Rais wa zamani Ufaransa Sarkozy ahukumiwa miaka 5 jela

Moja kwa moja

Na Dinah Gahamanyi

1. 25 Septemba 2025Wapalestina katika Ukingo wa Magharibi wakwama huku Israel ikifunga vivuko vya kimataifa

   

   Chanzo cha picha, Reuters

   Israel imefunga kivuko pekee kati ya Ukingo wa Magharibi unaokaliwa na Israel na nchi jirani ya Jordan, na kuwazuia zaidi ya Wapalestina milioni mbili kuingia.

   Mamlaka ya viwanja vya ndege vya Israel, ambayo inasimamia kivuko cha Allenby Bridge, ilisema kuwa itafungwa kwa muda usiojulikana kuanzia Jumatano asubuhi "kwa maelekezo ya uongozi wa kisiasa". Haikutoa sababu.

   Kufungwa huko kumekwamisha Wapalestina wengi katika Ukingo wa Magharibi, ambao hawawezi kwenda kwa safari zilizopangwa nje ya nchi.

   Wale ambao wako nje ya nchi wameshindwa kusafiri nyumbani.

   Hatua hii inakuja siku chache baada ya wanajeshi wawili wa Israel kuuawa kwa kupigwa risasi karibu na kivuko na mtu aliyekuwa na bunduki kutoka Jordan, ambaye aliuawa katika eneo la tukio.

   Kivuko hicho, pia kinajulikana kama Daraja la King Hussein, kiko karibu nusu kati ya Amman na Jerusalem na ndio kivuko pekee rasmi kati ya Ukingo wa Magharibi na Jordan.

   Pia ni sehemu ya pekee ya kuingia Ukingo wa Magharibi ambayo haipiti Israeli. Wapalestina wengi katika Ukingo wa Magharibi hawaruhusiwi kusafiri kupitia viwanja vya ndege vya Israel au vivuko vingine vya mpaka wa Israel, kumaanisha daraja hilo ni muunganisho muhimu kwa ulimwengu wa nje.

   Mwanasiasa mashuhuri wa Palestina Mustafa Barghouti aliiambia BBC kuwa ni "hatua hatari" ambayo ilimaanisha "kuwafunga" watu katika Ukingo wa Magharibi na "kuwanyima njia pekee ya kutoka". "Unazungumza hapa kuhusu kuvuruga uhusiano kati ya mamia ya maelfu ya familia ambazo kwa kawaida huunganishwa kupitia Jordan," alisema.

   Unaweza kusoma;

   'Wanajeshi wa Israel waliiteka nyumba yangu, wakaitumia kama hoteli, kisha wakaiteketeza'

   Nani ataiongoza Palestina?

2. 25 Septemba 2025Nicolas Sarkozy ahukumiwa miaka mitano jela katika kesi ya ufadhili wa kampeni

   

   Chanzo cha picha, Reuters

   Rais wa zamani wa Ufaransa Nicolas Sarkozy amehukumiwa kifungo cha miaka mitano jela baada ya kupatikana na hatia ya kula njama ya uhalifu katika kesi inayohusiana na mamilioni ya euro ya fedha haramu kutoka kwa kiongozi wa Libya marehemu Kanali Muammar Gaddafi.

   Mahakama ya jinai ya Paris ilimuondolea mashtaka mengine yote, ikiwa ni pamoja na rushwa na ufadhili haramu wa kampeni.

   Akizungumza na waandishi wa habari baada ya kusikilizwa kwa kesi hiyo mzee huyo mwenye umri wa miaka 70, ambaye alikuwa rais wa Ufaransa kuanzia 2007 hadi 2012, aliitaja hukumu hiyo kuwa "haijazingatiautawala wa sheria".

   Sarkozy, ambaye anadai kesi hiyo ina msukumo wa kisiasa, alituhumiwa kutumia fedha kutoka kwa Gaddafi kufadhili kampeni yake ya uchaguzi wa 2007.

