Makaburi ya Urusi ya wafungwa wa jeshi la Wagner waliokufa vitani Ukraine yafichuliwa

Mwishoni mwa kiangazi kilichopita, shamba lililo pembezoni mwa jumuiya ndogo ya wakulima kusini mwa Urusi lilianza kujaa makaburi mapya ya wapiganaji waliouawa nchini Ukraine.

Sehemu za kupumzikia zilipambwa kwa misalaba rahisi ya mbao na maua ya rangi angavu ambayo yalikuwa na alama ya Kikundi cha Wagner cha Urusi - jeshi la kibinafsi linaloogopwa na lenye usiri mkubwa.

Kulikuwa na karibu makaburi 200 katika eneo lililopo nje kidogo ya kijiji cha Bakinskaya katika mkoa wa Krasnodar wakati Reuters ilipotembelea mwishoni mwa Januari.

Shirika la habari lililinganisha majina ya angalau wanajeshi 39 waliofariki hapa na katika makaburi mengine matatu ya karibu na rekodi za mahakama ya Urusi, hifadhi data zinazopatikana hadharani na akaunti za mitandao ya kijamii. Reuters pia ilizungumza na familia, marafiki na mawakili wa baadhi ya waliofariki.

Wanaume wengi waliozikwa huko Bakinskaya walikuwa wafungwa ambao waliajiriwa na Wagner mwaka jana baada ya mwanzilishi wake, Yevgeny Prigozhin, kuahidi msamaha ikiwa wafungwa wangenusurika kwa miezi sita mbele, ripoti hii ilionyesha. Walijumuisha muuaji wa kandarasi, wauaji, wahalifu na watu wenye matatizo ya kunywa pombe.

Kwa miezi kadhaa, Wagner wamekuwa katika vita vya umwagaji damu vya kuteka miji ya Bakhmut na Soledar katika mkoa wa Donetsk mashariki mwa Ukraine. Maafisa wa nchi za Magharibi na Ukraine wamesema kuwa inawatumia wafungwa kama lishe ya mizinga ili kulemea ulinzi wa Ukraine.

Vikwazo vikali kwa Wagner mwezi huu, msemaji wa usalama wa taifa wa White House John Kirby alitaja kundi hilo kama "shirika la uhalifu ambalo linafanya ukatili na ukiukaji wa haki za binadamu." Katika jibu fupi la wazi kwa serikali ya Marekani, Prigozhin alimwomba Kirby "tafadhali afafanue ni uhalifu gani ulifanywa" na Wagner.

Video na picha za makaburi zilionekana mara ya kwanza kwenye mitandao ya kijamii katika eneo la Krasnodar mnamo Desemba. Reuters ilifanikiwa kubaini chanzo chake katika makaburi ya Bakinskaya na kukagua picha za setilaiti za tovuti kutoka Maxar Technologies na Capella Space.

Picha za satelaiti zinaonyesha kuwa ardhi hiyo ya Wagner ilikuwa tupu wakati wa kiangazi, ilikuwa na safu tatu za makaburi hadi mwisho wa Novemba na ilikuwa robo tatu imejaa mapema Januari. Kipande chote cha ardhi kilitumika kufikia tarehe 24 Januari.

Mwanaharakati wa eneo hilo Vitaly Votanovsky, ambaye alichukua picha za kwanza na ameweka kumbukumbu za wanajeshi waliouawa nchini Ukraine na kuzikwa katika makaburi ya mkoa wa Krasnodar, aliliambia shirika la habari la Reuters kwamba aliona lori likishusha miili kwenye makaburi.

Alisema wachimba kaburi walimwambia miili hiyo ilitoka katika mji wa Urusi wa Rostov-on-Don, karibu na mpaka wa Urusi na mkoa wa Donetsk. Wakati shirika la habari la Reuters lilipotembelea makaburi hayo mwezi Januari, uzio na kamera za usalama zilikuwa zikiwekwa karibu na shamba hilo na mazishi mengine yalikuwa yakiendelea.

