ਕਿਸਾਨ ਅੰਦੋਲਨ: ‘ਅਣਜਾਣ’ ਕਿਸਾਨਾਂ ਵਿੱਚ ਜਾ ਕੇ ਉਨ੍ਹਾਂ ਨੂੰ ਆਪਣਾ ਬਣਾਉਣ ਵਾਲੀ ‘ਲਾਡੋ ਰਾਣੀ’ ਕੀ ਕਹਿੰਦੀ ਹੈ
- ਲੇਖਕ, ਦਲੀਪ ਸਿੰਘ
- ਰੋਲ, ਬੀਬੀਸੀ ਪੱਤਰਕਾਰ
“ਉਸ ਰਾਤ ਉਨ੍ਹਾਂ ਨੂੰ ਦੇਖ ਕੇ ਮੈਂ ਬਹੁਤ ਰੋਈ, ਕਿਉਂਕੀ ਇਹ ਨਹੀਂ ਪਤਾ ਕਿ ਹੁਣ ਕਦੋਂ ਮਿਲਣਾ ਹੈ, ਮਿਲਣਾ ਹੈ ਵੀ ਜਾਂ ਨਹੀਂ।”
ਭਾਰਤ ਦੀ ਰਾਜਧਾਨੀ ਦਿੱਲੀ ਦੇ ਨਰੇਲਾ ਦੀ ਰਹਿਣ ਵਾਲੀ ਸਮ੍ਰਿਤੀ ਆਰਿਆ ਦੇ ਇਹ ਕਹਿੰਦਿਆਂ ਹੀ ਅੱਖਾਂ ਵਿੱਚੋਂ ਅੱਥਰੂ ਵਗਣ ਲੱਗੇ।
ਕੇਂਦਰ ਸਰਕਾਰ ਵੱਲੋਂ ਖੇਤੀ ਕਾਨੂੰਨ ਵਾਪਸ ਲਏ ਜਾਣ ਮਗਰੋਂ ਕਿਸਾਨਾਂ ਦੇ ਦਿੱਲੀ ਦੀਆਂ ਸਰਹੱਦਾਂ ਤੋਂ ਵਾਪਸ ਗਏ ਛੇ ਮਹੀਨੇ ਹੋ ਗਏ ਹਨ।
ਦਿੱਲੀ ਦੀਆਂ ਬਰੂਹਾਂ 'ਤੇ ਕਿਸਾਨ ਅੰਦੋਲਨ ਵਿੱਚ ਹਿੱਸਾ ਲੈ ਚੁੱਕੀ ਸਮ੍ਰਿਤੀ ਕਿਸਾਨਾਂ ਵਿੱਚ 'ਲਾਡੋ ਰਾਣੀ' ਦੇ ਤੌਰ 'ਤੇ ਜਾਣੀ ਜਾਣ ਲੱਗੀ।
ਭਾਵੇਂ ਕਿ ਪਹਿਲਾਂ ਵਾਂਗ ਸਮ੍ਰਿਤੀ ਦੀ ਮੁਲਾਕਾਤ ਕਿਸਾਨਾਂ ਨਾਲ ਨਹੀਂ ਹੁੰਦੀ ਪਰ ਜਿਨ੍ਹਾਂ ਨੂੰ ਉਹ ਮਿਲੀ ਸੀ ਉਨ੍ਹਾਂ ਨਾਲ ਹੁਣ ਵੀ ਸਾਂਝ ਬਣੀ ਹੋਈ ਹੈ।
ਕੇਂਦਰ ਸਰਕਾਰ ਵੱਲੋਂ ਤਿੰਨੋ ਖੇਤੀ ਕਾਨੂੰਨ ਵਾਪਸ ਲਏ ਜਾਣ ਦਾ ਐਲਾਨ ਹੋਇਆ ਤਾਂ ਦਿੱਲੀ ਦੀਆਂ ਸਰਹੱਦਾਂ ਉੱਤੇ ਬੈਠੇ ਕਿਸਾਨਾਂ ਨੇ ਇੱਕ ਸਾਲ ਬਾਅਦ ਆਪੋ-ਆਪਣੇ ਘਰਾਂ ਨੂੰ ਚਾਲੇ ਪਾਏ।
