హనీ ట్రాప్ అంటే ఏంటి... సెక్స్‌ను ఒక ఆయుధంగా ఎలా వాడతారు

ఆయనొక ఆయుధాల వ్యాపారి... అనేక దేశాలకు రహస్యంగా తుపాకులు, బాంబులు వంటివి సరఫరా చేస్తుంటాడు.

కానీ సమాజంలో బాగా పేరు, డబ్బు ఉన్న వ్యక్తి. ప్రభుత్వంలో చాలా మందితో మంచి సంబంధాలు కూడా ఉంటాయి. ఆయనను నేరుగా అరెస్టు చేయడానికి, విచారించడానికి పోలీసులకు అవకాశం ఉండదు.

బాగా పలుకుబడి ఉన్న ఆ వ్యక్తి నుంచి అక్రమ ఆయుధాల వ్యాపారపు గుట్టుమట్టు రాబట్టేందుకు పోలీసులు ఒక పథకం వేస్తారు. ఒక ‘అందమైన’ అమ్మాయిని బరిలోకి దించుతారు.

ఆ అమ్మాయి ఆ వ్యాపారిని ఆకట్టుకుని దగ్గర అవుతుంది. అలా మెల్లగా ఆయుధాల రవాణాకు సంబంధించిన రహస్య సమాచారం కనుకొన్ని పోలీసులకు చేర వేస్తుంది.

ఇలాంటి సన్నివేశాలు మనం సినిమాల్లో చాలానే చూస్తుంటాం. ముఖ్యంగా ‘జేమ్స్‌బాండ్’ సినిమాల్లో ఇది ఎక్కువగా కనిపిస్తుంది.

దీన్నే హనీ ట్రాప్ అంటారు.

ఒక వ్యక్తితో రొమాంటిక్ లేదా సెక్సువల్ సంబంధాలు పెట్టుకోవడం ద్వారా తమకు అవసరమైన సమాచారాన్ని రాబట్టడాన్ని‘హనీ ట్రాప్’ అంటారు. ఇందుకోసం ‘ఆకర్షణీయమైన వ్యక్తులను’ ఉపయోగిస్తారని డిక్షనరీలు చెబుతున్నాయి.

పురాతన కాలం నుంచే

చరిత్రను పరిశీలిస్తే మహిళల ద్వారా రహస్య సమాచారం రాబట్టడం అనేది పురాతన కాలం నుంచే వస్తోందనే విషయం మనకు అర్థమవుతుంది.

గూఢచర్యానికి ఎలాంటి మహిళలను ఉపయోగించాలో అర్థశాస్త్రం చెబుతోంది. ఆటాపాటా బాగా తెలిసిన వారు, కళల్లో ఆరితేరిన వారిని గూఢచారులుగా పెట్టాలని ఆ పుస్తకంలో రాశారు.

మౌర్యుల కాలంలో ‘విషకన్యల’ను కూడా ఉపయోగించేవారని కొందరు పరిశోధకులు చెబుతున్నారు.

ప్రపంచయుద్ధాలలోనూ

ఈ హనీ ట్రాప్ అనేది ఇటీవల కాలంలో భారత్‌లోనూ తరచూ వినపడుతోంది.

భారత సైనికులకు, అధికారులకు ‘వలపుల వల’ విసిరి వారి నుంచి ‘రహస్య’ సమాచారాన్ని రాబడుతున్నారనే వార్తలు మనం చూస్తూనే ఉన్నాం.

పాకిస్తాన్ ఇంటెలిజెన్స్ సంస్థ ఐఎస్‌ఐ పన్నిన ‘హనీ ట్రాప్‌’లో పడి భారతదేశానికి సంబంధించిన ‘రహస్య’ సమాచారాన్ని ఆ దేశానికి ఇచ్చారనే ఆరోపణల మీద శుక్రవారం ఒక కేంద్ర ప్రభుత్వ ఉద్యోగిని దిల్లీ పోలీసులు అరెస్టు చేశారు.

ఇలా ‘వలపుల వల’ వేసి రహస్య సమాచారం సేకరించడం అనేది ఎంతో కాలంగా ఉన్నదే.

రెండో ప్రపంచయుద్ధం సమయంలోనూ శత్రు దేశాల యుద్ధవ్యూహాలు తెలుసుకునేందుకు హనీ ట్రాప్ ఏజెంట్లను ఉపయోగించారు. అలా చేసిన వారిలో ‘బెట్టీ ప్యాక్’ అనే ఆమె ఒకరు.

రెండో ప్రపంచయుద్ధం సమయంలో బ్రిటన్, అమెరికాలకు ఆమె గూఢచారిగా పని చేశారు. లైంగిక సంబంధాలు పెట్టుకోవడం ద్వారా రహస్య సమాచారాన్ని బెట్టీ సేకరించేవారు.

సోవియట్ రష్యాలోనూ ఇంటెలిజెన్స్ సంస్థ కేజీబీ ‘హనీ ట్రాప్’ టెక్నిక్‌ను చాలా బాగా వాడేది. పశ్చిమ దేశాల దౌత్యవేత్తలు, నిఘా సంస్థలకు చెందిన అధికారులను లక్ష్యంగా చేసుకునేది కేజీబీ.

మొదటి ప్రపంచయుద్ధంలో ‘మాటా హారీ’ అనే డచ్ డ్యాన్సర్ కూడా జర్మనీ కోసం గూఢచారిగా పని చేశారనే కేసులో దోషిగా తేలారు.

