Orodha ya waandishi wa habari waliouawa katika vita vya Hamas na Israel

Idadi ya waliofariki kutokana na mashambulizi ya Israel kwenye mji wa Gaza inazidi 14,128, wakiwemo watoto zaidi ya 5,000, kwa mujibu wa Wizara ya Afya katika Ukanda wa Gaza, huku Israel ikitangaza idadi yake ya vifo ni 1,200.

Vita vinavyoendelea vimechukua maisha ya watu wengi - wakiwemo waandishi wa habari. Zaidi ya waandishi wa habari 53 na wafanyakazi wa vyombo vya habari wameuawa, kwa mujibu wa Kamati ya Kulinda Waandishi wa Habari.

Kwa mujibu wa Kamati ya Kulinda Waandishi wa Habari, waandishi wa habari 53 waliuawa kuanzia Novemba 7 hadi 22: Wapalestina 46, Waisraeli wanne, Walebanon watatu, na waandishi wa habari 11 waliripotiwa kujeruhiwa, watatu walipotea, na wengine 18 waliwekwa kizuizini.

Waandishi waliouawa Gaza

Ayat Khadura

Ni mwandishi wa habari wa kujitegemea na mtangazaji wa kipindi cha mtandaoni, aliuawa Novemba 20, pamoja na watu kadhaa wa familia yake, katika shambulio la anga la Israel nyumbani kwake Beit Lahia, kaskazini mwa Gaza.

Alaa Taher Al-Hasanat

Alaa Taher Al-Hasanat, mwandishi wa habari na mtangazaji wa shirika la habari la Al-Majdat, aliuawa Novemba 20, pamoja na wanafamilia yake, katika shambulio la anga la Israeli nyumbani kwake katika Ukanda wa Gaza.

Bilal Jadallah

Mwandishi wa habari na Mwenyekiti wa Bodi ya Wakurugenzi ya Press House, aliuawa Novemba 19, katika shambulio la anga la Israel akiwa ndani ya gari lake.

Abdel Halim Awad

Abdel Halim Awad, mfanyakazi wa kituo cha televisheni cha Al-Aqsa, aliuawa tarehe 18 Novemba, katika shambulio la anga katika nyumba yake katika Ukanda wa Gaza.

Sari Mansour

Sari Mansour, Mkurugenzi wa Shirika la Habari la Quds, aliuawa tarehe 18 Novemba katika shambulio la anga la Israel kwenye kambi ya wakimbizi ya Bureij katikati mwa Ukanda wa Gaza.

Hassouna Slim

Mpiga picha na mwandishi wa habari wa kujitegemea, aliuawa tarehe 18 Novemba katika shambulio la anga la Israel kwenye kambi ya wakimbizi ya Bureij katika yaUkanda wa kati wa Gaza pamoja na rafiki yake Sari Mansour.

Mustafa Al-Sawaf

Mwandishi habari na mchambuzi Mustafa Al-Sawaf aliuawa pamoja na mkewe na watoto wake wawili, Novemba 18 katika uvamizi wa Israeli kwenye nyumba yake katika eneo la Shawa huko Gaza City.

Amr Abu Hayya

Amr Abu Hayya, mhandisi wa matangazo katika kituo cha televisheni cha Al-Aqsa, aliuawa tarehe 18 Novemba katika uvamizi wa Israel huko Ukanda wa Gaza.

Musab Ashour

Musab Ashour, mpiga picha aliuawa katika shambulizi katika kambi ya wakimbizi ya Nuseirat, na kifo chake kilitangazwa Novemba 18 baada ya mwili wake kutambuliwa.

Ahmed Fatima

Mpiga picha wa Idhaa ya Cairo na mwanachama wa shirika la Press House, aliuawa Novemba 13, katika shambulizi ndani ya Ukanda wa Gaza.

Jacob Al-Barsh

Yacoub Al-Barash, mkurugenzi mtendaji wa Namaa Radio, aliuawa Novemba 13, kutokana na majeraha aliyoyapata katika shambulio la anga la Israel nyumbani kwake kaskazini mwa Gaza siku moja kabla ya kifo chake.

