You’re viewing a text-only version of this website that uses less data. View the main version of the website including all images and videos.
ਕੈਟੇਲੋਨੀਆ ਸੰਕਟ: ਹਿਰਾਸਤ 'ਚ ਲਏ ਗਏ ਕੈਟੇਲੋਨੀਆ ਦੇ ਲੀਡਰ
ਸਪੇਨ ਦੀ ਹਾਈ ਕੋਰਟ ਦੇ ਹੁਕਮਾਂ ਤੋਂ ਬਾਅਦ ਬਰਖ਼ਾਸਤ ਕੀਤੇ ਗਏ ਕੈਟੇਲੋਨੀਆ ਦੇ 8 ਲੀਡਰਾਂ ਨੂੰ ਹਿਰਾਸਤ 'ਚ ਲੈ ਲਿਆ ਗਿਆ।
ਸਰਕਾਰੀ ਵਕੀਲ ਨੇ ਹਾਈ ਕੋਰਟ 'ਚ ਕੈਟੇਲੋਨੀਆ ਦੇ 9 ਲੀਡਰਾਂ 'ਚੋਂ 8 ਨੂੰ ਰਿਹਾਸਤ 'ਚ ਲਏ ਜਾਣ ਦੀ ਮੰਗ ਕੀਤੀ ਸੀ, ਜੋ ਅਦਾਲਤ ਸਾਹਮਣੇ ਪੇਸ਼ ਨਹੀਂ ਹੋਏ ਸੀ।
ਇਨ੍ਹਾਂ 'ਤੇ ਦੇਸ਼ਧ੍ਰੋਹ, ਸਰਕਾਰ ਖ਼ਿਲਾਫ ਅੰਦੋਲਨ ਚਲਾਉਣ ਤੇ ਸਰਕਾਰੀ ਫੰਡ ਦੀ ਦੁਰਵਰਤੋਂ ਦਾ ਕੇਸ ਸੀ।
ਵਕੀਲ ਨੇ ਦੇਸ ਨਿਕਾਲਾ ਦਿੱਤੇ ਗਏ ਕੈਟੇਲੋਨੀਆ ਦੇ ਨੇਤਾ ਕਾਰਲਸ ਪੁਆਇਦੇਮੋਂਟ ਲਈ ਯੂਰਪੀਅਨ ਅਰੇਸਟ ਵਰੰਟ ਜਾਰੀ ਕਰਨ ਦੀ ਅਪੀਲ ਕੀਤੀ ਹੈ।
ਬੈਲਜੀਅਮ 'ਚ ਰਹਿ ਰਹੇ ਪੁਆਇਦੇਮੋਂਟ ਨੇ ਇਸਨੂੰ ''ਸਿਆਸੀ'' ਟ੍ਰਾਇਲ ਦੱਸਿਆ ਹੈ।
ਇੱਕ ਅਕਤੂਬਰ ਨੂੰ ਕੈਟੇਲੋਨੀਆ ਦੀ ਅਜ਼ਾਦੀ ਲਈ ਰਾਏਸ਼ੁਮਾਰੀ ਤੋਂ ਬਾਅਦ ਸਪੇਨ 'ਚ ਸੰਵਿਧਾਨਕ ਖ਼ਤਰਾ ਪੈਦਾ ਹੋ ਗਿਆ ਸੀ।
ਪਿਛਲੇ ਹਫ਼ਤੇ ਸਪੇਨ ਦੇ ਪ੍ਰਧਾਨਮੰਤਰੀ ਮਾਰੀਆਨੋ ਰਜੋਏ ਨੇ ਸਥਾਨਕ ਸੰਸਦ ਨੂੰ ਭੰਗ ਕਰਕੇ ਕੈਟੇਲੋਨੀਆ 'ਤੇ ਸਿੱਧਾ ਸ਼ਾਸ਼ਨ ਲਾਗੂ ਕਰ ਦਿੱਤਾ।
ਇਹ ਉਸ ਵੇਲਾ ਸੀ ਵਾਪਰਿਆ ਜਦੋਂ ਕੈਟੇਲੋਨੀਆ ਦੇ ਨੇਤਾਵਾਂ ਨੇ ਵੋਟਿੰਗ ਕਰਕੇ ਅਜ਼ਾਦੀ ਦਾ ਐਲਾਨ ਕਰ ਦਿੱਤਾ ਸੀ।
ਕੈਟੇਲੋਨੀਆ ਦੀ ਸਰਕਾਰ ਮੁਤਾਬਕ 90 ਫੀਸਦ ਲੋਕਾਂ ਨੇ ਅਜ਼ਾਦੀ ਦੇ ਹੱਕ 'ਚ ਵੋਟਿੰਗ ਕੀਤੀ ਸੀ।
ਨੌਵੇਂ ਲੀਡਰ ਤੇ ਸਾਬਕਾ ਵਪਾਰਕ ਮੰਤਰੀ ਸਾਂਤੀ ਵਿਲਾ ਲਈ ਜ਼ਮਾਨਤ ਮੰਗੀ ਗਈ। ਉਨ੍ਹਾਂ ਰਾਏਸ਼ੁਮਾਰੀ ਤੋਂ ਪਹਿਲਾਂ ਹੀ ਅਸਤੀਫਾ ਦੇ ਦਿੱਤਾ ਸੀ।
'ਮਹੌਲ ਠੀਕ ਨਹੀਂ'
ਪੁਆਇਦੇਮੋਂਟ ਦੇ ਵਕੀਲ ਨੇ ਖ਼ਬਰ ਏਜੰਸੀ ਰਾਇਟਰਜ਼ ਨੂੰ ਦੱਸਿਆ ਹੈ ਕਿ ਉਹ ਸਪੇਨ ਤੇ ਬੈਲਜੀਅਮ ਨੂੰ ਸਹਿਯੋਗ ਦੇਣਗੇ, ਪਰ ਜੱਜਾਂ ਸਾਹਮਣੇ ਪੇਸ਼ ਨਹੀਂ ਹੋਣਗੇ ਕਿਉਂਕਿ, ''ਮਹੌਲ ਠੀਕ ਨਹੀਂ ਹੈ''।
ਬਾਰਸੀਲੋਨਾ 'ਚ ਬੀਬੀਸੀ ਦੇ ਪੱਤਰਕਾਰ ਟੌਮ ਬਰਿੱਜ ਨੇ ਦੱਸਿਆ ਕਿ ਸਪੇਨ ਦੀ ਸਰਕਾਰ ਨੇ ਦੱਸਿਆ ਕਿ ਉਸ ਦਾ ਅਦਾਲਤ 'ਤੇ ਕਿਸੇ ਤਰ੍ਹਾਂ ਦਾ ਕੋਈ ਪ੍ਰਭਾਵ ਨਹੀਂ ਹੈ।
