ਰੂਸ ਤੋਂ ਅਜ਼ਾਦ ਹੋਏ ਯੂਕਰੇਨੀ ਇਲਾਕਿਆਂ ਦੇ ਲੋਕਾਂ ਨੇ ਜਦੋਂ ਆਪਣੇ ਫੌਜੀਆਂ ਨੂੰ ਸੁਣਿਆ, ‘ਕੋਈ ਜਿਉਂਦਾ ਹੈ?’
ਤਸਵੀਰ ਸਰੋਤ, EPA
ਯੂਕਰੇਨ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਕਿਹਾ ਹੈ ਕਿ ਉਨ੍ਹਾਂ ਨੇ ਰੂਸ ਦੇ ਕਬਜ਼ੇ ਵਿੱਚੋਂ 6000 ਵਰਗ ਕਿਲੋਮੀਟਰ ਤੋਂ ਜ਼ਿਆਦਾ ਇਲਾਕੇ ਖੋਹ ਕੇ ਮੁੜ ਆਪਣੇ ਅਧਿਕਾਰ ਹੇਠ ਕਰ ਲਏ ਹਨ।
ਜ਼ੇਲੇਂਸਕੀ ਮੁਤਾਬਕ ਇਹ ਕਬਜਾ ਸਤੰਬਰ ਵਿੱਚ ਪੂਰਬ ਅਤੇ ਦੱਖਣ ਦੇ ਇਲਾਕਿਆਂ 'ਚ ਲਿਆ ਗਿਆ।
ਬੀਬੀਸੀ ਸੁਤੰਤਰ ਤੌਰ 'ਤੇ ਯੂਕਰੇਨ ਦੇ ਅੰਕੜਿਆਂ ਦੀ ਪੁਸ਼ਟੀ ਨਹੀਂ ਕਰਦਾ ਹੈ। ਪੱਤਰਕਾਰਾਂ ਨੂੰ ਲੜਾਈ ਦੇ ਮੋਰਚਿਆਂ 'ਤੇ ਜਾਣ ਦੀ ਆਗਿਆ ਨਹੀਂ ਹੈ।
ਰੂਸ ਦੇ ਰੱਖਿਆ ਮੰਤਰਾਲੇ ਨੇ ਵੀ ਕੁਪਿਆਂਸਕ ਅਤੇ ਇਜ਼ਯੁਮ ਤੋਂ ਆਪਣੀਆਂ ਫ਼ੌਜਾਂ ਪਿੱਛੇ ਹਟਾਉਣ ਦੀ ਪੁਸ਼ਟੀ ਕੀਤੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਹ ਕਦਮ ਰੂਸੀ ਫ਼ੌਜਾਂ ਨੂੰ ਮੁੜ ਇਕੱਠਾ ਕਰਨ ਲਈ ਚੁੱਕਿਆ ਗਿਆ ਹੈ।
ਜਿਹੜੇ ਇਲਾਕਿਆਂ ਵਿੱਚ ਯੂਕਰੇਨ ਨੇ ਮੁੜ ਕਬਜ਼ਾ ਕਰ ਲਿਆ ਹੈ। ਉਨ੍ਹਾਂ ਇਲਾਕਿਆਂ ਦੇ ਲੋਕ ਕੀ ਕਹਿ ਰਹੇ ਹਨ-
ਯੂਕਰੇਨ ਯੁੱਧ: ਨਵੇਂ ਆਜ਼ਾਦ ਹੋਏ ਪਿੰਡਾਂ ਵਿੱਚ ਹੈਰਾਨੀ ਅਤੇ ਖੁਸ਼ੀ
ਬੀਬੀਸੀ ਪੱਤਰਕਾਰ ਓਰਲਾ ਗੁਏਰਿਨ, (ਕ੍ਰੀਵੀ ਅਤੇ ਰਿਹ, ਯੂਕਰੇਨ ਤੋਂ) ਦੀ ਕਲਮ ਤੋਂ
ਆਪਣੀ ਮੁਕਤੀ ਦੇ ਪਲ ਨੂੰ ਯਾਦ ਕਰਦਿਆਂ ਨਤਾਲਿਆ ਦਾ ਚਿਹਰਾ ਚਮਕ ਉੱਠਦਾ ਹੈ।
