Ҳамлаи муҳоҷимони интҳорӣ ба як ниҳоди давлатӣ дар шарқи Афғонистон
Мақомҳои вилояти Нангарҳор дар шарқи Афғонистон гуфтаанд, ки гурӯҳе аз муҳоҷимони интиҳорӣ ба идораи адлия дар шаҳри Ҷалолобод ҳамла карда ва бо нерӯҳои амниятӣ даргир шудааст.
Ин мақомҳо гуфтаанд, ки ин даргирӣ соъоте пеш бо шиллики муҳоҷимон ба муҳофизони ин идора дар шарқи шаҳри Ҷалолобод, маркази вилояти Нангарҳор, оғоз шуд.
Манобеъи амниятӣ гуфтаанд, ки нерӯҳои бештаре барои маҳори ҳамлаи муҳоҷимон дар маҳалли даргирӣ ҳузур ёфтаанд, аммо ҳанӯз даргирӣ идома дорад.
Мақомҳои маҳаллӣ то ҳол дар бораи теъдоди муҳоҷимон чизе нагуфтаанд, аммо женерол Аюби Солангӣ, муъовини вазири кишвар, дар Твитераш навишта, ки муҳоҷимон се тан буданд, ки ба гуфтаи ӯ яке аз онҳо кушта шудааст.
Гузоришгари Би-би-сӣ дар Нангарҳор мегӯяд, ки ба дунболи оғози ин даргирӣ садои шиллик бо силоҳҳои сабук ва сангин шунида шуда, аммо ҳанӯз иттилоъе дар бораи талафоти эҳтимолии ин ҳамла мунташир нашудааст.
Идораи адлияи вилояти Нангарҳор дар як минтақаи маскунӣ дар шарқи шаҳри Ҷалолобод мавқеъият дорад ва шуморе аз ниҳодҳои давлатӣ ҳам дар атрофи он воқеъ шудаанд.
Забеҳуллоҳ Муҷоҳид, ки худро сухангӯйи гурӯҳи Толибон муъаррифӣ мекунад, гуфта, ки шуморе аз омилони интиҳорӣ вориди сохтмони идораи адлия шудаанд.
Сухангӯйи Толибон ин ҳамларо бахше аз амалиёти баҳории ин гурӯҳи мавсум ба "Хайбар" эълом карда, ки ба гуфтаи ӯ, аз имрӯз (12 апрел) бо ҳамлаи мушакӣ ба пойгоҳи ҳавоии Багром оғоз шудааст.
Ҳамлаи Толибон ба Ғазнӣ
Аз сӯйи дигар, Муҳаммадалӣ Аҳмадӣ, муъовини волии Ғазнӣ дар ҷануби Афғонистон гуфта, ки ба дунболи шикасти ҳамлаи гурӯҳи Толибон дар вулусволии Гилон, аъзои ин гурӯҳ бомдоди дишаб ва бомдоди имрӯз ба гӯшае аз шаҳри Ғазнӣ ҳамла карданд.
Оқои Аҳмадӣ гуфта, ки дар ҷараёни ин ҳамла як пулис, ду зан ва дастикам панҷ узви гурӯҳи Толибон кушта шуданд ва ҳашт тани дигар захмӣ шуданд.
Ба гузориши муъовини волии Ғазнӣ, дар ҳамлаи Гилон, ки ҳафтаи гузашта оғоз шуд, 150 узви гурӯҳи Толибон кушта шуданд ва ин гурӯҳ шикасти сахтеро мутаҳаммил шуд.
Ба бовари оқои Аҳмадӣ, Толибон бо ҳадафи ҷуброни ин шикаст талош карданд, ки ба маҳаллоте дар даруни шаҳри Ғазнӣ ҳамла кунанд, аммо ба гуфтаи ӯ ин ҳамла ҳам натавонист дастовези таблиғотӣ барои ин гурӯҳ фароҳам кунад.
Дар муқобил, гурӯҳи Толибон аз тасарруфи комили вулусволии Гилон ва кушта шудани 46 сарбози давлатӣ дар набард дар ин вулусволӣ сухан гуфтааст. Сухангӯйи ин гурӯҳ дар гузорише гуфта, ки нерӯҳои давлатӣ аз Гилон ба маркази шаҳри Ғазнӣ ақибнишинӣ кардаанд.
Бо ин ҳол, ҳеҷ манбаъи мустақиле сиҳҳати ин иддаъоҳои ду тарафро таъйид накардааст.
Гурӯҳи Толибон ҳарсола бо гарм шудани ҳаво ба ҳамалоти худ алайҳи нерӯҳои давлатӣ шиддат мебахшад. Таъбири мақомҳои давлатӣ ин аст, ки афроди ин гурӯҳ зимистон ба Покистон мераванд ва дар фасли баҳор бозмегарданд.
Ин гурӯҳ дар солҳои ахир, монанди нерӯҳои байналмилалӣ дар Афғонистон, бархе аз ҳамалоти худро номгузорӣ мекунад. Ин гурӯҳ амалиёти тозаи худро Хайбар номидааст.
Дар рӯзҳои ахир тадобири амниятӣ дар шаҳрҳои бузург ва аз ҷумла Кобул, пойтахт, афзоиш ёфтааст. Афзоиши истҳои бозрасӣ ва назорат бар рафту омади худравҳо аз нишонаҳои бештар шудани ин тадобир аст.
