You’re viewing a text-only version of this website that uses less data. View the main version of the website including all images and videos.
ਐੱਮਬੀਏ ਦੀ ਵਿਦਿਆਰਥਣ ਲਈ ਗੁਆਂਢੀਆਂ ਦਾ ਵਿਆਹ ਬਣਿਆ ਮੌਤ ਦਾ ਸਬੱਬ
- ਲੇਖਕ, ਅਰਵਿੰਦ ਛਾਬੜਾ
- ਰੋਲ, ਬੀਬੀਸੀ ਪੱਤਰਕਾਰ
ਸ਼ਨੀਵਾਰ ਰਾਤ ਨੂੰ ਐੱਮਬੀਏ ਦੀ ਵਿਦਿਆਰਥਣ ਸਾਕਸ਼ੀ ਅਰੋੜਾ ਆਪਣੇ ਘਰ ਦੀ ਛੱਤ ਤੋਂ ਗੁਆਂਢ ਵਿੱਚ ਚੱਲ ਰਿਹਾ ਵਿਆਹ ਸਮਾਗਮ ਦੇਖ ਰਹੀ ਸੀ ਕਿ ਅਚਾਨਕ ਇੱਕ ਗੋਲੀ ਉਸ ਦੇ ਆ ਕੇ ਵਜੀ ਤੇ ਉਸਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।
ਇਹ ਹਾਦਸਾ ਮੁਹੱਲਾ ਚੱਠਾ ਬਾਜ਼ਾਰ ਵਿੱਚ ਵਾਪਰਿਆ। ਜ਼ਿਲ੍ਹੇ ਦੇ ਐੱਸਐੱਸਪੀ ਜੇ.ਐਲਿਨ ਕੇਜ਼ੀਅਨ ਨੇ ਬੀਬੀਸੀ ਨੂੰ ਦੱਸਿਆ, "ਅਸੀਂ ਇੱਕ ਮੁਲਜ਼ਮ ਅਸ਼ੋਕ ਖੋਸਲਾ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਜਦਕਿ ਇੱਕ ਮੁਲਜ਼ਮ ਅਜੇ ਫਰਾਰ ਹੈ।''
"ਮ੍ਰਿਤਕ ਸਾਕਸ਼ੀ ਅਰੋੜਾ ਜਲੰਧਰ ਦੇ ਇੱਕ ਕਾਲਜ ਤੋਂ ਐੱਮਬੀਏ ਕਰ ਕਰ ਰਹੀ ਸੀ ਤੇ ਉਸ ਦੇ ਗੁਆਂਢ ਵਿੱਚ ਹੀ ਵਿਆਹ ਸਮਾਗਮ ਚੱਲ ਰਿਹਾ ਸੀ।''
'ਮੁਲਜ਼ਮ ਕੋਈ ਪੇਸ਼ਵਰ ਸ਼ੂਟਰ ਨਹੀਂ'
ਪੰਜਾਬ ਵਿੱਚ ਵਿਆਹ ਸਮਾਗਮਾਂ ਦੌਰਾਨ ਗੋਲੀ ਚੱਲਣ ਕਾਰਨ ਹੋਈ ਇਹ ਪਹਿਲੀ ਮੌਤ ਨਹੀਂ ਹੈ, ਪਹਿਲਾਂ ਵੀ ਕਈ ਹਾਦਸੇ ਵਾਪਰ ਚੁੱਕੇ ਹਨ ਪਰ ਪੱਕੇ ਅੰਕੜੇ ਮੌਜੂਦ ਨਹੀਂ ਹਨ।
ਪੁਲਿਸ ਅਨੁਸਾਰ ਖੋਸਲਾ ਪਰਿਵਾਰ ਨੇ ਆਪਣੀ ਧੀ ਦੇ ਵਿਆਹ ਤੋਂ ਪਹਿਲਾਂ ਸੰਗੀਤ ਦਾ ਪ੍ਰੋਗਰਾਮ ਰੱਖਿਆ ਹੋਇਆ ਸੀ। ਉਸੇ ਵੇਲੇ ਅਸ਼ੋਕ ਖੋਸਲਾ ਆਪਣੀ ਰਿਵਾਲਵਰ ਨਾਲ ਫਾਇਰ ਕਰ ਰਿਹਾ ਸੀ ਜਦਕਿ ਅਸ਼ੋਕ ਸੇਠੀ ਆਪਣੀ 12 ਬੋਰ ਦੀ ਦੁਨਾਲੀ ਨਾਲ ਫਾਇਰ ਕਰਕੇ ਜਸ਼ਨ ਮਨਾ ਰਿਹਾ ਸੀ।
ਪੁਲਿਸ ਨੇ ਕਤਲ ਦਾ ਕੇਸ ਦਰਜ ਕਰ ਲਿਆ ਹੈ। ਐੱਸਐੱਸਪੀ ਨੇ ਕਿਹਾ, "ਮੁਲਜ਼ਮ ਕੋਈ ਪੇਸ਼ਵਰ ਸ਼ੂਟਰ ਨਹੀਂ ਸਨ। ਫਾਇਰਿੰਗ ਦੌਰਾਨ ਮੁਲਜ਼ਮਾਂ ਨੂੰ ਪਤਾ ਹੋਵੇਗਾ ਕਿ ਕੁੜੀ ਬਾਹਰ ਖੜ੍ਹੀ ਹੈ ਤੇ ਗੋਲੀ ਕਿਸੇ ਨੂੰ ਵੀ ਲੱਗ ਸਕਦੀ ਹੈ।''
ਪੁਲਿਸ ਅਨੁਸਾਰ ਇੱਕ ਰਿਵਾਲਵਰ ਬਰਾਮਦ ਕਰ ਲਿਆ ਹੈ ਜੋ ਇੱਕ ਲਾਇਸੈਂਸੀ ਹਥਿਆਰ ਸੀ ਜਦਕਿ ਦੁਨਾਲੀ ਅਜੇ ਬਰਾਮਦ ਨਹੀਂ ਹੋਈ ਹੈ।