3. 25 Septemba 2025Jeshi la wanamaji la Ufaransa lanasa karibu tani 10 za kokeni pwani ya Afrika Magharibi

   

   Chanzo cha picha, Préfecture maritime de l'Atlantique/X

   Jeshi la wanamaji la Ufaransa limenasa karibu tani 10 za kokeni, yenye thamani ya $610m (£540m) katika pwani ya Afrika Magharibi, mamlaka ya Ufaransa imesema.

   Meli mbili za wanamaji za Ufaransa zinazofanya kazi kama sehemu ya Operesheni Corymbe zilinasa kokeni kutoka kwenye meli ya uvuvi isiyo na bendera siku ya Jumatatu, zikifanya kazi baada ya kuarifiwa na ujasusi wa baharini, mamlaka ya kupambana na dawa za kulevya na Shirika la Kitaifa la Uhalifu la Uingereza.

   Ujumbe wa wanamaji wa Corymbe umetumwa na Ufaransa katika Ghuba ya Guinea tangu 1990 ili kuhakikisha usalama katika eneo ambalo uharamia ni wa kawaida. "Tani 9.6 za kokeni zimenaswa na meli mbili za Ufaransa," jeshi la wanamaji la Ufaransa lilisema.

   Imeongeza kuwa tani 54 za dawa za kulevya zimenaswa katika eneo hilo tangu mwanzoni mwa mwaka.

   Ghuba ya Guinea, karibu na pwani ya magharibi mwa Afrika, imeshuhudia visa vingi vya dawa za kulevya katika miezi ya hivi karibuni, huku eneo hilo likiwa kituo kikuu cha usafirishaji wa mihadarati duniani, hasa kokeni kutoka Amerika Kusini ikisafirishwa hadi Ulaya.

   Eneo hilo liliwahi kuchukuliwa kuwa eneo hatari zaidi duniani kwa uharamia wa baharini, likipita maji ya Somalia.

   Nchi kadhaa za Magharibi zimetuma meli kusaidia kukabiliana na uharamia katika eneo hilo.

   Rekodi ya kunaswa kokeni ya tani 10.7 ilifanywa na jeshi la wanamaji la Ufaransa mnamo Machi mwaka jana, katika kile kilichokuwa kizuizi kikubwa cha biashara hiyo haramu katika pwani ya Afrika Magharibi.

   Unaweza kusoma;

   Uharamia Somalia: BBC yazungumza na majambazi wa bahari kuu

   Uharamia Afrika Magharibi: Je ndio bahari hatari zaidi duniani?

4. 25 Septemba 2025Zaidi ya watoto 1,000 waugua kutokana na chakula cha bure shuleni nchini Indonesia

   

   Chanzo cha picha, Yuli Saputra

   Zaidi ya watoto 1,000 wameugua kutokana na chakula cha mchana cha bure shuleni nchini Indonesia wiki hii, kulingana na mamlaka, tukio la hivi karibuni zaidi katika msururu wa matukio ya sumu ya chakula yanayohusishwa na mpango wa chakula bora wa Rais Prabowo Subianto wa mabilioni ya dola.

   Yuyun Sarihotima, mkuu wa Kituo cha Afya cha Jamii cha Cipongkor Magharibi mwa Java, aliiambia BBC Indonesia kuwa jumla ya waathiriwa wa sumu iliyorekodiwa kati ya Jumatatu na Jumatano imefikia 1,171.

   Inafuatia kuwekewa sumu kwa wanafunzi 800 wiki iliyopita huko Java Magharibi na majimbo ya Sulawesi ya Kati.

   Rais Prabowo amefanya mpango wa chakula bora, ambao unalenga kutoa chakula cha mchana bila malipo kwa watoto wa shule milioni 80.

   Lakini matukio mengi ya sumu kwenye chakula yamesababisha mashirika yasiyo ya kiserikali kutoa wito kwa mamlaka kusimamisha mpango huo kutokana na wasiwasi wa kiafya.