ਸਿੰਘੂ ਬਾਰਡਰ ਉੱਤੇ ਕਿਸਾਨ ਅੰਦੋਲਨ ਦਾ ਹਿੱਸਾ ਬਣੀ ਸਮ੍ਰਿਤੀ ਨਾਲ ਜਦੋਂ ਬੀਬੀਸੀ ਪੰਜਾਬੀ ਨੇ ਗੱਲ ਕੀਤੀ ਸੀ ਤਾਂ ਉਸ ਮਗਰੋਂ ਕਿਸਾਨ ਅੰਦੋਲਨ ਦੇ ਬਾਹਰ ਵੀ ਉਸ ਨੂੰ ਲੋਕ ਲਾਡੋ ਰਾਣੀ ਦੇ ਨਾਂ ਨਾਲ ਜਾਣਨ ਲੱਗੇ।
ਬੀਬੀਸੀ ਪੰਜਾਬੀ ਨਾਲ ਦਸੰਬਰ 2021 ਵਿੱਚ ਪਹਿਲੀ ਵਾਰ ਕੀਤੀ ਗੱਲਬਾਤ ਮਗਰੋਂ ਉਸਨੂੰ ਚਾਹੁਣ ਵਾਲਿਆਂ ਦਾ ਘੇਰਾ ਸੋਸ਼ਲ ਮੀਡੀਆ ਰਾਹੀਂ ਹੋਰ ਵੀ ਵੱਧ ਗਿਆ।
ਕਿਸਾਨਾਂ ਨਾਲ ਨਰੇਲਾ ਦੇ ਇਸ ਪਰਿਵਾਰ ਦੀ ਸਾਂਝ ਇੰਝ ਪਈ
ਸਮ੍ਰਿਤੀ ਦੀ ਮਾਂ ਸਮੀਕਸ਼ਾ ਹਾਕੀ ਖੇਡਦੇ ਰਹੇ ਹਨ ਅਤੇ ਪਿਤਾ ਰਜਿੰਦਰ ਆਰਿਆ ਕ੍ਰਿਕਟ ਦੇ ਸ਼ੌਕੀਨ ਹਨ।
ਦੋਵਾਂ ਨੇ ਨਰੇਲਾ ਵਿੱਚ ਹੀ ਕੱਪੜਿਆਂ ਦੀ ਦੁਕਾਨ ਖੋਲ੍ਹੀ ਪਰ ਕੁਝ ਸਮੇਂ ਬਾਅਦ ਕੋਰੋਨਾਵਾਇਰਸ ਕਾਰਨ ਲੱਗੇ ਲੌਕਡਾਊਨ ਦੀ ਵਜ੍ਹਾ ਨਾਲ ਕੰਮ ਠੱਪ ਹੋ ਗਿਆ ਅਤੇ ਦੁਕਾਨ ਬੰਦ ਕਰਨੀ ਪਈ।
ਇਸ ਪਰਿਵਾਰ ਨੇ ਸਿੰਘੂ ਬਾਰਡਰ ਜਾਣਾ ਸ਼ੁਰੂ ਕੀਤਾ 26 ਜਨਵਰੀ 2021 ਤੋਂ ਬਾਅਦ ਜਦੋਂ ਕਿਸਾਨਾਂ ਦੀ ਟਰੈਕਟਰ ਰੈਲੀ ਹੋਈ।
ਇਸੇ ਦਿਨ ਕਈ ਕਿਸਾਨ ਟਰੈਕਟਰਾਂ ਨਾਲ ਦਿੱਲੀ ਸਥਿਤ ਲਾਲ ਕਿਲ੍ਹੇ ਵੀ ਪਹੁੰਚ ਗਏ ਸਨ।
ਤਸਵੀਰ ਸਰੋਤ, Smriti Arya
ਗਾਜ਼ੀਪੁਰ ਬਾਰਡਰ ਉੱਤੇ ਬੈਠੇ ਕਿਸਾਨ ਆਗੂ ਰਾਕੇਸ਼ ਟਿਕੈਤ ਦੇ ਹੰਝੂਆਂ ਦਾ ਅਸਰ ਅਜਿਹਾ ਹੋਇਆ ਕਿ ਇਹ ਪਰਿਵਾਰ ਵੀ ਕਿਸਾਨਾਂ ਦੇ ਨਾਲ ਜਾ ਕੇ ਖੜ੍ਹ ਗਿਆ।
ਅਮਰੀਕ ਸਿੰਘ ਮੋਹਾਲੀ ਦੇ ਚਿੱਲਾ ਪਿੰਡ ਦੇ ਵਸਨੀਕ ਹਨ। ਸਿੰਘੂ ਬਾਰਡਰ ਉੱਤੇ ਉਹ ਆਪਣੇ ਪਿੰਡ ਦੇ ਕੁਝ ਲੋਕਾਂ ਅਤੇ ਸਾਥੀਆਂ ਨਾਲ ਖੇਤੀ ਕਾਨੂੰਨਾਂ ਖਿਲਾਫ਼ ਅੰਦੋਲਨ ਵਿੱਚ ਹਿੱਸਾ ਲੈ ਰਹੇ ਸਨ।