ప్రముఖ ఫ్రెంచ్ రాజకీయ నాయకులు, అధికారులతో లైంగిక సంబంధాలు పెట్టుకోవడం ద్వారా ఆ దేశ రహస్య సమాచారాన్ని ఆమె సేకరించి జర్మనీకి పంపేవారు అనే ఆరోపణలు ఉన్నాయి. విచారణలో దోషిగా తేలడంతో 1917లో ఆమెకు మరణశిక్ష విధించారు.

రోమియో స్పైస్... మగవారు కూడా

హనీ ట్రాప్ అనగానే ఆడవారు మాత్రమే ‘వలపుల వల’ వేస్తారు అని అనుకుంటారు. కానీ మగవారిని కూడా అందుకు ఉపయోగిస్తారు.

ఈస్ట్, వెస్ట్ జర్మనీల మధ్య ప్రచ్ఛన్నయుద్ధం సమయంలో జరిగింది ఇదే. అందమైన మగవారితో ఈస్ట్ జర్మనీ తయారు చేసిన ‘రోమియో స్పైస్’ అప్పట్లో చాలా ఫేమస్.

రెండో ప్రపంచయుద్ధంలో పురుషులు ఎక్కువగా చనిపోవడంతో ఒంటరి మహిళల సంఖ్య బాగా పెరిగిపోయింది. ఇలాంటి వారు జర్మనీ ప్రభుత్వ కార్యాలయాల్లో అధిక సంఖ్యలో పని చేస్తూ ఉండే వారు.

ఇలా వెస్ట్ జర్మనీ ప్రభుత్వ కార్యాలయాల్లో పని చేస్తున్న ఒంటరి మహిళలను ఈస్ట్ జర్మనీ టార్గెట్ చేసింది. అందమైన అధికారులతో ‘స్టాసీ’ అనే ఒక ప్రత్యేక విభాగాన్ని ప్రారంభించింది ఈస్ట్ జర్మనీ సెక్యూరిటీ సర్వీసెస్.

ఈ అందమైన, తెలివైన నిఘా అధికారులు వెస్ట్ జర్మనీలోకి వెళ్లి అక్కడ పరిశ్రమల్లోనూ, ప్రభుత్వంలోనూ ఉద్యోగాలు సంపాదించేవారు. ఆ తరువాత అక్కడి ఒంటరి మహిళలను ఆకట్టుకుని, వారితో సంబంధాలు పెట్టుకునేవారు. అలా వారి నుంచి రహస్య సమాచారాన్ని సేకరించి ఈస్ట్ జర్మనీకి పంపేవారు.

సోషల్ మీడియా వేదికగా

ఇప్పుడు కాలం మారింది.

ఇంటర్నెట్, సోషల్ మీడియా యుగంలో హనీ ట్రాప్ కూడా తన రూపాన్ని మార్చుకుంది.

ఫేస్‌బుక్, ట్విటర్, ఇన్‌స్టాగ్రాం, వాట్సాప్... వంటి సోషల్ మీడియా వేదికల ద్వారా నేడు హనీ ట్రాప్ కార్యకలాపాలు ఎక్కువగా జరుగుతున్నాయి.

ఇలా హనీ ట్రాప్‌కు పాల్పడే వాళ్లకు ఎక్కువగా అమ్మాయిల పేరుతో, ఫొటోలతో సోషల్ మీడియాలో ఖాతాలు తెరుస్తారు. ఆ తరువాత తామ టార్గెట్ చేసే వ్యక్తులను ఫాలో కావడం ప్రారంభిస్తారు.

వారితో స్నేహం చేస్తూ, ప్రేమించినట్లు నటిస్తూ... లైంగిక ప్రలోభాలకు గురి చేస్తూ మోసం చేసేందుకు, రహస్య సమాచారం లాగేందుకు ప్రయత్నిస్తారు.

వ్యక్తుల విషయంలో అయితే మోసం చేసి డబ్బులు గుంజవచ్చు. దేశాల విషయంలో అయితే సైన్యానికి సంబంధించిన లేదా దేశ భద్రతకు సంబంధించిన రహస్య సమాచారం లాగొచ్చు.

భారత్‌లో పెరుగుతున్న కేసులు

కొంత కాలంగా భారత్‌లో ఇలాంటి ‘హనీ ట్రాప్’ కేసులు పెరుగుతున్నాయి. భారత సైన్యం, వైమానికదళంలో 2015 నుంచి 2017 మధ్య అయిదు కేసులు నమోదైనట్లు కేంద్ర ప్రభుత్వం రాజ్యసభకు తెలిపింది.

పాకిస్తాన్ హనీ ట్రాప్‌లో పడి దేశ రహస్యాలు వెల్లడించారంటూ ఈ ఏడాది జూన్‌లో ఒక సైనికున్ని అరెస్ట్ చేశారు. పాకిస్తాన్‌కు చెందిన అమ్మాయి ట్రాప్‌లో ఆ సైనికుడు పడినట్లు ఇండియా టుడే రిపోర్ట్ చేసింది.

2019లోనూ ఇలా హనీ ట్రాప్‌లో పడి పాకిస్తాన్‌కు కీలక సమాచారం వెల్లడించారనే ఆరోపణలతో జైసల్మేర్‌ రెజిమెంట్‌లోని ఒక జవాన్‌ను రాజస్థాన్ పోలీసులు అరెస్ట్ చేశారు.

ఇలాంటి కేసులోనే కేంద్ర విదేశాంగ శాఖలో డ్రైవర్‌గా పని చేసే ఒక వ్యక్తి దిల్లీ పోలీసులు శుక్రవారం అరెస్ట్ చేశారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)