தாலிபன் அமைச்சரின் ஊடக சந்திப்பில் பெண் பத்திரிகையாளர்கள் - என்ன நடந்தது?

ஒரு படம் ஆயிரம் வார்த்தைகளைப் பேச முடியும் என்று அடிக்கடி கூறப்படுவது உண்டு.

இந்திய செய்தித்தாள்களில் திங்களன்று காலை வெளியான ஒரு புகைப்படம் நிச்சயமாக அவற்றில் ஒன்றாகும். டெல்லியில் ஆப்கன் தாலிபன் வெளியுறவு அமைச்சரின் பத்திரிகையாளர் சந்திப்பில் பெண் பத்திரிகையாளர்கள் முன் வரிசையில் அமர்ந்திருப்பதை காட்டும் புகைப்படம் அது.

சுமார் 48 மணி நேரத்தில் ஆப்கானிஸ்தான் தூதரகத்தில் அமீர்கான் முத்தக்கியின் இரண்டாவது பத்திரிகையாளர் சந்திப்பு ஞாயிற்றுக்கிழமை நடைபெற்றது. வெள்ளிக்கிழமை அவரது முதல் பத்திரிகையாளர் சந்திப்பின் போது பெண்கள் ஒருவர் கூட பங்கேற்காதது குறித்து பெரும் சலசலப்பு ஏற்பட்டதை தொடர்ந்து இந்த இரண்டாவது சந்திப்பு ஏற்பாடு செய்யப்பட்டிருந்தது.

முதல் சந்திப்பில் பெண்கள் யாரும் பங்கேற்காதது தற்செயலானது, "வேண்டுமென்றே" நடைபெற்ற செயல் அல்ல என்று ஞாயிற்றுக்கிழமை முத்தக்கி கூறினார்.

"[வெள்ளிக்கிழமை] பத்திரிகையாளர் சந்திப்பைப் பொறுத்தவரை, அது குறுகிய கால அவகாசத்தில் ஏற்பாடு செய்யப்பட்டது, பத்திரிகையாளர்களின் ஒரு சிறிய பட்டியல் முடிவு செய்யப்பட்டது."

"இது ஒரு தொழில்நுட்ப பிரச்னை ... ஒரு குறிப்பிட்ட பத்திரிகையாளர்களுக்கு அழைப்பு அனுப்ப எங்கள் குழு முடிவு செய்திருந்தது. இதைத் தவிர வேறு எந்த நோக்கமும் இல்லை, "என்று அவர் மேலும் கூறினார்.

ஆப்கானிஸ்தானில் உள்ள நிலைமையை ஐ.நா "பாலின நிறவெறி" என்று குறிப்பிட்டுள்ளது, அங்கு பெண்கள் மற்றும் சிறுமிகள் மேல்நிலைப் பள்ளி அல்லது பல்கலைக்கழகத்தில் சேரவோ, பூங்காக்கள் அல்லது உடற்பயிற்சிக் கூடங்களுக்குச் செல்லவோ அனுமதிக்கப்படுவதில்லை. தாலிபன் அரசாங்கம் தலை முதல் கால் வரை பெண்கள் (உடல்களை) மறைத்துக் கொள்ள கட்டாயப்படுத்துகிறது, அவர்களின் பயணத்தையும் கட்டுப்படுத்துகிறது.

2021 -ல் மீண்டும் ஆட்சியைக் கைப்பற்றிய தாலிபன், ஆப்கன் கலாசாரம் மற்றும் இஸ்லாமிய சட்டம் ஆகியவற்றுக்கு ஏற்ப பெண்களின் உரிமைகளை மதிக்கிறோம் என்று முன்பு கூறியது. ஆனால் (சர்வதேச) அங்கீகாரத்தைப் பெறுவதற்கான அவர்களின் முயற்சிகள் பெண்கள் மீதான கட்டுப்பாடுகளால் தடைபட்டுள்ளதாக மேற்கத்திய வல்லுநர்கள் கூறுகின்றனர். தாலிபன் ஆட்சியின் கீழ் பெண்களின் உரிமைகள் நசுக்கப்படுவது உலகிலேயே மிகக் கடுமையானது.

ஒரு வார உயர்மட்ட பேச்சுவார்த்தைகளுக்காக முத்தக்கி வியாழக்கிழமை இந்தியா வந்தார். இதுவரை தாலிபன் அரசாங்கத்தை முழுமையாக அங்கீகரித்துள்ள ஒரே நாடு ரஷ்யா மட்டும்தான்.

ஆப்கானிஸ்தானின் ஆட்சியாளர்களை இந்தியா முறையாக அங்கீகரிக்கவில்லை, ஆனால் அவர்களுடன் ஒருவித ராஜதந்திர அல்லது மரபு சாரா உறவுகளைப் பேணும் பல நாடுகளில் இதுவும் ஒன்றாகும். காபூலில் ஒரு சிறிய பணியை பராமரித்து அங்கு மனிதாபிமான உதவிகளையும் இந்தியா அனுப்புகிறது.

