Putin yuko tayari kufaidika na vita vya Israel na Gaza, asema Steve Rosenberg

Na Steve Rosenberg

Mhariri wa Urusi

Inavutia kumtazama Vladimir Putin kama mhalifu wa au mwenye uwezo kama wa James Bond aliyeketi kwenye skrini kubwa la kudhibiti, katika maficho ya milimani, akizua machafuko kote ulimwenguni.

Anabonyeza kitufe kimoja na kuna machafuko katika Balkan.

Anabonyeza kingine na Mashariki ya Kati inalipuka.

Inavutia… lakini labda sio sahihi. Inatia chumvi ushawishi wa kimataifa wa kiongozi huyo wa Kremlin.

Ndiyo, Urusi ina uhusiano na Hamas na imekuwa mshirika wa karibu wa Iran. Kulingana na Marekani, Moscow na Tehran sasa wana ushirikiano kamili wa ulinzi.

Lakini hiyo haimaanishi kuwa Moscow ilihusika moja kwa moja, au kufahamu mapema shambulio la Hamas dhidi ya Israel.

"Hatuamini kwamba Urusi ilihusika kwa njia yoyote," balozi wa Israel huko Moscow, Alexander Ben Zvi, aliliambia gazeti la Kommersant wiki hii, na kuongeza kuwa ni "upuuzi mtupu" kupendekeza kuna uhusiano wa Urusi na ukatili unaofanywa na Hamas katika Israeli.

"Sijaona ushahidi wowote wa usambazaji wa silaha za moja kwa moja wa Urusi kwa Hamas, au wa waendeshaji wa mafunzo ya kijeshi wa Urusi wa Hamas," anasema Hanna Notte, mtaalam mwenye makao yake mjini Berlin kuhusu Urusi na Mashariki ya Kati katika Kituo cha James Martin cha Mafunzo ya Kuzuia Uenezaji wa silaha.

"Ni kweli kwamba Urusi ina uhusiano wa muda mrefu na Hamas. Urusi haijawahi kutangaza Hamas kuwa shirika la kigaidi. Wajumbe wa Hamas walikuwa Moscow mwaka jana na mwaka huu.

"Lakini sidhani kwamba kumekuwa na usaidizi mkubwa wa kijeshi. Ingawa tunajua kwamba mifumo iliyotengenezwa na Urusi iliingia kwenye ukanda wa Gaza, pengine kupitia Sinai [nchini Misri] na kwa usaidizi wa Iran."

Kwa maneno mengine, Rais Putin hakubonyeza kitufe kilichoandikwa "Vita vya Mashariki ya Kati".

Lakini yuko tayari kunufaika?

Kabisa. Na hapa ni jinsi gani.

Usumbufu kutoka Ukraine

Huku kuongezeka kwa ghasia katika Mashariki ya Kati kukitawala ajenda ya habari ya kimataifa, Moscow inategemea vichwa vya habari vya kushangaza kutoka Israeli ili kuondoa macho kutoka kwa vita vya Urusi nchini Ukraine.

Lakini hii ni zaidi ya kubadilisha tu mzunguko wa habari. Mamlaka ya Urusi pia inatumai kuwa, kutokana na hali ilivyo katika Mashariki ya Kati, baadhi ya silaha za Magharibi kwa Ukraine zitaelekezwa tena kwa Israel.

"Ninaamini mgogoro huu utaathiri moja kwa moja mwendo wa operesheni maalum ya kijeshi [nchini Ukraine]," mwanadiplomasia wa Urusi Konstantin Gavrilov aliliambia gazeti la pro-Kremlin Izvestia.

"Wafadhili wa Ukraine watakatishwa tamaa na mzozo wa Israel. Hiyo haimaanishi kwamba nchi za Magharibi zitawaacha Waukraine. Lakini kiasi cha misaada ya kijeshi kitapungua….na mwenendo wa operesheni hiyo unaweza kugeuka kwa upande wa [Urusi]. "

Ndoto ya mchana kwa Urusi? Inawezekana kabisa.

"Tunaweza na tutasimama na Israel, hata tunaposimama upande wa Ukraine," Waziri wa Ulinzi wa Marekani Lloyd Austin katika mkutano wa mawaziri wa ulinzi wa Nato.

Lakini mzozo wa muda mrefu katika Mashariki ya Kati utajaribu uwezo wa Amerika kusaidia wakati huo huo washirika wawili katika vita viwili tofauti.

Mengi zaidi kuhusu mzozo wa Israel-Gaza

Fuatilia moja kwa moja:Matukio ya hivi punde na kinachoendelea

Mauaji ya Kibbutz:Jinsi Hamas walivyofanya shambulio lisilofikirika

Uchambuzi:Je, uvamizi wa ardhini wa Israel dhidi ya Gaza unaweza kuafikia malengo yake?