   Muhaimin Iskandar, Waziri Mratibu wa Uwezeshaji Jamii, alisema Jumatano kwamba "hakuna mipango ya kuizuia".

   Waathiriwa wa hivi karibuni walilalamika kwa maumivu ya tumbo, kizunguzungu, na kichefuchefu, pamoja na changamoto yakupumua, ambayo ni dalili isiyo ya kawaida ya sumu ya chakula.

   Matukio ya awali ya sumu ya chakula vinavyotokana na mpango wa bure wa chakula cha mchana vimetaja utayarishaji wa chakula kizembe kama sababu inayoshukiwa.

   Waathirika wa wiki hii walikula milo iliyojumuisha kuku wa mchuzi wa soya, tofu iliyokaangwa, mboga mboga na matunda, lakini matukio ya hapo awali ya sumu yamehusishwa na mchuzi ulioharibika na, katika kisa kimoja, samaki papa wa kukaanga.

   Mkuu wa Wakala wa Kitaifa wa Lishe wa Indonesia Dadan Hindayana alisema Jumatano kwamba sumu kubwa ya chakula huko Cipongkor wiki iliyopita ilitokana na makosa ya kiufundi ya Kitengo cha Huduma ya Utimilifu wa Lishe (SPPG).

   Operesheni za SPPG huko Cipongkor zimeripotiwa kusitishwa, kulingana na Shirika la Kitaifa la Lishe.

   Kamishna wa West Bandung Jeje Ritchie Ismail alisema chama chake kilitangaza sumu ya watu wengi huko Cipongkor "tukio la ajabu ili tukio hilo lishughulikiwe kwa haraka na kwa kina zaidi".

   Unaweza kusoma;

   Unazijua athari za sumu kuvu katika ugali wako?

   Hatua za kuchukua ikiwa mtu atakula chakula chenye sumu

5. 25 Septemba 2025Nicolas Sarkozy apatikana na hatia ya kula njama ya uhalifu katika kesi ya Libya

   

   Chanzo cha picha, Reuters

   Rais wa zamani wa Ufaransa Nicolas Sarkozy amepatikana na hatia ya kula njama ya uhalifu katika kesi inayohusiana na kuchukua mamilioni ya euro ya fedha haramu kutoka kwa kiongozi wa Libya marehemu Kanali Muammar Gaddafi.

   Mahakama ya jinai ya Paris ilimuondolea mashtaka mengine yote, ikiwa ni pamoja na rushwa na ufadhili haramu wa kampeni.

   Sarkozy, ambaye anadai kesi hiyo ina msukumo wa kisiasa, alituhumiwa kutumia fedha kutoka kwa Gaddafi kufadhili kampeni yake ya uchaguzi wa 2007.

   Badala yake mwendesha mashtaka alidai Sarkozy aliahidi kumsaidia Gaddafi kumpambania kama mshirika na nchi za Magharibi. Sarkozy, 70, alikuwa rais wa Ufaransa kutoka 2007 hadi 2012.

   Uchunguzi huo ulianzishwa mwaka wa 2013, miaka miwili baada ya Saif al-Islam, mtoto wa kiongozi wa wakati huo wa Libya, kwanza kumshutumu Sarkozy kwa kuchukua mamilioni ya pesa za baba yake kwa ufadhili wa kampeni.

   Mwaka uliofuata, mfanyabiashara wa Lebanon Ziad Takieddine, ambaye kwa muda mrefu alikuwa kama mtu kati kati ya Ufaransa na Mashariki ya Kati, alisema alikuwa ameandika uthibitisho kwamba zabuni ya kampeni ya Sarkozy "ilifadhiliwa" na Tripoli, na kwamba malipo ya thamani ya € 50m (£ 43m) yaliendelea baada ya kuwa rais.

   Mkewe Sarkozy, mwanamitindo mkubwa wa zamani na mwimbaji mzaliwa wa Italia, Carla Bruni-Sarkozy, alishtakiwa mwaka jana kwa kuficha ushahidi unaohusishwa na kesi ya Gaddafi na kujihusisha na wahalifu kufanya ulaghai, ambayo yote anakanusha.

