දූෂණ විමර්ශනයට 'විශේෂ විනිසුරු මඩුල්ලක්'
ඡායාරූප මූලාශ්රය, Getty Images
දූෂණ, වංචා චෝදනා විමර්ශනය කිරීම පිණිස සියලු බලතල සහිත විශේෂ විනිසුරු මඩුල්ලක් පත් කළ යුතු යයි ඉදිරිපත් කළ යෝජනාවට කැබිනට් මණ්ඩලයේ අනුමැතිය හිමි වූ බව අමාත්ය පාඨලී චම්පික රණවක පවසයි.
එවැනි විනිශ්චය මඩුල්ලක් පිහිටුවන මෙන් අමාත්ය ආචාර්ය සරත් අමුණුගම සමග එක්ව අඟහරුවාදා පැවති කැබිනට් රැස්වීමට කැබිනට් පත්රිකාවක් ඉදිරිපත් කළ බව අමාත්ය රණවක සිය ෆේස්බුක් පිටුවේ නිවේදනය කර තිබේ.
අදාළ විනිශ්චය මණ්ඩලය පිහිටුවීම සම්බන්ධ ඉදිරි කටයුතු සඳහා කැබිනට් මණ්ඩල යෝජනාව නීතිපතිවරයා වෙත යොමුකරන ලද බවත් නිවේදනයේ සඳහන් වේ.
බරපතළ දූෂණ සහ අක්රමිකතා සම්බන්ධයෙන් පවතින නඩු කඩිනමින් විභාග කොට වරදකරුවන්ට දඬුවම් ලබා දීම සඳහා අපරාධ යුක්ති විනිශ්චය කොමිෂන් සභාවක් ස්ථාපිත කළ යුතු යයි තමන් ඇතුළු අමාත්යවරුන් පිරිසක් කැබිනට් මණ්ඩලයට යෝජනා කළ බව විශේෂ ව්යාපෘති භාර අමාත්ය ආචාර්ය සරත් අමුණුගම පසුගියදා බීබීසී සංදේශයට පැවසීය.
වංචා දූෂණ සම්බන්ධයෙන් පවතින නඩු විභාග කිරීමේ ප්රමාදයක් පවතින බවට ජනතාව තුළ මතයක් නිර්මාණය වී ඇති බැවින් එවැනි චෝදනා කඩිනමින් විභාග කිරීමේ අවශ්යතාවයක් මතු වී තිබෙන බවත් අමාත්ය අමුණුගම සඳහන් කළේය.
දූෂණ විමර්ශන සඳහා විශේෂ අධිකරණයක් පිහිටුවන මෙන් ඉල්ලා සිටිමින් පසුගිය දෙසැම්බර් 11 වැනි දින මන්ත්රීවරුන් පිරිසක් ජනාධිපති මෛත්රීපාල සිරිසේන වෙත ඉදිරිපත් කළ යෝජනාව නව විනිශ්චය මණ්ඩලය පිහිටුවීමේදී රුකුලක් වූ බවත් අමාත්ය චම්පික රණවක සඳහන් කරයි.