Historia:Masuala muhimu unayopaswa kujua kuhusu mzozo kati ya Israel na Palestina

Kiini cha mzozo:Fahamu chanzo cha uhasama kati ya Israel na Palestina

Hamas:Lifahamu kundi la wapiganaji wa Palestina lililoivamia Israel kupitia angani, baharini na nchi kavu

Mossad:Mbinu ,mikakati na kuwatumia wanawake katika shirika la ujasusi la Israel walipa ufanisi katika operesheni zake

Urusi mpatanishi?

Urusi inajaribu kuongeza ushawishi wake katika Mashariki ya Kati kwa kujipanga kama mtu anayeweza kuleta amani.

Imekuwa katika jukumu hilo hapo awali, ikijiunga na juhudi za zamani za kimataifa kumaliza mzozo katika eneo hilo.

"Urusi inaweza na itachukua jukumu katika utatuzi [wa mzozo]," msemaji wa Rais Putin Dmitry Peskov alisema. "Tunadumisha mawasiliano na pande zote katika mzozo."

Akiwa ziarani mjini Moscow wiki hii, waziri mkuu wa Iraq alitoa wito kwa Rais Putin "kutangaza mpango wa kusitisha mapigano ya kweli" katika eneo hilo.

Urusi mpatanishi wa amani? Hiyo ni ngumu kuaminika.

Baada ya yote, hii ndiyo nchi ambayo ilizindua uvamizi kamili wa jirani yake. Baada ya karibu miezi 20, vita vya Urusi nchini Ukraine vimesababisha vifo na uharibifu kwa kiwango ambacho kimeshangaza ulimwengu.

Zaidi ya hayo, kusema "unaweza na utachukua jukumu" katika kupata amani hakuhakikishi kwamba wale wanaohusika katika mzozo watakukubali kama mpatanishi.

Moscow kwa muda mrefu imekuwa na nia ya Mashariki ya Kati, na Umoja wa Kisovyeti kupitisha msimamo wa kuunga mkono Waarabu kama Israeli ilianzisha uhusiano wa karibu na Marekani. Kwa miaka mingi chuki iliyofadhiliwa na serikali ilikuwa sehemu ya maisha ya Soviet.

Baada ya kuvunjika kwa milki ya Kisovieti mahusiano ya Urusi na Israeli yaliboreka, kwa kiasi fulani kwa sababu ya mmiminiko wa Wayahudi zaidi ya milioni moja kwenda Israeli kutoka jamhuri za zamani za Sovieti.

Lakini hivi majuzi zaidi Urusi ya Vladimir Putin imejisogeza karibu na maadui wa Israel, hasa Iran - na kuuweka uhusiano wa Russia na Israel chini ya matatizo.

Kulaani Amerika

Kremlin inapeleleza fursa hapa kufanya kile inachofanya tayari - kulaumu Amerika.

Tangu shambulio la Hamas dhidi ya Israel, ujumbe mkuu wa Vladimir Putin umekuwa kwamba "huu ni mfano wa kushindwa kwa sera ya Marekani katika Mashariki ya Kati".

Inalingana na muundo wa jumla wa Moscow kushambulia kile inachokiita "Sera mbovu za Marekani".

Na kutunga Amerika kama mhusika mkuu katika Mashariki ya Kati ni njia ya Kremlin ya kuimarisha msimamo wa Urusi katika eneo hilo kwa hasara ya Washington.

Kufikia sasa nimezungumza juu ya faida zinazowezekana kwa Urusi kutoka kwa matukio ya Mashariki ya Kati. Lakini kuna hatari pia.

"Ukosefu wa utulivu uliodhibitiwa kwa uangalifu ndio unaoitumikia Urusi vyema," anaamini Hanna Notte.

"Ikiwa mzozo huu utaondoa umakini kutoka kwa Ukraine - na kuna hatari ya kweli, kwa kuzingatia umuhimu wa Israeli katika muktadha wa kisiasa wa ndani wa Amerika - ndio, Urusi inaweza kuwa mnufaika wa muda mfupi."

Lakini Urusi isingenufaika kutokana na vita vinavyoendelea katika eneo hilo pana, ikiwa ni pamoja na Iran ambayo inatoa silaha na fedha kwa Hamas, Bi Notte anasema.

"Urusi haitaki vita kamili kati ya Israel na Iran. Ikiwa mambo yataelekea huko, na ikawa wazi Amerika inashuka kwa nguvu upande wa Israel, nadhani Urusi haitakuwa na budi ila kuegemea zaidi upande wa Iran. Sina hakika kama inataka hilo.

"Nadhani Putin bado anathamini uhusiano wake na Israel. Sidhani diplomasia ya Urusi inataka kuhamia katika nafasi hiyo ambapo inabidi kuchagua upande. Lakini kadiri mzozo huu unavyoongezeka, ndivyo wanavyoweza kuhisi shinikizo."