   Tangu kupoteza nafasi ya kuchaguliwa tena mwaka wa 2012, Sarkozy amekuwa akilengwa na uchunguzi kadhaa wa uhalifu.

   Unaweza kusoma;

   Nchi sita za Kiarabu: Wote walikuwa wanajeshi na walipoingia madarakani hawakutaka kuondoka hadi vita vikawatimua

   Viongozi watano wa nchi za Kiarabu walioondolewa madarakani tangu 2011

6. 25 Septemba 2025Rwanda na DRC zakubaliana kuanza utekelezaji wa hatua za usalama zilizosimamiwa na Marekani

   

   Chanzo cha picha, White House

   Jamhuri ya Kidemokrasia ya Congo (DRC) na Rwanda zimekubaliana kuanza kutekeleza hatua za kiusalama chini ya makubaliano ya upatanishi wa Marekani mwezi ujao, nchi hizo zilisema katika taarifa yake ya pamoja siku ya Jumatano, katika kile ambacho kitakuwa ni hatua muhimu katika utekelezaji wa makubaliano hayo ya amani huku kukiwa na wasiwasi juu ya ukosefu wa maendeleo.

   Makubaliano hayo yaliyofikiwa katika mkutano wa Washington Septemba 17-18 , yatawezesha kuanza kwa utekelezaji tarehe 1 Oktoba , kwa mujibu wa taarifa ya pamoja, ambayo pia ilitolewa na Marekani, Qatar, Togo na Kamisheni ya Umoja wa Afrika.

   Nchi hizo zilikubali kukamilisha hatua hizo ifikapo mwisho wa mwaka, vyanzo vitatu vinavyofahamu suala hilo vililiambia shirika la habari la Reuters.

   Operesheni za kuondoa tisho hilo kutoka kwa kundi lenye makao yake makuu nchini Congo la Democratic Forces for the Liberation of Rwanda (FDLR) na kuwezesha kuondolewa kwa wanajeshi wa Rwanda zitaanza kati ya Oktoba 21 na 31, kwa mujibu wa vyanzo.

   Ratiba hiyo inatoa tarehe maalum kwa Rwanda na DRC kutekeleza mpango wa amani.

   Mawaziri hao wa mambo ya nje wa Congo na Rwanda walitia saini mkataba wa amani mjini Washington Juni 27 na kukutana siku hiyo hiyo na Rais wa Marekani Donald Trump, ambaye ana nia ya kuchota mabilioni ya dola za uwekezaji wa nchi za Magharibi katika eneo lenye utajiri wa tantalum, dhahabu, kobalti, shaba, lithiamu na madini mengine.

   Unaweza pia kusoma:

   Masuala gani tete kwenye mkataba mpya wa Marekani, DRC na Rwanda?

   Mzozo wa DRC: Rwanda yalaani vikwazo vya Marekani dhidi ya maafisa wake

   'Usuhuba wa Kabila na M23' ni suluhu ya mzozo wa DRC au kivuli kipya cha vita vya muda mrefu?

7. 25 Septemba 2025Mashambulizi ya Marekani dhidi ya boti za dawa za kulevya 'kitendo cha dhuluma' - Rais wa Colombia

   

   Mashambulizi ya anga ya Marekani dhidi ya boti zinazodaiwa kusafirisha dawa za kulevya katika Bahari ya Caribbea ni "kitendo cha dhuluma",

   Rais wa Colombia Gustavo Petro aliambia BBC katika mahojiano akitoa wito wa maafisa wa Marekani kufunguliwa mashtaka ya jinai ikiwa uchunguzi utabaini kuwa raia wa Colombia waliuawa katika mashambulizi hayo.

   Rais Donald Trump ameyataja mashambulizi hayo, ambayo yameripotiwa kuwaua 17 tangu yaanze mwezi huu, kama hatua ya kukomesha mtiririko wa wa dawa aina ya fentanyl na mihadarati mingine nchini Marekani.