ਉਨ੍ਹਾਂ ਨੂੰ ਖੇਰਸਨ ਦੇ ਦੱਖਣੀ ਖੇਤਰ ਵਿੱਚ ਸਥਿਤ ਉਨ੍ਹਾਂ ਦੇ ਪਿੰਡ ਨੋਵੋਵੋਜ਼ਨੇਸੇਂਸਕੇ ਤੋਂ ਕੱਢ ਦਿੱਤਾ ਗਿਆ ਸੀ।
29 ਮਾਰਚ ਨੂੰ ਰੂਸੀਆਂ ਦੇ ਆਉਣ ਤੱਕ ਉਹ ਸ਼ਾਂਤੀ ਨਾਲ ਉੱਥੇ ਖੇਤੀ ਕਰਦੇ ਸਨ। ਜੋ ਉਨ੍ਹਾਂ ਨੇ ਨਸ਼ਟ ਨਹੀਂ ਕੀਤੀ, ਉਨ੍ਹਾਂ ਨੇ ਉਸ ਨੂੰ ਚੋਰੀ ਕਰ ਲਿਆ।
ਉਹ ਕਹਿੰਦੇ ਹਨ ਕਿ ਕਾਂਟੇ ਅਤੇ ਚਮਚਿਆਂ ਸਮੇਤ, ਅਤੇ ਪੈਨਸ਼ਨਰ ਦੇ ਪੈਰਾਂ ਵਿੱਚੋਂ ਜੁੱਤੀਆਂ ਤੱਕ ਲੁਹਾ ਕੇ ਲੈ ਗਏ।
"ਉਹ ਪਾਗਲਾਂ ਦੀ ਭੀੜ ਸੀ।'' ਉਹ ਮੈਨੂੰ ਦੱਸਦੇ ਹਨ ਅਤੇ ਆਪਣੇ ਹੱਥਾਂ ਨੂੰ ਮਰੋੜਦੇ ਹੋਏ ਆਪਣੇ ਸਦਮੇ ਨਾਲ ਜੂਝਦੇ ਹਨ।
'ਆਜ਼ਾਦੀ', ਆਖ਼ਰਕਾਰ 2 ਸਤੰਬਰ ਨੂੰ ਮਿਲੀ।
50 ਸਾਲਾ ਔਰਤ ਕਹਿੰਦੀ ਹੈ, "ਜਦੋਂ ਸਾਡੀਆਂ ਹਥਿਆਰਬੰਦ ਫੌਜਾਂ ਆਈਆਂ, ਅਸੀਂ ਬੇਸਮੈਂਟ ਵਿੱਚ ਸੀ।"
"ਉਨ੍ਹਾਂ ਨੇ ਯੂਕਰੇਨੀ ਵਿੱਚ ਪੁੱਛਿਆ, 'ਕੀ ਕੋਈ ਜ਼ਿਉਂਦਾ ਹੈ?' ਅਤੇ ਮੈਨੂੰ ਅਹਿਸਾਸ ਹੋਇਆ ਕਿ ਉਹ ਸਾਡੇ ਹਨ। ਉਹ ਬਹੁਤ ਸੁੰਦਰ ਸਨ, ਖਾਸ ਤੌਰ 'ਤੇ ਫਾਸੀਵਾਦੀਆਂ [ਰੂਸੀ ਫੌਜਾਂ ਲਈ] ਦੇ ਮੁਕਾਬਲੇ ਬਹੁਤ ਸੁੰਦਰ ਸਨ।
"ਮੈਨੂੰ ਸਮਝ ਨਹੀਂ ਆਈ ਕਿ ਉਨ੍ਹਾਂ ਨਾਲ ਕੀ ਕਰਾਂ - ਮੈਂ ਉਨ੍ਹਾਂ ਨੂੰ ਗਲੇ ਲਗਾ ਲਵਾਂ ਜਾਂ ਉਨ੍ਹਾਂ ਦੇ ਹੱਥ ਫੜ ਲਵਾਂ? ਮੈਂ ਉਨ੍ਹਾਂ ਨੂੰ ਛੂਹਿਆ ਅਤੇ ਮੈਂ ਬਹੁਤ ਖੁਸ਼ ਹੋਈ।"
ਮਹੀਨਿਆਂ ਦੇ ਡੈੱਡਲਾਕ ਤੋਂ ਬਾਅਦ ਯੂਕਰੇਨ ਅਤੇ ਰੂਸ ਵਾਸੀ ਇੱਕ ਨਵੀਂ ਹਕੀਕਤ ਦਾ ਸਾਹਮਣਾ ਕਰ ਰਹੇ ਹਨ।