Ahmed Mahmoud Al-Qara

Mpiga picha na mhadhiri wa uwandishi wa habari habari katika Chuo Kikuu cha Al-Aqsa, aliuawa Novemba 10, katika shambulizi katika mji wa Khuza’a, mashariki mwa Khan Yunis - Ukanda wa Gaza.

Yahya Abu Manea

Mwandishi wa habari wa Al-Aqsa Radio, aliuawa Novemba 7, katika shambulio la anga huko Ukanda wa Gaza.

Muhammad Abu Hasira

Mwandishi wa habari wa shirika la habari la Wafa la Palestina, aliuawa tarehe 7 Novemba, pamoja na watu 42 wa familia yake, katika shambulio la anga katika nyumba yake Ukanda wa Gaza.

Muhammad Al-Jaja

Mwandishi wa habari na mshauri katika shirika la Press House, aliuawa Novemba 5, pamoja na mkewe na binti zake wawili katika shambulio la anga la Israeli kwenye nyumba yao katika kitongoji cha Al-Nasr kaskazini mwa Ukanda wa Gaza.

Muhammad Abu Hatab

Mwandishi wa Televisheni ya Palestina, aliuawa Novemba 2, pamoja na watu 11 wa familia yake, katika shambulio la anga la Israeli kwenye nyumba yao huko Khan Yunis kusini mwa Ukanda wa Gaza.

Majd Fadl Arands

Mwandishi wa habari wa tovuti ya habari ya Al-Jamahir, aliuawa tarehe 1 Novemba katika shambulio la anga la Israel kwenye kambi ya wakimbizi ya Nuseirat huko Gaza.

Iyad Matar

Iyad Matar, mwandishi wa habari wa kituo cha televisheni cha Al-Aqsa, aliuawa tarehe 1 Novemba, pamoja na mama yake, katika shambulio la anga la Israel katika Ukanda wa Gaza.

Imad Al-Wahidi

Msimamizi wa Televisheni ya Palestina, aliuawa Oktoba 31, pamoja na watu kadhaa wa familia yake, katika shambulio la anga la Israel katika Ukanda wa Gaza.

Majid Kishko

Mkuu wa Televisheni ya Palestina, aliuawa Oktoba 31, pamoja na watu kadhaa wa familia yake, katika shambulio la anga la Israel katika Ukanda wa Gaza.

Nazimi El Nadeem

Mwandishi habari na msimamizi wa Televisheni ya Palestina, aliuawa Oktoba 30, na baadhi ya watu wa familia yake katika shambulio la anga nyumbani kwake katika eneo la Al-Zaytoun, mashariki mwa Gaza.

Yasser Abu Namous

Mwandishi wa habari wa Sahel Media Foundation, aliuawa Oktoba 27, pamoja na mama yake, katika shambulio la anga kwenye nyumba ya familia yake huko Khan Yunis katika Ukanda wa Gaza.

Doaa Sharaf

Mwandishi wa habari wa Al-Aqsa Radio, aliuawa Oktoba 26, pamoja na mtoto wake wa kiume, katika shambulio la anga la Israel nyumbani kwake Yarmouk katika mji wa Gaza.

Salma Mukhaimer

Mwandishi wa habari wa kujitegemea, aliuawa Oktoba 25, pamoja na mtoto wake mchanga, baba yake, mama yake, na watu kadhaa wa familia yake, katika shambulio la anga la Israel katika mji wa Rafah kusini mwa Ukanda wa Gaza.

Salma 31 anaishi katika mji mkuu wa Jordan, Amman, alikwenda Ukanda wa Gaza kuoana familia yake, na ikawa ziara yake ya mwisho.

Muhammad Imad Labad

Labad, 27 ni mwandishi wa habari wa tovuti ya Al-Resala, aliuawa Oktoba 23 katika shambulio la anga la Israel katika kitongoji cha Sheikh Radwan katika Jiji la Gaza.

Rushd Sarraj (31)

Mwanzilishi wa Ain Media, aliuawa Oktoba 23 katika shambulio la anga la Israel kwenye mji wa Gaza, akiwaacha nyuma mkewe na bintiye, ambaye bado hajafikisha mwaka mmoja.

Mohamed Ali

Mwandishi wa habari wa kituo cha redio cha Al-Shabab, aliuawa Oktoba 20 katika shambulio la anga la Israel kaskazini mwa Ukanda wa Gaza.