   Wataalamu wa sheria na wabunge, hata hivyo, wamehoji ikiwa wanakiuka sheria za kimataifa za haki za binadamu.

   "Kwa nini utumia kombora ikiwa unaweza kusimamisha boti kuwakamata wafanyakazi?" Alisema Petro. Vinginevyo "Hayo ni mauaji."

   Akizungumza na BBC siku ya Jumatano, Petro alisema "watu wasiuawa" katika katika operesheni ta kukabiliana na boti za mwendo kasi zinazoaminika kuhusika na ulanguzi wa dawa za kulevya.

   Soma pia:

8. 25 Septemba 2025Trump ataka uchunguzi ufanyike kuhusu 'hujuma' anazodai kufanyiwa Umoja wa Mataifa

   

   Chanzo cha picha, Getty Images

   Donald Trump ametaka uchunguzi ufanyike kuhusu kile alichokiita "hujuma tatu" wakati wa ziara yake kwenye Baraza Kuu la Umoja wa Mataifa siku ya Jumatano.

   Katika chapisho kwenye mtandao wa kijamii, rais wa Marekani alitaja tukio la ngazi inayotumia umeme kukwama akiwa na mkewe Melania Trump, kuharibika kwa kifaa cha kumwezeha kusoma hotuba yake, na suala la kusikika kwenye ukumbi kama hujuma.

   Afisa wa Umoja wa Mataifa alisema mfumo huo wa sauti uliundwa ili kuwawezesha watu kusikia hotuba zilizotafsiriwa kupitia visikizi.

   Trump aliangazia matukio hayo kwenye mtandao wake wa Truth Social na kuongeza kuwa atamuandikia Katibu Mkuu wa Umoja wa Mataifa Antonio Guterres kuomba uchunguzi kuanzishwa mara moja.

   "Kilichofanyika jana katika Mkutano wa Umoja wa Mataifa ni FEDHEHA - Sio mara moja, au mbwili, bali mara matatu!" aliandika.

   "Hii haikuwa bahati mbaya, hii ilikuwa hujuma ya wazi katika ofisi za Umoja wa Mataifa. Wanapaswa kuona haya."

   Pia alitoa wito wa kukamatwa kwa watu waliohusika na tukio la kukwama kwa ngazi, akigusia taarifa ya gazeti la Times ambayo ilisema wafanyakazi wa Umoja wa Mataifa walitania kuhusu kuzima ngazi.

   "Hii ilikuwa hujuma ya wazi... Kanda zote za usalama kwenye sehemu ya ngazi ya kuingia kwenue jengo hilo zinapaswa kuhifadhiwa, hasa kitufe cha kusimamisha ngazi kwa dharura," Trump aliongeza.

   Balozi wa Marekani katika Umoja wa Mataifa, Mike Waltz, aliunga mkono wito wa rais wa uchunguzi rasmi, akisema matukio hayo "hayakubaliki".

9. 25 Septemba 2025'Rais Tshisekedi hajui mauaji ya halaiki ni nini' - Waziri wa mambo ya nje wa Rwanda

   

   Chanzo cha picha, Reuters

   Waziri wa Mambo ya Nje wa Rwanda amejibu matamshi yaliyotolewa na Rais wa Jamhuri ya Kidemokrasia ya Kongo katika Baraza Kuu la Umoja wa Mataifa.

   Katika hotuba hiyo, Rais Felix Tshisekedi kwa mara nyingine alisema amerejea vitani vikosi vya serikali yake vinapambana na waasi wa M23 mashariki mwa Congo.

   Tshisekedi alitangaza kwamba kinachofanywa kwa watu wa Kivu Kusini na Kaskazini ni ''mauaji ya halaiki''.

   Waziri Olivier Nduhungirehe, katika mahojiano na BBC, alisema kuwa Rais Tshisekedi 'hajui kuhusu mauaji ya kimbari.'