ਰੂਸ ਅਤੇ ਯੂਕਰੇਨ ਦੀ ਜੰਗ ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਯੂਰਪ ਵਿੱਚ ਹੋ ਰਹੀ ਪਹਿਲੀ ਵੱਡੀ ਕਾਰਵਾਈ ਹੈ।
ਪੰਜ ਮਹੀਨਿਆਂ ਤੋਂ ਚੱਲ ਰਹੀ ਇਸ ਜੰਗ ਵਿੱਚ ਹੁਣ ਅਚਾਨਕ ਕੁਝ ਤੇਜ਼ੀ ਆਈ ਹੈ।
ਯੂਕਰੇਨੀ ਸੈਨਾ ਅੱਗੇ ਵਧੀ ਹੈ, ਅਤੇ ਖਾਰਕੀਵ ਦੇ ਪੂਰਬੀ ਖੇਤਰ ਵਿੱਚ ਫ਼ੌਜੀ ਪੈਂਤੜੇ ਦੇ ਹਿਸਾਬ ਨਾਲ ਮਹੱਤਵਪੂਰਣ ਟਿਕਾਣਿਆਂ ਤੋਂ ਰੂਸੀ ਬਲਾਂ ਨੇ ਕਾਹਲੀ ਵਿੱਚ ਪਿੱਛੇ ਹਟਣਾ ਸ਼ੁਰੂ ਕਰ ਦਿੱਤਾ ਹੈ।
ਰੂਸੀ ਦਸਤਿਆਂ ਨੇ ਇੱਕ ਮਹੱਤਵਪੂਰਨ ਲੌਜਿਸਟਿਕ ਹੱਬ ਕੁਪਿਆਂਸਕ ਅਤੇ ਹਮਲਿਆਂ ਲਈ ਲਾਂਚਪੈਂਡ ਇਜ਼ਯੁਮ ਦੇ ਸ਼ਹਿਰਾਂ ਨੂੰ ਗੁਆ ਦਿੱਤਾ ਹੈ।
ਤਸਵੀਰ ਸਰੋਤ, Getty Images
ਟਵਿੱਟਰ 'ਤੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਦੇ ਚੀਫ ਆਫ ਸਟਾਫ ਐਂਡਰੀ ਯਰਮਕ ਨੇ ਲਿਖਿਆ, "ਰੂਸੀ ਫੌਜ ਦੁਨੀਆ ਦੀ ਸਭ ਤੋਂ ਤੇਜ਼ ਫੌਜ ਦੇ ਰੂਪ ਵਿੱਚ ਪ੍ਰਸਿੱਧ ਹੋਣ ਲਈ ਦੌੜ ਰਹੀ ਹੈ।" "ਦੌੜਦੇ ਰਹੋ"।
ਇੱਥੇ ਸੋਸ਼ਲ ਮੀਡੀਆ ਛੱਡੀਆਂ ਜਾਂ ਨਸ਼ਟ ਹੋ ਚੁੱਕੀਆਂ ਰੂਸੀ ਪੋਸਟਾਂ ਦੀਆਂ ਤਸਵੀਰਾਂ ਨਾਲ ਭਰਿਆ ਪਿਆ ਹੈ, ਅਤੇ ਯੂਕਰੇਨੀ ਫੌਜਾਂ ਨਵੇਂ ਆਜ਼ਾਦ ਖੇਤਰਾਂ ਵਿੱਚ ਆਪਣਾ ਝੰਡਾ ਲਹਿਰਾ ਰਹੀਆਂ ਹਨ।
ਜਵਾਬੀ ਹਮਲੇ ਦੀ ਗਤੀ ਅਤੇ ਤੀਬਰਤਾ ਨੇ ਕਬਜ਼ਾ ਕਰਨ ਵਾਲਿਆਂ ਅਤੇ ਬਹੁਤ ਸਾਰੇ ਯੂਕਰੇਨੀਅਨਾਂ ਨੂੰ ਹੈਰਾਨ ਕਰ ਦਿੱਤਾ ਹੈ।
ਇੱਕ ਯੂਕਰੇਨੀਅਨ ਸਹਿਯੋਗੀ ਨੇ ਆਪਣੇ ਆਪ ਨੂੰ "ਹੈਰਾਨ, ਸੁਖਦ" ਕਿਹਾ।