ਬੀਬੀਸੀ ਪੱਤਰਕਾਰ ਅਰਵਿੰਦ ਛਾਬੜਾ ਨਾਲ ਗੱਲਬਾਤ ਦੌਰਾਨ ਅਮਰੀਕ ਸਿੰਘ ਸਮ੍ਰਿਤੀ ਅਤੇ ਉਸ ਦੇ ਮਾਪਿਆਂ ਦੇ ਸਿੰਘੂ ਬਾਰਡਰ ਆਉਣ ਵੇਲੇ ਦਾ ਸਮਾਂ ਯਾਦ ਕਰਦੇ ਹਨ।
ਉਹ ਕਹਿੰਦੇ ਹਨ, ''ਉਹ ਕਹਿਣ ਲੱਗੇ ਕਿ ਅਸੀਂ ਤੁਹਾਡੇ ਨਾਲ ਲੰਗਰ ਵਿੱਚ ਸੇਵਾ ਕਰਨੀ ਹੈ। ਅਸੀਂ ਕਿਹਾ ਕਿ ਸੇਵਾ ਕਰੋ ਜੀ, ਜਿਵੇਂ ਬਾਕੀ ਕਰਦੇ ਹਨ ਤੁਸੀਂ ਵੀ ਸੇਵਾ ਕਰੋ। ਹਾਲਾਤ ਜਿਹੋ ਜਿਹੇ ਵੀ ਹੋਣ ਇਹ ਪਰਿਵਾਰ ਕਈ ਕਿੱਲੋਮੀਟਰ ਸਫ਼ਰ ਤੈਅ ਕਰਕੇ ਰੋਜ਼ਾਨਾ ਸਿੰਘੂ ਬਾਰਡਰ ਆਉਣ ਲੱਗਾ। ਸਾਡਾ ਭੈਣ-ਭਰਾਵਾਂ ਵਾਲਾ ਪਿਆਰ ਪੈ ਗਿਆ।''
ਬੀਬੀਸੀ ਪੰਜਾਬੀ ਦੀ ਲਾਡੋ ਰਾਣੀ ਨਾਲ ਕੀਤੀ ਦਸੰਬਰ 2021 ਦਾ ਇੰਟਰਵਿਊ
ਜਦੋਂ ਲਾਲ ਕਿਲ੍ਹੇ ਦੀ ਘਟਨਾ ਹੋਈ ਤਾਂ ਕਿਸਾਨਾਂ ਦੇ ਅੰਦੋਲਨ ਖਿਲਾਫ਼ ਵਿਰੋਧ ਵੀ ਹੋਇਆ। ਅਮਰੀਕ ਸਿੰਘ ਕਹਿੰਦੇ ਹਨ ਕਿ ਇਸ ਵੇਲੇ ਸਾਨੂੰ ਬਾਹਰੀ ਵਿਅਕਤੀਆਂ ਤੋਂ ਹੋਰ ਵੀ ਸੁਚੇਤ ਰਹਿਣ ਕਿਹਾ ਗਿਆ ਸੀ।
ਉਹ ਕਹਿੰਦੇ ਹਨ, ''ਸਾਨੂੰ ਕਿਹਾ ਗਿਆ ਸੀ ਕਿ ਤੁਹਾਡੇ ਲੰਗਰ ਵਿੱਚ ਕੋਈ ਵੀ ਗੜਬੜੀ ਹੋਈ ਤਾਂ ਤੁਸੀਂ ਆਪ ਜ਼ਿੰਮੇਵਾਰ ਹੋਵੋਗੇ, ਓਪਰੇ ਬੰਦੇ ਤੋਂ ਬੱਚ ਕੇ ਰਹਿਣ ਦੀ ਤਾਕੀਦ ਕੀਤੀ ਗਈ ਸੀ। ਅਸੀਂ ਆਪਣੇ ਲੋਕਾਂ ਨੂੰ ਨਵੇਂ ਬੰਦਿਆਂ ਉੱਤੇ ਨਿਗਾਹ ਰੱਖਣ ਲਈ ਕਿਹਾ ਹੋਇਆ ਸੀ। ਉਹ ਦੂਰੋਂ ਨਜ਼ਰ ਵੀ ਰੱਖਦੇ ਸਨ।''
ਇਹ ਵੀ ਪੜ੍ਹੋ