Shirika la habari la serikali ya Urusi RIA Novosti lilichapisha picha mapema Januari ya Prigozhin akitembelea makaburi hayo, akiweka maua kwenye kaburi moja.

Aliambia vyombo vya habari vya ndani kwamba wanaume waliozikwa hapo walikuwa wameonyesha nia ya kuzikwa kwenye kanisa la Wagner nje ya mji wa karibu wa Goryachiy Klyuch, badala ya miili yao kurejeshwa kwa jamaa zao.

Ardhi ya Bakinskaya ilitolewa na viongozi wa eneo hilo, alisema, baada ya kanisa kukosa nafasi. Mnamo mwaka wa 2019, Reuters iliripoti juu ya uwepo wa kambi za mafunzo ya Wagner katika kijiji cha Molkino, karibu maili 5 (kilomita 9) kutoka Bakinskaya.

Kati ya wafungwa 39 waliotambuliwa na Reuters, 10 walikuwa wamefungwa kwa mauaji au kuua bila kukusudia, 24 kwa wizi na wawili kwa kudhuru mwili. Uhalifu mwingine ulijumuisha utengenezaji au biashara ya dawa za kulevya na ulaghai. Miongoni mwa waliohukumiwa walikuwa raia wa Ukrainia, Moldova, na eneo lililojitenga la Georgia la Abkhazia linaloungwa mkono na Urusi.

Tangu mwanzo wa vita vya Urusi huko Ukraine, Kundi la Wagner lililokuwa la kisiri pamoja na mwanzilishi wake Prigozhin walianza kuonekana hadharani.

Hapo awali, wapiganaji wa Wagner walitumwa Syria, Libya na Jamhuri ya Afrika ya Kati kuunga mkono washirika wa Urusi.

 Prigozhin, anayejulikana nchini Urusi kama "mpishi wa Putin" kwa sababu ya mikataba yake ya upishi ya Kremlin, mara kwa mara alikataa uhusiano wowote na Wagner. Kisha, Septemba iliyopita, alithibitisha kwamba alianzisha jeshi la kibinafsi, ambalo alilitaja kuwa “kundi la wazalendo.”

Tangu wakati huo, Prigozhin ametembelea mara kwa mara katika Eneo la mstari wa mbele la vita mashariki mwa Ukraine, huku pia akikosoa uongozi wa kijeshi wa Urusi na baadhi ya maafisa waandamizi, na binafsi akiongoza harakati za kuajiri wapiganaji kutoka kwa mfumo wa adhabu unaoenea wa Urusi.

Mwezi uliopita, shirika la habari la Reuters liliripoti kuwa jumuiya ya kijasusi ya Marekani inaamini kwamba kundi la Wagner lilikuwa na takriban wafungwa 40,000 waliotumwa nchini Ukraine kufikia mwezi wa Disemba, wakihesabu idadi kubwa ya wafanyakazi wa Wagner nchini humo.

Wagner hajatoa maoni kuhusu takwimu hiyo au kutoa taarifa yoyote kuhusu nambari za wapiganaji. Katika ujumbe wa video wa Januari 14, kwa mujibu wa Reuters , Prigozhin aliliezea Wagner kama jeshi huru kabisa lenye ndege zake, mizinga, roketi na vifaru. "Pengine ni jeshi lenye uzoefu zaidi ambalo lipo ulimwenguni leo," alisema.

Wahalifu na wanywaji pombe

Baadhi ya wafungwa waliotambuliwa na Reuters walikuwa wahalifu ambao walikuwa wamekaa gerezani muda mwingi wa maisha yao ya utu uzima au walikuwa wanakabiliwa na vifungo virefu.

Karatasi za mahakama zilizopitiwa upya na Reuters pia zinaonyesha wanaume ambao walikuwa wametatizika na unywaji wa.

Majina ya wengine yako kwenye orodha nyeusi za benki, na walidaiwa kuhusika na mashtaka ya kifedha .