ਤਸਵੀਰਾਂ꞉ ਇੱਕ ਪਿੰਡ ਜਿੱਥੇ ਫਰਵਰੀ ਵਿੱਚ ਕ੍ਰਿਸਮਸ ਮਨਾਈ ਜਾਂਦੀ ਹੈ
ਤਸਵੀਰ ਸਰੋਤ, AFP
ਵਿਸ਼ਵ ਵਿੱਚ ਕ੍ਰਿਸਮਸ ਦਾ ਤਿਉਹਾਰ 25 ਦਸੰਬਰ ਨੂੰ ਮਨਾਇਆ ਜਾਂਦਾ ਹੈ ਪਰ ਕੋਲੰਬੀਆ ਦਾ ਇੱਕ ਅਜਿਹਾ ਪਿੰਡ ਹੈ ਜਿੱਥੇ ਫਰਵਰੀ ਦੇ ਮਹੀਨੇ ਵਿੱਚ ਕ੍ਰਿਸਮਸ ਮਨਾਇਆ ਜਾਂਦਾ ਹੈ।
ਕਵਿਨਾਮਾਯੋ ਵਿੱਚ ਫਰਵਰੀ ਵਿੱਚ ਕ੍ਰਿਸਮਸ ਦਾ ਤਿਉਹਾਰ ਕਿਉਂ ਮਨਾਇਆ ਜਾਂਦਾ ਹੈ? ਇਸ ਦੇ ਪਿੰਡ ਵਾਲੇ ਖਾਸ ਕਾਰਨ ਦੱਸਦੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਫਰਵਰੀ ਵਿੱਚ ਕ੍ਰਿਸਮਸ ਮਨਾਉਣ ਦੀ ਰਵਾਇਤ ਉਨ੍ਹਾਂ ਦੇ ਪੁਰਖਿਆਂ ਦੇ ਜ਼ਮਾਨੇ ਤੋਂ ਚਲੀ ਆ ਰਹੀ ਹੈ।
ਤਸਵੀਰ ਸਰੋਤ, AFP
ਉਸ ਸਮੇਂ ਉਹ ਗੁਲਾਮ ਸਨ ਅਤੇ ਉਨ੍ਹਾਂ ਨੂੰ 25 ਦਸੰਬਰ ਨੂੰ ਕ੍ਰਿਸਮਸ ਮਨਾਉਣ ਦੀ ਇਜਾਜ਼ਤ ਨਹੀਂ ਸੀ। ਉਨ੍ਹਾਂ ਨੂੰ ਕ੍ਰਿਸਮਸ ਦੇ ਲਈ ਕਿਸੇ ਹੋਰ ਦਿਨ ਦੀ ਚੋਣ ਕਰਨ ਲਈ ਕਿਹਾ ਗਿਆ।
ਉਸ ਵੇਲੇ ਇਨ੍ਹਾਂ ਪਿੰਡ ਵਾਸੀਆਂ ਦੇ ਪੁਰਖਿਆਂ ਨੇ ਫਰਵਰੀ ਦੇ ਮੱਧ ਵਿੱਚ ਕ੍ਰਿਸਮਸ ਮਨਾਉਣ ਦਾ ਫੈਸਲਾ ਲਿਆ ਅਤੇ ਉਸ ਵੇਲੇ ਤੋਂ ਅੱਜ ਤੱਕ ਇਹ ਰਵਾਇਤ ਉਸੇ ਤਰੀਕੇ ਨਾਲ ਬਰਕਰਾਰ ਹੈ।
ਕਵਿਨਮਾਯੋ ਪਿੰਡ ਦੇ ਲੋਕ ਇਸ ਦਿਨ ਕਾਲੇ ਸ਼ਿਸ਼ੂ ਈਸਾ ਮਸੀਹ ਦੀ ਮੂਰਤੀ ਦੀ ਪੂਜਾ ਕਰਦੇ ਹਨ। ਇਸ ਜਸ਼ਨ ਦੌਰਾਨ ਆਤਿਸ਼ਬਾਜ਼ੀ ਦੇ ਨਾਲ ਲੋਕ ਨੱਚ ਕੇ ਖੁਸ਼ੀ ਜ਼ਾਹਿਰ ਕਰਦੇ ਹਨ।
ਤਸਵੀਰ ਸਰੋਤ, AFP