ਅਮਰੀਕ ਸਿੰਘ ਦੇ ਪਰਿਵਾਰ ਨਾਲ ਖ਼ਾਸ ਸਾਂਝ
ਸਮ੍ਰਿਤੀ ਅਤੇ ਉਸ ਦੇ ਪਰਿਵਾਰ ਦੀ ਅਮਰੀਕ ਸਿੰਘ ਦੇ ਪਰਿਵਾਰ ਨਾਲ ਖ਼ਾਸ ਲਗਾਅ ਹੈ।
ਉਨ੍ਹਾਂ ਦਾ ਅਮਰੀਕ ਸਿੰਘ ਦੇ ਪੰਜਾਬ ਦੇ ਜ਼ਿਲ੍ਹੇ ਮੋਹਾਲੀ ਦੇ ਪਿੰਡ ਚਿੱਲਾ ਅਕਸਰ ਆਉਣਾ ਜਾਣਾ ਹੁੰਦਾ ਹੈ।
ਅਮਰੀਕ ਸਿੰਘ ਦੇ ਪੁੱਤਰ ਅਤੇ ਧੀ ਨਾਲ ਸਮ੍ਰਿਤੀ ਦਾ ਭੈਣ ਭਰਾਵਾਂ ਵਾਲਾ ਰਿਸ਼ਤਾ ਕਾਇਮ ਹੋ ਗਿਆ ਹੈ।
ਅਕਸਰ ਸਮ੍ਰਿਤੀ ਅਤੇ ਉਸ ਦਾ ਪਰਿਵਾਰ ਅਮਰੀਕ ਸਿੰਘ ਦੇ ਪਰਿਵਾਰ ਨਾਲ ਵੀਡੀਓ ਕਾਲ ਜਾਂ ਫੋਨ ਕਾਲ ਰਾਹੀਂ ਗੱਲਬਾਤ ਕਰਦਾ ਰਹਿੰਦਾ ਹੈ।
ਸਮ੍ਰਿਤੀ ਕਹਿੰਦੀ ਹੈ ਕਿ ਉਸਦੇ ਆਪਣੇ ਨਿੱਕੇ ਭਰਾ ਤੋਂ ਇਲਾਵਾ ਵੀ ਕਈ ਭਰਾ ਬਣ ਗਏ ਹਨ।
ਤਸਵੀਰ ਸਰੋਤ, Smriti Arya
ਉਹ ਕਹਿੰਦੀ ਹੈ ਕਿ ਨਿਊਜ਼ੀਲੈਂਡ ਰਹਿੰਦੇ ਇੱਕ ਨੌਜਵਾਨ ਮਨਪ੍ਰੀਤ ਰੰਧਾਵਾ ਨੇ ਕਿਹਾ ਕਿ ਉਹ ਆਪਣੀ ਧੀ ਨੂੰ ਵੀ ਸਮ੍ਰਿਤੀ ਵਾਂਗ ਹੀ ਪਾਲਣਾ ਚਾਹੁੰਦਾ ਹੈ।
ਸਮ੍ਰਿਤੀ ਕੈਨੇਡਾ ਰਹਿੰਦੇ ਦਪਿੰਦਰ ਸਿੱਧੂ ਬਾਰੇ ਗੱਲ ਕਰਦਿਆਂ ਕਹਿੰਦੀ ਹੈ, ''ਉਸ ਦੀ ਕੋਈ ਭੈਣ ਨਹੀਂ ਹੈ ਅਤੇ ਉਹ ਉਸਨੂੰ ਗੁੱਡੀ ਕਹਿੰਦਾ ਹੈ।''
ਪੰਜਾਬੀਆਂ ਵੱਲੋਂ ਨਿੱਘਾ ਸੁਆਗਤ
ਸਮ੍ਰਿਤੀ ਅਤੇ ਉਸਦੇ ਮਾਪੇ ਦੱਸਦੇ ਹਨ ਕਿ ਕਿਸਾਨ ਅੰਦੋਲਨ ਜਦੋਂ ਮੁਲਤਵੀ ਹੋਇਆ ਅਤੇ ਕਿਸਾਨ ਵਾਪਸ ਜਾਣ ਲੱਗੇ ਤਾਂ ਉਹ ਵੀ ਨਾਲ ਹੀ ਪੰਜਾਬ ਰਵਾਨਾ ਹੋਏ ਸਨ।
ਤਸਵੀਰ ਸਰੋਤ, Amrik Singh
