US Senate pass deal to end record-breaking govment shutdown

One deal wey di aim na to end di US govment shutdown don pass for di Senate, e allow for di record-breaking pause to dey broken.

After one weekend of negotiations for Washington, one minority of Democrats togeda wit Republicans vote in favour of di agreement.

Di vote na first step for di procedure towards passing one compromise to fund govment since money finish on 1 October.

E go need to clear several more roadblocks - including vote from di House of Representatives - before federal employees and services return, but na di first serious sign of progress after 40 days of deadlock.

Di current shutdown na di longest on record for US, and until dis weekend, e bin be like say di Republican and Democratic lawmakers bin dey stalemate.

Many govment services bin don dey suspended since October, and around 1.4 million federal employees dey on unpaid leave or working without pay.

Di shutdown don also get wide ranging impacts on services, including US air travel and food benefits for 41 million low-income Americans.

Na Senate Majority Leader John Thune and White House negotiate di deal, wit Democratic senators Jeanne Shaheen and Maggie Hassan of New Hampshire, and Angus King of Maine, wey be independent wey dey caucus wit di Democrats.

Republicans - wey hold 53-47 majority for di Senate - bin need di measure to clear one 60-vote minimum threshold.

Dem dey able attract eight votes from di oda side of di aisle, while dem lose just one for Kentuck,y Senator Rand Paul, wey vote against after saying di bill go increase national debt.

Di deal include agreement for vote for December on extending healthcare subsidies wey dey due to expire dis year, key issue Democrats bin dey reason and want action on.

Takeaways from di shutdown

Democratic Party leaders bin say dem no go support new funding for govment operations until Congress address di subsidies wey go help tens of millions of Americans pay for health insurance wey dey purchased through government-run exchanges.

Some high-profile Democrats don criticise colleagues wey side wit Republicans to end di shutdown without concrete guarantees on healthcare, wit California Governor Gavin Newsom wey call di decision "pathetic".

Di measure also include three appropriations bills to fund agencies like veterans affairs and agriculture, as well as a continuing resolution to finance di rest of di govment until 30 January - meaning anoda govment shutdown fit dey corner by early next year.

E also include guarantees say federal workers go dey paid for time during di shutdown, and funding for di Supplemental Nutrition Assistance Program (Snap) - essential food safety net for one in eight Americans - until next September.

A vote on di deal go only be di first procedural step for di new funding agreement and e go still need to dey approved by US House of Representatives, wia e dey likely to see im own challenges.

Wit one bipartisan Senate vote to approve funding, e be like di longest shutdown for US history dey draw to a close.

Suspended federal employees go return to work. Dem, and odas wey dey too "essential" to send home, go start to dey receive pay cheques – including back pay – once again.

Air travel for US go return to normal somehow. Food aid for low-income Americans go resume. National parks go reopen.

Di ordeals, great and small, wey di shutdown don cause for many Americans go end.

Di political consequences of dis record standoff, however, go continue even as di govment return to work.

Dis na three major takeaways now wey e be like say di end don near.

Democrats dey divided

For di Democrats wey voted along wit Republicans, di pain from di shutdown don become too much. For odas for di party, however, na di cost of backing down na im dey unbearable.

"I no fit support deal wey dey still leave millions of Americans wondering how dem go to pay for dia health care or weda dem go dey able to afford to get sick," Senator Mark Warner of Virginia tok for statement.

Di way dis shutdown dey end dey sure to reopen old wounds between di party activist and left-wing base and im institutionalist, centrist establishment. Di divides inside di party, wey last week dey celebrate electoral victories for Virginia and New Jersey, dey sure to sharpen.

Democrats bin dey vex over Republican-backed cuts to govment programmes and reductions for di federal workforce. Dem don accuse Donald Trump of pushing – and breaking – di boundaries of presidential power. Dem don warn say di nation dey move towards authoritarianism.

Di shutdown, for many on di left, na a chance for Democrats to draw line for sand. And now wey e be like say govment go reopen wit no fundamental changes or new limits on Trump, many on di left go feel say na a wasted opportunity. And dem go vex.

Trump hard line pay off

Trump no push im party to compromise wit Democrats. And in di end, that hard line pay off.

Senate Republicans promise to vote on govment health-insurance subsidies. But vote no be guarantee, and little dey wey Trump and im team give up on Day 40 wey dem for no agree to on day one. Di Senate Democrats wey finally go anoda road as dia party to reopen di govment say dem get little hope of headway wit Republicans.

Republicans stick togeda and convince just enough Democrats say dem no go shift.

Na almost five years since di last govment shutdown, during Trump first presidential term. Chances be say di next one go come much sooner dan dat.