   Rais Tshisekedi pia aliishutumu Rwanda kwa kutoheshimu azimio la Umoja wa Mataifa na makubaliano yaliyotiwa saini mjini Washington, na kuiamuru kuwaondoa wanajeshi wake katika ardhi ya Congo, na kuacha kutoa msaada kwa M23.

   Lakini Olivier Nduhungirehe anasema licha ya ombi lake bado anafanya kazi na FDLR ambayo alitakiwa kuiondoa kwanza ili Rwanda nayo iondoe hatua za kiusalama ilizoziweka kwa kundi hilo. Anamtaka Tschesekedi asome tena Mkataba wa Washington kwa umakini.

   Unaweza pia usoma:

   Mahakama DRC yaombwa Joseph Kabila ahukumiwe kifo kwa tuhuma ukiwemo uhaini

   Jinsi Trump anavyotaka Marekani kunufaika kutokana na mkataba wa amani wa Congo

   Masuala gani tete kwenye mkataba mpya wa Marekani, DRC na Rwanda?

10. 25 Septemba 2025Rais wa zamani wa Malawi Peter Mutharika mwenye umri wa miaka 85 ashinda uchaguzi wa rais

    

    Chanzo cha picha, AFP via Getty Images

    Wapiga kura wamemkataa rais wa sasa Lazarus Chakwera baada ya muhula mmoja madarakani wa miaka mitano ambapo walishuhudia mgogoro mbaya mno wa kiuchumi.

    Tume ya uchaguzi ya Malawi ilimtangaza Mutharika kuwa mshindi wa uchaguzi huo kwa asilimia 56 huku Chakwera akipata asilimia 33.

    Awali, Bwana Chakwera alikubali kushindwa na kusema anataka kukabidhi madaraka kwa njia ya amani.

    Katika hotuba yake, Chakwera alitambua matokeo ya kura za awali, jambo ambalo lilionyesha mpinzani wake Peter Mutharika alikuwa ameongoza kwa kiasi kikubwa.

    "Ninajua kwamba kwa wengi wenu mliopiga kura, matokeo haya ni taswira ya nia yenu ya pamoja ya kuwa na mabadiliko ya serikali na hivyo ni sawa kukubali kushindwa kutokana na kuheshimu matakwa yenu kama raia," aliwaambia Wamalawi.

    Chakwera anasema amempigia simu Mutharika kumpongeza kwa "ushindi wake wa kihistoria".

    Alithibitisha kuwa alifika mahakamani jana kujaribu kuzuia matokeo yasitangazwe lakini akasema anakubali uamuzi wa mahakama kwamba tume ya uchaguzi lazima iendelee na kutangaza matokeo.

    Chakwera pia alisema: "Wamalawi, kama mko upande wa kushindwa au kushinda, tafadhali muwe na amani."

11. 25 Septemba 2025Rihanna na A$AP Rocky wamkaribisha binti yao wa kwanza

    

    Chanzo cha picha, Getty Images

    Mwanamuziki maarufu wa Pop, Rihanna amejifungua mtoto wake wa tatu, wa kike, na mpenzi wake A$AP Rocky.

    Mtoto amepewa jina la kisanii la babake - isipokua herufi moja

    Rocki Irish Mayers alizaliwa tarehe 13 Septemba, muimbaji huyo alitangaza katika chapisho la Instagram, akishiriki picha ya akimkumbatia binti yake pamoja na picha ya glovu ndogo za ndondi za waridi.

    Wanandoa hao, ambao pia wana watoto wawili wa kiume Riot na RZA, walitangaza ujauzito wa hivi punde zaidi wa Rihanna kwenye Met Gala ya mwaka huu.

    Mashabiki wamefurahishwa na tangazo hilo la kuzaliwa kwenye mitandao ya kijamii, huku chapisho hilo likiongeza likes zaidi ya milioni 5 ndani ya saa mbili.