ਉਹ ਕਹਿੰਦਾ ਹੈ, "ਸਾਨੂੰ ਹੌਸਲਾ ਦੇਣ ਲਈ ਇੱਕ ਸ਼ਾਨਦਾਰ ਜਿੱਤ ਦੀ ਜ਼ਰੂਰਤ ਸੀ।"
- ਯੂਕਰੇਨ ਦੀਆਂ ਫੌਜਾਂ ਤੋਂ ਇੰਨਾ ਜਲਦੀ ਅਤੇ ਮਜ਼ਬੂਤ ਜਵਾਬੀ ਹਮਲੇ ਦੀ ਉਮੀਦ ਨਹੀਂ ਸੀ।
- ਰੂਸ ਦਾ ਅਜੇ ਵੀ ਯੂਕਰੇਨ ਦੇ ਪੰਜਵੇਂ ਹਿੱਸੇ 'ਤੇ ਕਬਜ਼ਾ ਹੈ, ਜਿਸ ਵਿੱਚ ਖੇਰਸਨ ਸ਼ਹਿਰ ਵੀ ਸ਼ਾਮਲ ਹੈ।
- ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੈਂਸਕੀ ਇਸ ਸੰਕਟ ਦੀ ਘੜੀ ਦੌਰਾਨ ਇੱਕ ਮਜ਼ਬੂਤ ਸਿਆਸਤਦਾਨ ਵਜੋਂ ਉੱਭਰੇ ਹਨ।
- ਰੂਸ ਨੇ ਮੰਨਿਆ ਕਿ ਉਸ ਦੀਆਂ ਫੌਜਾਂ ਖਾਰਕੀਵ ਦੇ ਕੁਝ ਹਿੱਸਿਆਂ ਤੋਂ ਹਟ ਗਈਆਂ ਹਨ। ਪਰ ਉਹ ਇਸ ਨੂੰ ਪਿੱਛੇ ਹਟਣਾ ਨਹੀਂ ਸਗੋਂ ਫ਼ੌਜਾਂ ਨੂੰ "ਮੁੜ ਸੰਗਠਿਤ" ਕਰਨ ਲਈ ਕੀਤਾ ਗਿਆ ਕਹਿ ਰਿਹਾ ਹੈ।
- ਕੋਈ ਵੀ ਰਾਸ਼ਟਰਪਤੀ ਪੁਤਿਨ ਤੋਂ ਪਿੱਛੇ ਹਟਣ ਦੀ ਉਮੀਦ ਨਹੀਂ ਕਰਦਾ। ਜਦੋਂ ਯੂਕਰੇਨ ਦੀ ਗੱਲ ਆਉਂਦੀ ਹੈ, ਤਾਂ ਉਹ ਲੰਬਾ (ਅਤੇ ਜਨੂੰਨੀ) ਦ੍ਰਿਸ਼ਟੀਕੋਣ ਅਪਣਾਉਂਦੇ ਹਨ।
- ਰੂਸ ਅਤੇ ਯੂਕਰੇਨ ਦੀ ਲੜਾਈ ਨੂੰ 6 ਮਹੀਨੇ ਪੂਰੇ ਹੋ ਗਏ ਹਨ।
"ਅਤੇ ਅਜਿਹਾ ਲੱਗਦਾ ਹੈ ਕਿ ਖਾਰਕੀਵ ਵਿੱਚ ਦੂਰਗਾਮੀ ਪ੍ਰਭਾਵ ਹੈ। ਪਰ ਉਨ੍ਹਾਂ ਕੋਲ ਅਜੇ ਵੀ ਹਥਿਆਰ ਅਤੇ ਫੌਜਾਂ ਅਤੇ ਸਾਡੇ ਬਹੁਤ ਸਾਰੇ ਖੇਤਰ ਹਨ। ਲੋਕ ਅਜੇ ਵੀ ਸਮਝਦੇ ਹਨ ਕਿ ਉਨ੍ਹਾਂ ਦਾ ਗੁਆਂਢੀ ਕੌਣ ਹੈ, ਪਰ ਡਰ ਘੱਟ ਅਤੇ ਆਤਮ-ਵਿਸ਼ਵਾਸ ਜ਼ਿਆਦਾ ਹੈ।"
ਡੌਨਬਾਸ ਖੇਤਰ ਵਿੱਚ ਗਰਮੀਆਂ ਵਿੱਚ ਹੋਏ ਨੁਕਸਾਨ ਤੋਂ ਬਾਅਦ, ਯੁੱਧ-ਗ੍ਰਸਤ ਦੇਸ਼ ਨੂੰ ਕੁਝ ਸਹਾਰਾ ਮਿਲਿਆ ਹੈ।
