖాన్ టౌన్ అధికారులు ధ్రువీకరించారు.

వారిలో 200 మంది ఆస్పత్రి నుంచి డిశ్చార్జి అయ్యారని తెలిపారు.

ట్రాన్ క్వాంగ్ డయూ వీధిలోని ఈ బేకరీ రోజుకి 1,100 శాండ్‌విచ్‌లను విక్రయిస్తుందని స్థానిక అధికారుల అంచనా.

ఫుడ్ పాయిజనింగ్ అనుమానిత కేసుల సంఖ్య రోజురోజుకీ క్రమంగా పెరుగుతోందని స్థానిక ఆస్పత్రి రిపోర్ట్స్ చెబుతున్నాయి.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

ఫుడ్ పాయిజనింగ్‌కు గురైన వారిలో విరేచనాలు, వాంతులు, జ్వరం, తీవ్రమైన కడుపు నొప్పి వంటి లక్షణాలు ఉన్నాయి.

డాంగ్ నై చిల్డ్రన్స్ హాస్పిటల్‌ ఐసీయూలో చికిత్స పొందుతున్న ముగ్గురు చిన్నారుల తల్లితో వియత్నమీజ్ వార్తాపత్రిక హెల్త్ అండ్ లైఫ్ మాట్లాడింది.

ఆమె తన పిల్లలకు అదనపు మాంసంతో కూడిన శాండ్‌విచ్‌లను కొనుగోలు చేశారు. ఆ తర్వాత 24 గంటల్లో వారిలో ఫుడ్ పాయిజనింగ్ లక్షణాలు కనిపించడం ప్రారంభించాయని వార్తాపత్రికతో ఆమె చెప్పారు.

తీవ్ర అస్వస్థతకు గురైన వారి రక్తపరీక్షల నివేదికలు పరిశీలించినప్పుడు, వారు తిన్న మాంసం, చీజ్, పండ్లతో సహా ఇతర ఉత్పత్తుల్లో ఈ.కోలి బ్యాక్టీరియా ఆనవాళ్లు కనిపించాయని ప్రాంతీయ ఆరోగ్య శాఖ తెలిపింది.

టువోయ్ ట్రె న్యూస్ ప్రకారం, తదుపరి పరీక్షల కోసం బన్ మి నమూనాలను ల్యాబ్‌కు పంపించారు. ఫుడ్ పాయిజనింగ్‌ ఘటనపై దర్యాప్తు ప్రారంభించినట్లు పోలీసులు తెలిపారు.