    Wiki kadhaa zilizopita, mtu mashuhuri mzaliwa wa Barbados, ambaye jina lake halisi ni Robyn Fenty, pia alisherehekea miaka 20 tangu kutolewa kwa albamu yake ya kwanza.

    Habari hii ilifikiwa na wafuasi kwa pongezi na madai kwa mradi wake ujao. Imekuwa chini ya muongo mmoja tu tangu albamu yake ya hivi majuzi, Anti.

    Wakati huo, Rihanna amezindua biashara nyingi, ikiwa ni pamoja na aina yake ya urembo maarufu ya Fenty Beauty na kampuni ya nguo za ndani. Thamani ya mchezaji huyo mwenye umri wa miaka 37 imekadiriwa na Forbes kuwa zaidi ya dola bilioni moja.

    Mwanamitindo na mrembo alipotangaza ujauzito wake kwa mara ya kwanza kwenye zulia la bluu la Met Gala mwezi wa Mei, alivalia vazi lililokuwa likilingana na mapema yake.

    "Ni wakati wa kuwaonyesha watu tu kile tulichokuwa tukijiandaa nacho," Rihanna aliwaambia waandishi wa habari.

    Unaweza pia kusoma:

    Maandamano India: Ujumbe wa Rihanna wazua hisi kali huku serikali ikimshutumu

    Rihanna awapatia wasichana wa Malawi baiskeli za kwenda shule

    Mwanamziki Rihanna aingia orodha ya 'matajiri' ya Sunday Times

12. 25 Septemba 2025Muungano wa Ulaya wapanga kusitisha ulinzi wa muda kwa Waukraine waliokimbia vita

    

    Chanzo cha picha, Getty Images

    Baraza la Muungano wa Ulaya EU limeidhinisha mapendekezo rasmi kwa nchi wanachama juu ya jinsi ya kumaliza ulinzi wa muda ambao Umoja wa Ulaya unautoa kwa Waukraine kwa sababu ya uchokozi wa Urusi baada ya vita

    Rasimu hiyoinatoa mfumo wa pamoja ambao nchi binafsi zitasitisha ulinzi wa muda kwa njia yao wenyewe - kama vile mfumo huu umekuwepo tangu 2022. Mnamo Juni 2025, EU iliongeza ulinzi wake kwa Waukraine hadi Machi 2027.

    Inasisitiza kuwa lengo lake ni kuandaa kurudi kwa ufanisi kwa Waukraine nyumbani na kuunganishwa kwao kwa mafanikio lakini tu baada ya "masharti kuruhusu."

    Kwa kuongezea, pia inalenga kukuza uwezekano wa nchi za EU kukuza njia zao za kutoa vibali vya makazi kwa wale Waukraine ambao wanatimiza masharti fulani.

    "Ingawa ulinzi wa muda unasalia kuwa ushahidi wa mshikamano wa Muungano na watu wa Ukraine, kwa asili yake ni wa muda mfupi," mapendekezo yanasema. "Kwa hivyo, ni muhimu kuandaa mpito wa taratibu, endelevu na ulioratibiwa vyema kutoka kwa hali hii hadi hali nchini Ukraine iwe nzuri kwa kukomesha ulinzi wa muda, kwa kuzingatia uwezo na mahitaji ya ujenzi wa Ukraine."

    Wakati huo huo, EU ilibaini kuwa uchokozi kamili wa Urusi dhidi ya Ukraine kwa sasa unaendelea kwa nguvu kamili. Kwa hivyo, msaada wa EU kwa Ukraine bado ni thabiti.

    Unaweza kusoma:

    Namna Ulaya inavyojiandaa na mashambulizi ya Urusi mpakani

    Fahamu kombora jipya la Ukraine lenye uwezo wa kubeba tani ya vilipuzi, likitishia jeshi ya Urusi

    Mambo muhimu katika mazungumzo ya Trump na Zelensky huko Washington

13. 25 Septemba 2025Hujambo na karibu kwa matangazo haya ya mubashara tukikuletea habari za kikanda na kimataifa, shukran kwa kuwa nasi.