ਉਸ ਮਗਰੋਂ ਉਨ੍ਹਾਂ ਦਾ ਪੰਜਾਬ ਦੇ ਕਈ ਹਿੱਸਿਆਂ ਵਿੱਚ ਜਾਣਾ ਹੋਇਆ। ਲੋਕਾਂ ਵੱਲੋਂ ਸਮ੍ਰਿਤੀ ਤੇ ਉਸਦੇ ਪਰਿਵਾਰ ਦਾ ਇੰਨਾ ਨਿੱਘਾ ਸੁਆਗਤ ਹੋਇਆ ਕਿ ਉਹ ਇਸ ਨੂੰ ਕਦੇ ਨਹੀਂ ਭੁੱਲਣਗੇ।
ਸਮ੍ਰਿਤੀ ਕਹਿੰਦੀ ਹੈ, ''ਜੋ ਕਦੇ ਸੋਚਿਆ ਨਹੀਂ ਸੀ ਉਹ ਹੋਇਆ, ਲੋਕਾਂ ਨੇ ਸਾਡੇ ਉੱਤੇ ਫੁੱਲ ਵਰ੍ਹਾਏ, ਸਾਡੇ ਨਾਲ ਭੰਗੜੇ ਪਾਏ। ਅਹਿਜਾ ਸੁਆਗਤ ਦੇਖ ਅਸੀਂ ਸੁੰਨ ਹੋ ਗਏ।''
ਸਿੰਘੂ ਬਾਰਡਰ ਦਾ ਘਾਹ ਪਹੁੰਚ ਗਿਆ ਨਿਊਜ਼ੀਲੈਂਡ
ਨਿਊਜ਼ੀਲੈਂਡ ਰਹਿੰਦੇ ਜਤਿੰਦਰ ਸਿੰਘ ਵੀ ਸਿੰਘੂ ਬਾਰਡਰ 'ਤੇ ਸੰਘਰਸ਼ ਦਾ ਹਿੱਸਾ ਬਣੇ ਸਨ।
ਜਿਹੜੀ ਥਾਂ ਉੱਤੇ ਸਮ੍ਰਿਤੀ ਅਤੇ ਉਸ ਦਾ ਪਰਿਵਾਰ ਲੰਗਰ ਦੀ ਸੇਵਾ ਕਰਦਾ ਸੀ ਉੱਥੇ ਘਾਹ ਵੀ ਲਗਾਇਆ ਗਿਆ ਸੀ ਅਤੇ ਇਹ ਘਾਹ ਜਤਿੰਦਰ ਨੇ ਹੀ ਲਗਾਇਆ ਸੀ।
ਤਸਵੀਰ ਸਰੋਤ, Smriti Arya
ਸਮ੍ਰਿਤੀ ਦੇ ਘਰ ਵਿੱਚ ਗਮਲੇ ਵਿੱਚ ਇਹ ਘਾਹ ਲੱਗਿਆ ਹੈ ਜੋ ਸਿੰਘੂ ਬਾਰਡਰ ਉੱਤੇ ਲਗਾਇਆ ਗਿਆ ਸੀ।
ਸਮ੍ਰਿਤੀ ਨੇ ਇਹੀ ਘਾਹ ਭਾਰਤ ਆਏ ਜਤਿੰਦਰ ਨੂੰ ਸੰਘਰਸ਼ ਦੀ ਯਾਦ ਵਜੋਂ ਮੁੜਦੇ ਵੇਲੇ ਗਮਲੇ ਵਿੱਚ ਲਗਾ ਕੇ ਦਿੱਤੇ ਹਨ।
ਸਮ੍ਰਿਤੀ ਕਹਿੰਦੀ ਹੈ, ''ਅਸੀਂ ਉਸ ਥਾਂ ਉੱਤੇ ਸਮਾਂ ਬਿਤਾਇਆ, ਗੱਲਾਂ ਸਾਂਝੀਆਂ ਕੀਤੀਆਂ ਹਨ। ਜਦੋਂ ਇਹ ਘਾਹ ਮੈਂ ਵੀਰੇ ਨੂੰ ਦਿੱਤਾ ਤਾਂ ਸਾਰੇ ਭਾਵੁਕ ਹੋ ਗਏ।''
ਸਿੰਘੂ ਬਾਰਡਰ ਜਾ ਕੇ ਦੇਸ਼-ਵਿਦੇਸ਼ ਵਿੱਚ ਬੈਠੇ ਲੋਕਾਂ ਨਾਲ ਜੁੜਦੀ ਹੈ ਸਮ੍ਰਿਤੀ