Khalil Abu Adha

Mpiga picha wa Televisheni ya Al-Aqsa, aliuawa pamoja na kaka yake Oktoba 19 katika shambulio la anga la Israeli huko Rafah kusini mwa Ukanda wa Gaza.

Samih Al-Nadi

Ni mkurugenzi wa Al-Aqsa TV mwenye umri wa miaka 55, aliuawa Oktoba 18 katika shambulio la anga la Israel kwenye Ukanda wa Gaza.

Muhammad Baalousha

Mwandishi wa habari na mhasibu mkuu wa idhaa ya Palestine Today, aliuawa pamoja na familia yake, Oktoba 17 katika shambulio la anga la Israel kwenye kitongoji cha Safawi kaskazini mwa Gaza.

Issam Bahar

Mwandishi wa habari wa kituo cha televisheni cha Al-Aqsa, aliuawa pamoja na mkewe Oktoba 17 katika shambulio la anga la Israel kaskazini mwa Ukanda wa Gaza, na baadhi ya wanafamilia pia waliuawa na kujeruhiwa.

Abdul Hadi Habib

Mwandishi wa habari wa UNRWA, aliuawa na pamoja na baadhi ya wanafamilia Oktoba 16 katika shambulio la bomu lililolenga nyumba yake karibu na kitongoji cha Al-Zaytoun kusini mwa Ukanda wa Gaza.

Youssef Dawwas

Mwandishi wa gazeti la Palestine Chronicle aliuawa Oktoba 14 katika mashambulizi ya Israeli katika nyumba yao katika mji wa Beit Lahia kaskazini mwa Ukanda wa Gaza.

Salam Mima

Mwili wa mwanahabari Salam Mima ulipatikana Oktoba 13 chini ya vifusi, siku tatu baada ya nyumba yake katika kambi ya wakimbizi ya Jabalia kaskazini mwa Ukanda wa Gaza kushambuliwa na Israel.

Ni mkuu wa Kamati ya Wanahabari Wanawake katika Chama cha Wanahabari wa Palestina, aliuawa pamoja na mumewe na watoto watatu.

Hossam Mubarak

Mwandishi wa habari wa Al-Aqsa Radio, aliuawa Oktoba 13 katika shambulio la anga la Israel kaskazini mwa Ukanda wa Gaza.

Ahmed Shehab

Mwandishi wa habari wa Redio ya Sauti ya Wafungwa, aliuawa Oktoba 12, pamoja na mke wake na watoto watatu, katika shambulio la anga la Israel kwenye nyumba yake huko Jabalia, kaskazini mwa Ukanda wa Gaza.

Muhammad Fayez Abu Matar

Ana umri wa miaka 28, ni mpiga picha wa kujitegemea, aliuawa Oktoba 11, katika shambulio la anga la Israel kwenye mji wa Rafah kusini mwa Ukanda wa Gaza.

Amesema Al-Taweel

Mhariri mkuu wa Mtandao wa Habari wa Al-Khamsa, aliuawa Oktoba 9, katika shambulio la anga la Israel lililolenga eneo lenye vyombo kadhaa vya habari katika kitongoji cha Al-Rimal, magharibi mwa Gaza.

Muhammad Sobh

Mpiga picha wa Shirika la Habari la Khabar, aliuawa Oktoba 9, katika shambulio la anga la Israel lililolenga eneo lenye vyombo kadhaa vya habari katika kitongoji cha Al-Rimal, magharibi mwa Gaza.

Hisham Al-Nawajah

Hisham Al-Nawajha, mwandishi wa habari katika Shirika la Habari la Khabar, aliuawa Oktoba 9, katika shambulio lile lile la anga la Israel lililoua wenzake Al-Taweel na Sobh katika kitongoji cha Al-Rimal, magharibi.

Asaad Shamlikh

Mwandishi wa habari wa kujitegemea, aliuawa Oktoba 8, katika shambulio la anga la Israeli kusini mwa Ukanda wa Gaza, pamoja na watu tisa wa familia yake.

Muhammad Al-Salhi

Mpiga picha wa Shirika la Habari la Fourth Authority, aliuawa Oktoba 7, aliuwawa karibu na kambi ya wakimbizi katikati mwa Ukanda wa Gaza.