ਇਸ ਪ੍ਰੋਗਰਾਮ ਦਾ ਆਯੋਜਨ ਕਰਨ ਵਾਲੇ ਹੋਲਮਸ ਲਾਰਾਹੋਂਡੋ ਕਹਿੰਦੇ ਹਨ, "ਸਾਡੇ ਭਾਈਚਾਰੇ ਦਾ ਮੰਨਣਾ ਹੈ ਕਿ ਕਿਸੇ ਵੀ ਮਹਿਲਾ ਨੂੰ ਜਨਮ ਦੇਣ ਤੋਂ ਬਾਅਦ 45 ਦਿਨਾਂ ਦਾ ਵਰਤ ਰੱਖਣਾ ਹੁੰਦਾ ਹੈ। ਇਸ ਲਈ ਅਸੀਂ ਦਸੰਬਰ ਦੀ ਥਾਂ ਫਰਵਰੀ ਵਿੱਚ ਕ੍ਰਿਸਮਸ ਮਨਾਉਂਦੇ ਹਾਂ ਤਾਂ ਜੋ ਮੈਰੀ ਵੀ ਸਾਡੇ ਨਾਲ ਨੱਚ ਸਕੇ।''
53 ਸਾਲਾ ਅਧਿਆਪਕਾ ਬਾਲਮੋਰਸ ਵਾਇਆਫਰਾ ਨੇ ਏਜੈਂਸ ਪ੍ਰੈਸ ਨੂੰ ਦੱਸਿਆ, "24 ਦਸੰਬਰ ਦਾ ਦਿਨ ਉਨ੍ਹਾਂ ਲਈ ਕਿਸੇ ਵੀ ਆਮ ਦਿਨ ਵਾਂਗ ਹੀ ਹੁੰਦਾ ਹੈ ਪਰ ਇਹ ਜਸ਼ਨ ਇੱਕ ਪਾਰਟੀ ਵਾਂਗ ਹੈ ਜਿੱਥੇ ਅਸੀਂ ਆਪਣੇ ਭਗਵਾਨ ਲਈ ਸ਼ਰਧਾ ਪ੍ਰਗਟ ਕਰਦੇ ਹਾਂ।''
ਤਸਵੀਰ ਸਰੋਤ, AFP
ਇਸ ਜਸ਼ਨ ਦੇ ਤਹਿਤ ਪਿੰਡ ਵਾਲੇ ਘਰ-ਘਰ ਜਾ ਕੇ ਸ਼ਿਸ਼ੂ ਯਸ਼ੂ ਨੂੰ ਲੱਭਦੇ ਹਨ। ਯਸ਼ੂ ਦੀ ਇਹ ਮੂਰਤੀ ਲੱਕੜ ਦੀ ਹੁੰਦੀ ਹੈ, ਜਿਸ ਨੂੰ ਪਿੰਡ ਦਾ ਕੋਈ ਵੀ ਬੰਦਾ ਆਪਣੇ ਘਰ ਵਿੱਚ ਪੂਰੇ ਸਾਲ ਲਈ ਸੁਰੱਖਿਅਤ ਰੱਖਦਾ ਹੈ।
ਮੂਰਤ ਮਿਲਣ 'ਤੇ ਉਸ ਨੂੰ ਪੂਰੇ ਪਿੰਡ ਵਿੱਚ ਘੁੰਮਾਇਆ ਜਾਂਦਾ ਹੈ। ਇਸ ਪਰੇਡ ਦੌਰਾਨ ਪਿੰਡ ਦੇ ਹਰ ਉਮਰ ਦੇ ਲੋਕ ਸ਼ਾਮਲ ਹੁੰਦੇ ਹਨ। ਇਹ ਲੋਕ ਪਰੀਆਂ ਅਤੇ ਸਿਪਾਹੀਆਂ ਦੇ ਪਹਿਰਾਵੇ ਵਿੱਚ ਹੁੰਦੇ ਹਨ।
ਤਸਵੀਰ ਸਰੋਤ, AFP
ਇਸ ਦੌਰਾਨ ਇੱਕ ਖਾਸ ਤਰੀਕੇ ਦਾ ਨਾਚ ਫੂਗਾ (ਐਸਕੇਪ) ਕੀਤਾ ਜਾਂਦਾ ਹੈ। ਇਸ ਨਾਚ ਵਿੱਚ ਲੋਕ ਹੱਥਾਂ-ਪੈਰਾਂ ਵਿੱਚ ਬੇੜੀਆਂ ਲਾਏ ਹੋਏ ਗੁਲਾਮਾਂ ਦੀ ਨਕਲ ਕਰਦੇ ਹਨ।
ਇਹ ਤਿਉਹਾਰ ਅਗਲੇ ਦਿਨ ਸਵੇਰੇ ਖ਼ਤਮ ਹੁੰਦਾ ਹੈ।