ਇੱਕ ਸਾਲ ਤੱਕ ਸਿੰਘੂ ਬਾਰਡਰ ਅੰਦੋਲਨ ਕਾਰਨ ਬੰਦ ਰਿਹਾ। ਕਿਸਾਨ ਚਲੇ ਗਏ ਤਾਂ ਰਾਹ ਖੋਲ੍ਹ ਦਿੱਤਾ ਗਿਆ।
ਹੁਣ ਚੱਲਦੇ ਟ੍ਰੈਫਿਕ ਵਿੱਚ ਅੰਦਾਜ਼ਾ ਲਗਾਉਣਾ ਮੁਸ਼ਕਲ ਹੋ ਜਾਂਦਾ ਹੈ ਕਿ ਇਹ ਓਹੀ ਬਾਰਡਰ ਹੈ ਜਿੱਥੇ ਵੱਡੀ ਗਿਣਤੀ ਵਿੱਚ ਕਿਸਾਨ ਬੈਠੇ ਸਨ ਅਤੇ ਇਹ ਅੰਦੋਲਨ ਇਤਿਹਾਸਕ ਹੋ ਨਿੱਬੜਿਆ ਸੀ।
ਸਮ੍ਰਿਤੀ ਆਪਣੀ ਮਾਤਾ ਸਮੀਕਸ਼ਾ ਨਾਲ ਅਕਸਰ ਉਸੇ ਥਾਂ ਉੱਤੇ ਜਾਂਦੀ ਹੈ ਜਿੱਥੇ ਉਹ ਲੰਗਰ ਦੀ ਸੇਵਾ ਕਰਦੇ ਸਨ।
ਇੰਟਸਾਗ੍ਰਾਮ ਰਾਹੀਂ ਲਾਈਵ ਹੋ ਕੇ ਸਮ੍ਰਿਤੀ ਭਾਰਤ ਅਤੇ ਭਾਰਤ ਤੋਂ ਬਾਹਰ ਬੈਠੇ ਲੋਕਾਂ ਨਾਲ ਜੁੜਦੀ ਹੈ।
ਕਈ ਲੋਕ ਜੋ ਇੱਥੇ ਆ ਚੁੱਕੇ ਹਨ ਉਨ੍ਹਾਂ ਨੂੰ ਲਾਈਵ ਵੀਡੀਓ ਰਾਹੀਂ ਉਹ ਥਾਵਾਂ ਦਿਖਾਉਣ ਦੀ ਕੋਸ਼ਿਸ਼ ਕਰਦੀ ਹੈ ਜੋ ਅੰਦੋਲਨ ਦੌਰਾਨ ਲੋਕਾਂ ਦੇ ਜ਼ਿਹਨ ਵਿੱਚ ਰਹਿ ਗਈਆਂ।
ਸਮ੍ਰਿਤੀ ਦੇ ਵਿਆਹ ਨੂੰ ਲੈ ਕੇ ਜਦੋਂ ਹੋਈ ਬਹਿਸਬਾਜ਼ੀ
ਗੱਲਬਾਤ ਦੌਰਾਨ ਸਮ੍ਰਿਤੀ ਅਤੇ ਉਸ ਦਾ ਪਰਿਵਾਰ ਉਸ ਦੌਰਾਨ ਆਏ ਰਿਸ਼ਤਿਆਂ ਬਾਰੇ ਵੀ ਜ਼ਿਕਰ ਕਰਕੇ ਹੱਸਦਾ ਹੈ।
ਤਸਵੀਰ ਸਰੋਤ, Smriti Arya
ਸਮ੍ਰਿਤੀ ਕਹਿੰਦੀ ਹੈ ਕਿ ਉਸ ਦੇ ਵਿਆਹ ਨੂੰ ਲੈ ਕੇ ਤਕਰੀਬਨ ਰੋਜ਼ ਹੀ ਚਰਚਾ ਛਿੜ ਜਾਂਦੀ ਸੀ।
ਉੱਚੀ-ਉੱਚੀ ਹੱਸਦੀ ਉਹ ਕਹਿੰਦੀ ਹੈ, ''ਲੰਗਰ ਵਿੱਚ ਸੇਵਾ ਕਰਦੀਆਂ ਕੁਝ ਬੀਬੀਆਂ ਆਪਸ ਵਿੱਚ ਝਗੜਨ ਲੱਗੀਆਂ। ਇਸ ਦਾ ਕਾਰਨ ਇਹ ਸੀ ਕਿ ਉਨ੍ਹਾਂ ਵਿੱਚ ਇਸ ਗੱਲ ਨੂੰ ਲੈ ਕੇ ਆਪਸ ਵਿੱਚ ਬਹਿਸ ਹੋ ਗਈ ਸੀ ਕਿਸ ਦੇ ਮੁੰਡੇ ਦਾ ਵਿਆਹ ਸਮ੍ਰਿਤੀ ਨਾਲ ਹੋਵੇਗਾ।''