ਜਦੋਂ ਸਾਨੂੰ ਜੂਨ ਵਿੱਚ ਉੱਥੋਂ ਰਿਪੋਰਟ ਮਿਲੀ ਤਾਂ ਅਜਿਹਾ ਕੋਈ ਸੰਕੇਤ ਨਹੀਂ ਸੀ ਕਿ ਯੂਕਰੇਨ ਦੀਆਂ ਫੌਜਾਂ ਇੰਨਾ ਮਜ਼ਬੂਤ ਜਵਾਬੀ ਹਮਲਾ ਕਰਨ ਦੇ ਸਮਰੱਥ ਹੋ ਸਕਦੀਆਂ ਹਨ।
ਤਸਵੀਰ ਸਰੋਤ, Getty Images
ਇੱਕ 38 ਸਾਲਾ ਆਈਟੀ ਇੰਜੀਨੀਅਰ ਮਾਈਖਾਈਲੋ ਕਹਿੰਦਾ ਹੈ "ਇਹ ਇੱਕ ਫੌਜੀ ਚਮਤਕਾਰ ਹੈ।"
ਇਹ "ਚਮਤਕਾਰ" ਬਹੁਤ ਸਾਰੇ ਵਿਦੇਸ਼ੀ ਹਥਿਆਰਾਂ ਨਾਲ ਪ੍ਰਾਪਤ ਕੀਤਾ ਗਿਆ ਹੈ ਜਿਸ ਵਿੱਚ ਲੰਬੀ ਦੂਰੀ ਦੇ ਮਲਟੀਪਲ ਰਾਕੇਟ ਲਾਂਚ ਪ੍ਰਣਾਲੀਆਂ ਅਤੇ ਵਿਦੇਸ਼ੀ ਖੁਫੀਆ ਜਾਣਕਾਰੀ ਸ਼ਾਮਲ ਹੈ।
ਅਜਿਹਾ ਵੀ ਲੱਗਦਾ ਹੈ ਕਿ ਯੂਕਰੇਨੀਅਨਾਂ ਨੇ ਦੱਖਣੀ ਖੇਰਸਨ ਖੇਤਰ ਵਿੱਚ ਜਵਾਬੀ ਹਮਲੇ ਦੀ ਯੋਜਨਾ ਬਣਾ ਕੇ ਰੂਸੀਆਂ ਨੂੰ ਮਾਤ ਦਿੱਤੀ ਹੈ।
ਅਜਿਹਾ ਜਾਪਦਾ ਹੈ ਕਿ ਕ੍ਰੇਮਲਿਨ (ਰੂਸੀ ਸਰਕਾਰ) ਜਾਲ ਵਿੱਚ ਫਸ ਗਿਆ ਹੈ, ਉੱਥੇ ਕੁਝ ਫੋਰਸਾਂ ਨੂੰ ਦੁਬਾਰਾ ਤਾਇਨਾਤ ਕੀਤਾ ਗਿਆ ਹੈ, ਜਿਸ ਨਾਲ ਖਾਰਕੀਵ ਵਿੱਚ ਉਨ੍ਹਾਂ ਦੀ ਸਥਿਤੀ ਖ਼ਤਰਨਾਕ ਰੂਪ ਵਿੱਚ ਉਜਾਗਰ ਹੋ ਗਈ ਹੈ।
ਪਰ ਹਮਲੇ ਨੇ ਇਹ ਵੀ ਦਿਖਾਇਆ ਹੈ ਕਿ ਪੱਛਮੀ ਫੌਜੀ ਮਾਹਰਾਂ ਦੇ ਅਨੁਸਾਰ, ਯੂਕਰੇਨੀ ਯੁੱਧ ਦੇ ਮੈਦਾਨ ਵਿੱਚ ਰੂਸੀਆਂ ਨੂੰ ਹਰਾ ਸਕਦੇ ਹਨ।
ਰਾਇਲ ਯੂਨਾਈਟਿਡ ਸਰਵਿਸਿਜ਼ ਇੰਸਟੀਚਿਊਟ ਦੇ ਸਾਬਕਾ ਨਿਰਦੇਸ਼ਕ, ਪ੍ਰੋਫੈਸਰ ਮਾਈਕਲ ਕਲਾਰਕ ਕਹਿੰਦੇ ਹਨ, "ਅਸੀਂ ਹੁਣ ਰੂਸੀਆਂ ਨੂੰ ਨਾ ਕਿ ਸਿਰਫ਼ ਘਿਰੇ ਹੋਏ ਸਗੋਂ ਹਾਰਦੇ ਹੋਏ ਦੇਖ ਰਹੇ ਹਾਂ"। ਉਨ੍ਹਾਂ ਮੁਤਾਬਕ ਇਹ ਨਵੀਂ ਸ਼ੁਰੂਆਤ ਹੈ