முத்தக்கியின் வருகை இரு நாடுகளுக்கு இடையிலான உறவுகளை அதிகரிப்பதாக பார்க்கப்படுகிறது. இந்த சந்திப்பு இருநாடுகளுக்கும் முக்கியமானது - தாலிபன் அரசாங்கம் தனது அங்கீகாரத்திற்கான முயற்சியில் மேலும் ஒரு ஊக்கத்தை இந்த சந்திப்பு வழங்கும், அதே நேரத்தில் இந்தியா அதன் மூலோபாய மற்றும் பாதுகாப்பு நலன்களை முன்னெடுத்துச் செல்ல இந்த சந்திப்பு வழிவகுக்கும்.

2021 ஆம் ஆண்டில் தாலிபன் மீண்டும் ஆட்சிக்கு வந்த பின்னர் காபூலில் இந்திய தூதரகம் மூடப்பட்டது. அந்த தூதரகம், மீண்டும் திறக்கப்படும் என்று வெள்ளிக்கிழமை இந்திய வெளியுறவு அமைச்சர் எஸ்.ஜெய்சங்கர் அறிவித்தார். வெள்ளிக்கிழமை முத்தக்கியுடனான சந்திப்புக்கு பிறகு அவர் இதை அறிவித்தார்.

பின்னர் நடந்த பத்திரிகையாளர் சந்திப்பில் சுமார் 16 ஆண் செய்தியாளர்கள் கலந்து கொண்டனர். பெண் பத்திரிகையாளர்கள் தூதரக வாயிலில் இருந்து திருப்பி அனுப்பப்பட்டனர்.

(இந்த சந்திப்பில்) பெண்கள் கலந்து கொள்ள அழைக்கப்படவில்லை என்று தாலிபன் அரசாங்க வட்டாரம் ஒப்புக்கொண்டது.

ஆப்கானிஸ்தான் தூதரகத்தில் நடந்த பத்திரிகையாளர் சந்திப்பில் இந்தியாவுக்கு எந்த தொடர்பும் இல்லை என்று இந்திய வெளியுறவு அமைச்சகம் தெரிவித்துள்ளது.

ஆனால் இந்திய மண்ணில் பாலின பாகுபாடு அரசியல்வாதிகள் மற்றும் பத்திரிகையாளர்களை கோபப்படுத்தியது. அந்த செய்தியாளர் சந்திப்பை நடக்க அனுமதித்ததற்காக அரசாங்கத்தை அவர்கள் விமர்சித்தனர்.

எதிர்க்கட்சித் தலைவர் ராகுல் காந்தி கூறுகையில், "இந்தியாவில் உள்ள ஒவ்வொரு பெண்ணிடமும் நீங்கள் உங்களுக்காக நிற்க முடியாத அளவுக்கு பலவீனமாக இருக்கிறீர்கள் என்று இந்திய பிரதமர் மோதி கூறுகிறார்" என்று விமர்சித்தார்.

இந்திய எடிட்டர்ஸ் கில்ட், இந்திய பெண்கள் பத்திரிகைப் படை (ஐ.டபிள்யூ.பி.சி) மற்றும் ஊடகத்தில் பெண்கள் நெட்வொர்க் (என்.டபிள்யூ.எம்.ஐ) ஆகியவை கடுமையான அறிக்கைகளை வெளியிட்டன. இந்த விலக்கம் "மிகவும் பாரபட்சமானது" என்று அவை விமர்சித்தன.

"வியன்னா ஒப்பந்தத்தின் கீழ் ராஜதந்திர வளாகங்கள் பாதுகாப்பைக் கோரலாம் என்றாலும், இந்திய மண்ணில் பத்திரிகையாளர்களிடையே அப்பட்டமான பாலின பாகுபாடு காட்டப்படுவதை நியாயப்படுத்த முடியாது" என்று கில்ட் கூறியது.

"வெளியுறவு அமைச்சகம் இந்த நிகழ்வை ஒருங்கிணைத்தாலும் இல்லாவிட்டாலும், அத்தகைய பாரபட்சமான விலக்கு ஆட்சேபனை இல்லாமல் தொடர அனுமதிக்கப்பட்டது மிகவும் கவலையளிக்கிறது" என்று அது மேலும் கூறியது.