ਦਿੱਲੀ ਵਾਲਿਆਂ ਲਈ ਸਮ੍ਰਿਤੀ ਤੇ ਪੰਜਾਬ ਹਰਿਆਣਾ ਦੀ 'ਲਾਡੋ ਰਾਣੀ'
ਜਦੋਂ ਇਹ ਪਰਿਵਾਰ ਸਿੰਘੂ ਬਾਰਡਰ ਜਾਣ ਲੱਗਿਆ ਤਾਂ ਦਿੱਲੀ ਵਿੱਚ ਇਨ੍ਹਾਂ ਦੇ ਜਾਣਨ ਵਾਲਿਆਂ ਨੇ ਬਹੁਤ ਮੁਖਾਲਫ਼ਤ ਕੀਤੀ।
ਪਰਿਵਾਰ ਕਹਿੰਦਾ ਹੈ ਕਿ ਲੋਕ ਇੱਥੋਂ ਤੱਕ ਕਹਿੰਦੇ ਰਹੇ ਕਿ ਤੁਸੀਂ ਉੱਤੇ ਟਾਈਮ ਪਾਸ ਕਰਨ ਜਾਂਦੇ ਹੋ।
ਤਸਵੀਰ ਸਰੋਤ, Smriti Arya
ਪਰ ਲੋਕਾਂ ਦਾ ਨਜ਼ਰੀਆ ਉਦੋਂ ਬਦਲਿਆਂ ਜਦੋਂ ਬੀਬੀਸੀ ਪੰਜਾਬੀ ਦੀ ਖ਼ਬਰ ਰਾਹੀਂ ਸਮ੍ਰਿਤੀ ਅਤੇ ਉਸ ਦਾ ਪਰਿਵਾਰ ਦੁਨੀਆਂ ਸਾਹਮਣੇ ਆਇਆ।
ਸਮ੍ਰਿਤੀ ਕਹਿੰਦੀ ਹੈ, ''ਜਦੋਂ ਬੀਬੀਸੀ ਪੰਜਾਬੀ ਦੀ ਖ਼ਬਰ ਪ੍ਰਸਾਰਿਤ ਹੋਈ ਤਾਂ ਲੋਕਾਂ ਦਾ ਅਚਾਨਕ ਨਜ਼ਰੀਆ ਹੀ ਬਦਲ ਗਿਆ। ਮੇਰੇ ਦੋਸਤ ਜੋ ਮਜ਼ਾਕ ਉਡਾਉਂਦੇ ਸੀ ਉਹ ਆ ਕੇ ਲੰਗਰ ਅਤੇ ਅੰਦੋਲਨ ਬਾਰੇ ਪੁੱਛਣ ਲੱਗੇ ਕਿ ਕਿਵੇਂ ਦੇ ਲੋਕ ਹਨ, ਉੱਥੇ ਕੀ-ਕੀ ਹੁੰਦਾ ਹੈ।''
ਪੰਜਾਬ ਦੇ ਜੋ ਲੋਕ ਸਮ੍ਰਿਤੀ ਨੂੰ ਜਾਣਦੇ ਹਨ ਉਹ ਉਸ ਨੂੰ ਉਸ ਦੇ ਅਸਲੀ ਨਾਮ ਨਾਲੋਂ ਜ਼ਿਆਦਾ ਲਾਡੋ ਰਾਣੀ ਕਹਿੰਦੇ ਹਨ।
ਉਹ ਕਹਿੰਦੀ ਹੈ, ''ਦਿੱਲੀ ਵਿੱਚ ਮੇਰੇ ਮੁਹੱਲੇ ਵਾਲਿਆਂ ਨੂੰ ਕੋਈ ਫਰਕ ਨਹੀਂ ਪੈਂਦਾ। ਉਨ੍ਹਾਂ ਲਈ ਮੈ ਸਮ੍ਰਿਤੀ ਹੀ ਹਾਂ ਅਤੇ ਪੰਜਾਬ-ਹਰਿਆਣਾ ਦੇ ਲੋਕਾਂ ਲਈ ਮੈਂ ਲਾਡੋ ਰਾਣੀ ਹਾਂ।''
'ਮੈਂ ਲਿਖ ਕੇ ਦੇ ਸਕਦੀ ਹਾਂ ਕਿ ਪੰਜਾਬ ਦੇ ਲੋਕ ਮੈਨੂੰ ਨਹੀ ਭੁੱਲਣਗੇ'