ਤਸਵੀਰ ਸਰੋਤ, EPA
ਸ਼ਨਿਚਰਵਾਰ ਨੂੰ, ਰਾਸ਼ਟਰਪਤੀ ਜ਼ੇਲੇਂਸਕੀ ਨੇ ਕਿਹਾ ਕਿ ਉਨ੍ਹਾਂ ਦੇ ਦੇਸ਼ ਦੇ ਹਥਿਆਰਬੰਦ ਬਲਾਂ ਨੇ ਸਤੰਬਰ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ ਲਗਭਗ 2,000 ਵਰਗ ਕਿਲੋਮੀਟਰ (770 ਵਰਗ ਮੀਲ) ਖੇਤਰ ਮੁੜ ਪ੍ਰਾਪਤ ਕੀਤਾ ਹੈ। ਐਤਵਾਰ ਸਵੇਰੇ, ਫੌਜ ਨੇ ਇਸ ਨੂੰ ਹੋਰ ਵੀ ਵਧਾ ਕੇ 3,000 ਵਰਗ ਕਿਲੋਮੀਟਰ ਕਰ ਦਿੱਤਾ।
ਫਿਲਹਾਲ, ਬੀਬੀਸੀ ਸਮੇਤ ਸਾਰੇ ਪੱਤਰਕਾਰਾਂ ਨੂੰ ਫਰੰਟਲਾਈਨਾਂ ਤੋਂ ਦੂਰ ਰੱਖਿਆ ਜਾ ਰਿਹਾ ਹੈ। ਅਸੀਂ ਯੂਕਰੇਨ ਦੇ ਸਾਰੇ ਦਾਅਵਿਆਂ ਦੀ ਪੁਸ਼ਟੀ ਨਹੀਂ ਕਰ ਸਕਦੇ, ਪਰ ਰੂਸ ਨੇ ਮੰਨਿਆ ਕਿ ਉਸ ਦੀਆਂ ਫੌਜਾਂ ਖਾਰਕੀਵ ਦੇ ਕੁਝ ਹਿੱਸਿਆਂ ਤੋਂ ਹਟ ਗਈਆਂ ਹਨ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਨੂੰ ਬਾਹਰ ਕੱਢਣ ਦੀ ਬਜਾਏ "ਮੁੜ ਸੰਗਠਿਤ" ਕੀਤਾ ਗਿਆ ਹੈ।
ਯੂਕਰੇਨ ਦੀ ਤਾਜ਼ਾ ਚੜ੍ਹਾਈ ਦੇ ਬਾਵਜੂਦ ਰੂਸ ਦਾ ਅਜੇ ਵੀ ਯੂਕਰੇਨ ਦੇ ਪੰਜਵੇਂ ਹਿੱਸੇ 'ਤੇ ਕਬਜ਼ਾ ਹੈ, ਜਿਸ ਵਿੱਚ ਖੇਰਸਨ ਸ਼ਹਿਰ ਵੀ ਸ਼ਾਮਲ ਹੈ।
ਹਮਲੇ ਤੋਂ ਬਾਅਦ ਕਬਜ਼ੇ ਵਿੱਚ ਆਉਣ ਵਾਲਾ ਇਹ ਪਹਿਲਾ ਵੱਡਾ ਯੂਕਰੇਨੀਅਨ ਸ਼ਹਿਰ ਸੀ ਅਤੇ ਇਹ ਕ੍ਰੀਮੀਅਨ ਪ੍ਰਾਇਦੀਪ (2014 ਤੋਂ ਰੂਸ ਦੁਆਰਾ ਕੰਟਰੋਲ) ਦੇ ਬਿਲਕੁਲ ਉੱਤਰ ਵਿੱਚ ਹੈ।
ਅਸੀਂ ਅਜੇ ਵੀ ਉੱਥੇ ਰਹਿ ਰਹੀ ਇੱਕ ਔਰਤ ਤੱਕ ਪਹੁੰਚਣ ਵਿੱਚ ਕਾਮਯਾਬ ਹੋ ਗਏ ਜੋ ਕਹਿੰਦੀ ਹੈ ਕਿ ਰੂਸੀ ਘਟ ਰਹੇ ਹਨ। ਉਸ ਦੀ ਸੁਰੱਖਿਆ ਲਈ ਅਸੀਂ ਉਸ ਦਾ ਨਾਮ ਨਹੀਂ ਦੱਸ ਰਹੇ।