"பெண்களின் ஜனநாயக உரிமைகள் மற்றும் அரசியலமைப்பு சுதந்திரங்களை நிலைநிறுத்துவது இந்திய அரசாங்கத்தின் பொறுப்பு" என்றும், அத்தகைய "அப்பட்டமான பாலின பாகுபாட்டை" அவர்கள் கேள்வி எழுப்பியிருக்க வேண்டும் என்றும் ஊடகத்தில் பெண்களுக்கான நெட்வொர்க் (என்.டபிள்யூ.எம்.ஐ) கூறியது.

வெள்ளிக்கிழமை ஊடக சந்திப்பில் கலந்து கொண்ட ஆண் பத்திரிகையாளர்கள் தங்கள் பெண் சக ஊழியர்களுக்காக குரல் கொடுக்காததையும் இந்த குழு விமர்சித்தது. "இதுபோன்ற தருணங்களில், பாலின பாகுபாட்டை இயல்பாக்குவதில் மௌனத்தை உடந்தையாக இருப்பதாகவே பார்க்கலாம்" என்று அந்த அறிக்கையில் கூறப்பட்டுள்ளது.

இந்தியாவில் அதிகரித்து வந்த விமர்சனங்களுக்கு மத்தியில், முத்தக்கியின் குழு ஞாயிற்றுக்கிழமை பத்திரிகையாளர் சந்திப்புக்கு புதிய அழைப்புகளை அனுப்பியது. இது அனைத்து ஊடகவியலாளர்களையும் "உள்ளடக்கிய" நிகழ்வு என்று விவரிக்கப்பட்டது.

இரண்டாவது பத்திரிகையாளர் சந்திப்புக்கு எது வழிவகுத்தது என்பது தெளிவாகத் தெரியவில்லை - அதிகாரபூர்வ உறுதிப்படுத்தல் எதுவும் இல்லை என்றாலும், இந்திய அரசாங்கம் தலையிட்டிருக்கலாம் என்று சில ஊகங்கள் உள்ளன.

பாலின பாகுபாடு குறித்து எழுப்பப்பட்ட கேள்விகள்

இரண்டாவது சந்திப்பின் போது, வெள்ளிக்கிழமை ஊடக சந்திப்பில் பெண்களை விலக்கி வைத்ததற்கான காரணம் மற்றும் ஆப்கன் பெண்கள், அவர்களின் உரிமைகள் குறித்து அமைச்சரிடம் சில கடுமையான கேள்விகள் கேட்கப்பட்டன.

"பள்ளிகள் மற்றும் கல்வி நிறுவனங்களில் 2.8 மில்லியனுக்கும் அதிகமான பெண்கள் மற்றும் சிறுமிகள் உட்பட 10 மில்லியன் மாணவர்கள் உள்ளனர். மதரஸாக்களில், பட்டப்படிப்பு வரை கல்வி தொடர்கிறது," என்று முத்தக்கி பதிலளித்தார்.

"சில வரம்புகள் உள்ளன, ஆனால் நாங்கள் ஒருபோதும் பெண்களின் கல்வியை மத ரீதியாக ஹராம் [தடை] என்று அறிவிக்கவில்லை" என்று அவர் கூறினார்.

பத்திரிகையாளர் சந்திப்பில் கலந்து கொண்ட பல பத்திரிகையாளர்கள் அமைச்சரின் கூற்றை கேள்விக்குள்ளாக்கினர், 2021 முதல் பெண்கள் மற்றும் பெண்கள் மீது தாலிபன்கள் விதித்துள்ள கட்டுப்பாடுகளை சுட்டிக்காட்டினர்.

ஆப்கானிஸ்தானில் கடந்த நான்கு ஆண்டுகளில், 12 வயதுக்கு மேற்பட்ட பெண்கள் கல்வி பெற தடை விதிக்கப்பட்டது, பெண்களுக்கான வேலை வாய்ப்புகள் கடுமையாக கட்டுப்படுத்தப்பட்டுள்ளன. சமீபத்திய வாரங்களில், தாலிபன் அரசாங்கம் ஆப்கானிஸ்தானில் உள்ள பல்கலைக்கழகங்களில் இருந்து பெண்கள் எழுதிய புத்தகங்களை அகற்றியது.

ஆப்கானிஸ்தானில் பெண்களின் உரிமைகள் குறித்த அடுத்தடுத்த கேள்விகளுக்கு அமைச்சரின் பதில் திருப்திகரமாக இல்லாமல் இருக்கலாம். ஆனால், சில ஊடகவியலாளர்கள் சுட்டிக்காட்டியது போல், இரண்டாவது பத்திரிகையாளர் சந்திப்பு ஏற்பாடு செய்யப்பட்டது மற்றும் தாலிபன் அமைச்சர் பாலின பிரச்னைகள் குறித்த கேள்விகளுக்கு பதிலளித்தார் என்பதை ஒரு முன்னேற்றமாகக் காணலாம்.

- இது, பிபிசிக்காக கலெக்டிவ் நியூஸ்ரூம் வெளியீடு