Muhammad Jarghoun

Mwandishi wa habari wa Smart Media, aliuawa Oktoba 7, alipokuwa akiripoti mzozo wa mashariki mwa mji wa Rafah kusini mwa Ukanda wa Gaza.

Ibrahim Lafi

Mpiga picha wa Al Ain Media, aliuawa Oktoba 7 kwenye kivuko cha Beit Hanoun/Erez kaskazini mwa Ukanda wa Gaza.

Waandishi waliouawa Israel

Kwa upande wa Israel, waandishi wa habari wanne waliuawa katika siku ya kwanza ya shambulio la Hamas la "Mafuriko ya Al-Aqsa" tarehe 7 Oktoba.

Roy Aidan 45

Mpiga picha wa gazeti la Israel la Ynet, alitangazwa kufariki baada ya mwili wake kupatikana Oktoba 20. Idan aliripotiwa kutoweka tangu siku ya kwanza ya shambulio la Hamas, na mkewe na bintiye pia waliuawa.

Regev Tea 25

Mhariri wa gazeti la Kiebrania, Maariv, aliuawa Oktoba 7, wakati wa shambulio la Hamas. Kifo cha Regev kilithibitishwa na familia yake baada ya kutoweka kwa siku sita.

Ayelet Arnin 22

Mhariri wa redio ya Israel Kan, aliuawa Oktoba 7, katika shambulio la Hamas, alipohudhuria tamasha la muziki. Rafiki yake aliitaarifu familia ya Ayelet kuhusu kifo chake baada ya shambulio hilo kwa mujibu wa Times of Israel. Arnin alipata kuwa mhariri wa habari katika Redio ya Jeshi la Israel.

Yaniv Zohar

Mpiga picha wa gazeti la Kiebrania Hume, aliuawa Oktoba 7, pamoja na mkewe na binti zake wawili, wakati wa shambulio la Hamas huko Kibbutz Nahal Oz kusini mwa Israel kwa mujibu wa Kamati ya kuwalinda Waandishi wa Habari.

Waandishi waliouawa Lebanon

Farah Omar

Mwandishi wa Al-Mayadeen TV, aliuawa Novemba 21, wakati wa mashambulizi ya Israel kwenye mji wa Tayr Harfa kusini mwa Lebanon.

Rabih Al-Maamari

Mpigapicha wa kituo cha televisheni cha Al-Mayadeen, aliuawa tarehe 21 Novemba, pamoja na mwenzake Farah Omar, katika shambulio la Israel katika eneo la Tayr Harfa kusini mwa Lebanon.

Essam Abdullah

Mpiga picha wa Lebanon wa shirika la habari la Reuters aliuawa Oktoba 13, kwa kombora lililotoka upande wa Israel karibu na mpaka wa Lebanon, kulingana na Kamati ya Kulinda Waandishi wa Habari ilisema.

Wadau wa vyombo vya Habari

Kamati ya Kulinda Waandishi wa Habari inaeleza kwamba waandishi wa habari ni raia na wanafanya kazi muhimu wakati wa machafuko, na hawapaswi kulengwa na upande wowote.

Sherif Mansour, mratibu wa kamati hiyo Mashariki ya Kati na Kaskazini mwa Afrika, anasema katika ripoti ya shirika hilo kuhusu vita vya Gaza kwamba waandishi wa habari wanajitolea, hasa walio ndani ya Ukanda wa Gaza, kwani wanalipa gharama kubwa.

Jumuiya ya Waandishi wa Habari wa Palestina ilitoa taarifa siku ya Alhamisi, na kusema kuwa mashambulizi ya Israel yalilenga nyumba za waandishi wa habari katika maeneo ya kaskazini na kati ya Ukanda wa Gaza.

Hii si mara ya kwanza kwa waandishi wa habari, wengi wao Wapalestina kuuawa, lakini kwa mujibu wa Kamati ya Kulinda Waandishi wa Habari, Israel imechunguza kesi 5 tu tangu 2014 za waandishi wa habari waliouawa, lakini hakuna hata moja iliyopelekea kufunguliwa kwa makosa ya jinai.

Imetafsiriwa na Rashid Abdallah