ਉਹ ਸਾਨੂੰ ਦੱਸਦੀ ਹੈ, "ਪਿਛਲੇ ਦੋ ਜਾਂ ਤਿੰਨ ਦਿਨਾਂ ਵਿੱਚ ਲੱਗਦਾ ਹੈ ਕਿ ਫੌਜ ਥੋੜ੍ਹੀ ਜਿਹੀ ਸ਼ਾਂਤ ਹੋ ਗਈ ਹੈ।"
ਤਸਵੀਰ ਸਰੋਤ, Reuters
"ਉਹ ਕੈਫੇ ਅਤੇ ਰੈਸਟੋਰੈਂਟਾਂ ਵਿੱਚ ਘੱਟ ਦਿਖਾਈ ਦਿੰਦੇ ਹਨ। ਜੇਕਰ ਸੜਕਾਂ 'ਤੇ ਲੜਾਈ ਸ਼ੁਰੂ ਹੁੰਦੀ ਹੈ ਤਾਂ ਇਹ ਬਹੁਤ ਖ਼ਤਰਨਾਕ ਹੋਵੇਗੀ। ਪਰ ਮੈਂ ਲੋੜ ਪੈਣ 'ਤੇ ਕਈ ਦਿਨਾਂ ਜਾਂ ਹਫ਼ਤਿਆਂ ਤੱਕ ਬੇਸਮੈਂਟ ਵਿੱਚ ਬੈਠਾਂਗੀ। ਮੈਂ ਇੱਥੇ ਆਪਣੀ ਫੌਜ ਨੂੰ ਦੇਖਣਾ ਚਾਹੁੰਦੀ ਹਾਂ ਅਤੇ ਉਨ੍ਹਾਂ ਦਾ ਧੰਨਵਾਦ ਕਰਨਾ ਚਾਹੁੰਦੀ ਹਾਂ। ਮੈਂ ਜਿੱਤ ਦੇਖਣਾ ਚਾਹੁੰਦੀ ਹਾਂ। "
ਇਸ ਦੇ ਇਲਾਵਾ ਜਿੱਤ ਦੇ ਇੰਤਜ਼ਾਰ ਵਿੱਚ ਸ਼ਹਿਰ ਦੇ ਅੰਦਰ ਕਾਰਕੁਨਾਂ ਦਾ ਇੱਕ ਨੈੱਟਵਰਕ ਹੈ, ਜੋ ਰੂਸੀਆਂ ਦਾ ਵਿਰੋਧ ਕਰ ਰਹੇ ਹਨ। ਉਹ ਫੌਜੀ ਟਿਕਾਣਿਆਂ 'ਤੇ ਖੁਫੀਆ ਜਾਣਕਾਰੀ ਇਕੱਠਾ ਕਰਦੇ ਹਨ ਅਤੇ ਇਸ ਨੂੰ ਯੂਕਰੇਨੀ ਦਸਤਿਆਂ ਨੂੰ ਦਿੰਦੇ ਹਨ।
ਨੈੱਟਵਰਕ ਦੇ ਇੱਕ ਮੈਂਬਰ ਜਿਸ ਦੀ ਅਸੀਂ ਪਛਾਣ ਨਹੀਂ ਦੱਸ ਸਕਦੇ, ਉਨ੍ਹਾਂ ਨੇ ਸਾਨੂੰ ਦੱਸਿਆ ਕਿ ਉਨ੍ਹਾਂ ਦਾ ਸ਼ਿਕਾਰ ਕੀਤਾ ਜਾ ਰਿਹਾ ਹੈ।
ਉਹ ਕਹਿੰਦਾ ਹੈ, "ਰੂਸੀ ਅਜਿਹੇ ਸਥਾਨ ਲੱਭ ਰਹੇ ਹਨ ਜਿੱਥੇ ਤਸਵੀਰਾਂ ਲਈਆਂ ਜਾ ਰਹੀਆਂ ਹਨ। ਰਣਨੀਤਕ ਸਥਾਨਾਂ ਦੇ ਨੇੜੇ ਫਲੈਟਾਂ ਦੀ ਵੱਡੇ ਪੱਧਰ 'ਤੇ ਤਲਾਸ਼ੀ ਲਈ ਜਾ ਰਹੀ ਹੈ।"
ਤਸਵੀਰ ਸਰੋਤ, EPA