ਉਚੇਰੀ ਸਿੱਖਿਆ ਲਈ ਸਮ੍ਰਿਤੀ ਹੁਣ ਕੈਨੇਡਾ ਜਾਣ ਦੀ ਤਿਆਰੀ ਵਿੱਚ ਹੈ। ਉਹ ਥੇਰਾਪੁਊਟਿਕ ਰੀਕ੍ਰਿਏਸ਼ਨ ਦਾ ਕੋਰਸ ਕਰਨ ਉਹ ਕੈਨੇਡਾ ਜਾ ਰਹੀ ਹੈ।
ਤਸਵੀਰ ਸਰੋਤ, Getty Images
ਇਹ ਸਵਾਲ ਪੁੱਛਣ ਉੱਤੇ ਕਿ ਉੱਥੇ ਜਾ ਕੇ, ਕਿ ਉਹ ਇਸ ਤਰ੍ਹਾਂ ਕਿਸਾਨ ਪਰਿਵਾਰਾਂ ਨਾਲ ਰਾਬਤਾ ਰੱਖ ਸਕੇਗੀ।
ਉਹ ਜਵਾਬ ਦਿੰਦੀ ਹੈ, ''ਇਹ ਮੇਰੀ ਗਰੰਟੀ ਹੈ ਅਤੇ ਲਿਖ ਕੇ ਦੇਣ ਨੂੰ ਤਿਆਰ ਹਾਂ ਕਿ ਪੰਜਾਬ ਦੇ ਲੋਕ ਮੈਨੂੰ ਨਹੀਂ ਭੁੱਲ ਸਕਦੇ।''
ਗੱਲ ਖ਼ਤਮ ਕਰਦਿਆਂ ਉਹ ਅੰਦੋਲਨ ਦੌਰਾਨ ਦਿੱਲੀ ਵਾਲਿਆਂ ਲਈ ਬਣੇ ਇੱਕ ਗਾਣੇ ਦੇ ਬੋਲ ਦੁਹਾਰਾਉਂਦੀ ਹੋਈ ਕਹਿੰਦੀ ਹੈ।
ਕਈ ਦਿੱਲੀ ਵਾਲਿਆਂ ਦਾ ਲੱਗਣਾ ਨਹੀਂ ਦਿਲ, ਕਰਨਗੇ ਯਾਦ ਦਿਲਦਾਰ ਆਏ ਸੀ
ਮੁੜਾਂਗੇ ਪੰਜਾਬ ਜਦੋਂ ਜਿੱਤ ਕੇ ਮੈਦਾਨ, ਦਿੱਲੀ ਰਾਜਧਾਨੀ ਦੱਸੂ ਸਰਦਾਰ ਆਏ ਸੀ
ਇਹ ਵੀ ਪੜ੍ਹੋ
ਇਸ ਲੇਖ ਵਿੱਚ Google YouTube ਤੋਂ ਮਿਲੀ ਸਮੱਗਰੀ ਸ਼ਾਮਲ ਹੈ। ਕੁਝ ਵੀ ਡਾਊਨਲੋਡ ਹੋਣ ਤੋਂ ਪਹਿਲਾਂ ਅਸੀਂ ਤੁਹਾਡੀ ਇਜਾਜ਼ਤ ਮੰਗਦੇ ਹਾਂ ਕਿਉਂਕਿ ਇਸ ਵਿੱਚ ਕੁਕੀਜ਼ ਅਤੇ ਦੂਜੀਆਂ ਤਕਨੀਕਾਂ ਦਾ ਇਸਤੇਮਾਲ ਕੀਤਾ ਹੋ ਸਕਦਾ ਹੈ। ਤੁਸੀਂ ਸਵੀਕਾਰ ਕਰਨ ਤੋਂ ਪਹਿਲਾਂ Google YouTube ਕੁਕੀ ਪਾਲਿਸੀ ਤੇ ਨੂੰ ਪੜ੍ਹਨਾ ਚਾਹੋਗੇ। ਇਸ ਸਮੱਗਰੀ ਨੂੰ ਦੇਖਣ ਲਈ ਇਜਾਜ਼ਤ ਦੇਵੋ ਤੇ ਜਾਰੀ ਰੱਖੋ ਨੂੰ ਚੁਣੋ।
End of YouTube post