ਪਰ ਉਹ ਕਹਿੰਦਾ ਹੈ ਕਿ ਫਰੰਟਲਾਈਨ ਦੀਆਂ ਖ਼ਬਰਾਂ ਉਮੀਦ ਲਿਆ ਰਹੀਆਂ ਹਨ। "ਲੋਕ ਹੁਣ ਖਾਰਕੀਵ ਦੇ ਆਲੇ ਦੁਆਲੇ ਦੀ ਤਰੱਕੀ ਤੋਂ ਬਹੁਤ ਉਤਸ਼ਾਹਿਤ ਹਨ।"
ਉਸ ਨੇ ਸਾਨੂੰ ਦੱਸਿਆ, "ਬਹੁਤ ਸਾਰੇ ਉਮੀਦ ਕਰਦੇ ਹਨ ਕਿ ਅਸੀਂ ਅਗਲੇ ਹੋਵਾਂਗੇ।"
ਖੇਰਸਨ ਸ਼ਹਿਰ ਆਉਣ ਵਾਲੀ ਇੱਕ ਮਹੱਤਵਪੂਰਨ ਲੜਾਈ ਹੈ, ਪਰ ਹੁਣ ਤੱਕ ਦੀ ਪ੍ਰਗਤੀ ਯੂਕਰੇਨ ਨੂੰ ਰਾਹਤ ਦੇਣ ਵਾਲੀ ਹੈ ਅਤੇ ਇਸ ਦੇ ਪੱਛਮੀ ਸਮਰਥਕਾਂ ਲਈ ਭਰੋਸਾ ਦੇਣ ਵਾਲੀ ਹੈ। ਜੇ ਲਾਭ ਹੁੰਦਾ ਹੈ, ਤਾਂ ਇਹ ਸੰਘਰਸ਼ ਦੀ ਦਿਸ਼ਾ ਨੂੰ ਬਦਲ ਸਕਦਾ ਹੈ।
ਕੋਈ ਵੀ ਰਾਸ਼ਟਰਪਤੀ ਪੁਤਿਨ ਤੋਂ ਪਿੱਛੇ ਹਟਣ ਦੀ ਉਮੀਦ ਨਹੀਂ ਕਰਦਾ। ਜਦੋਂ ਯੂਕਰੇਨ ਦੀ ਗੱਲ ਆਉਂਦੀ ਹੈ, ਤਾਂ ਉਹ ਲੰਬਾ (ਅਤੇ ਜਨੂੰਨੀ) ਦ੍ਰਿਸ਼ਟੀਕੋਣ ਅਪਣਾਉਂਦੇ ਹਨ।
ਪਰ ਕਈ ਥਾਵਾਂ 'ਤੇ ਰੂਸ ਦੇ ਮੋਰਚੇ ਪੂਰੀ ਤਰ੍ਹਾਂ ਢਹਿ-ਢੇਰੀ ਹੋ ਗਏ ਹਨ ਅਤੇ ਇਸ ਦੀਆਂ ਫੌਜਾਂ ਭੱਜ ਗਈਆਂ ਹਨ। ਇਹ ਸਿਰਫ਼ ਹਾਰ ਨਹੀਂ ਹੈ। ਇਹ ਇੱਕ ਅਪਮਾਨ ਹੈ।
ਇਹ ਵੀ ਪੜ੍ਹੋ:
ਇਸ ਲੇਖ ਵਿੱਚ Google YouTube ਤੋਂ ਮਿਲੀ ਸਮੱਗਰੀ ਸ਼ਾਮਲ ਹੈ। ਕੁਝ ਵੀ ਡਾਊਨਲੋਡ ਹੋਣ ਤੋਂ ਪਹਿਲਾਂ ਅਸੀਂ ਤੁਹਾਡੀ ਇਜਾਜ਼ਤ ਮੰਗਦੇ ਹਾਂ ਕਿਉਂਕਿ ਇਸ ਵਿੱਚ ਕੁਕੀਜ਼ ਅਤੇ ਦੂਜੀਆਂ ਤਕਨੀਕਾਂ ਦਾ ਇਸਤੇਮਾਲ ਕੀਤਾ ਹੋ ਸਕਦਾ ਹੈ। ਤੁਸੀਂ ਸਵੀਕਾਰ ਕਰਨ ਤੋਂ ਪਹਿਲਾਂ Google YouTube ਕੁਕੀ ਪਾਲਿਸੀ ਤੇ ਨੂੰ ਪੜ੍ਹਨਾ ਚਾਹੋਗੇ। ਇਸ ਸਮੱਗਰੀ ਨੂੰ ਦੇਖਣ ਲਈ ਇਜਾਜ਼ਤ ਦੇਵੋ ਤੇ ਜਾਰੀ ਰੱਖੋ ਨੂੰ ਚੁਣੋ।
End of YouTube post
