Lagos State govment order investigation into circumstances wey surround death of Chimamanda Adichie son as Euracare Hospital respond to allegations

Di Lagos State govment don order investigation into di circumstances wey surround di death of Nigerian writer Chimamanda Ngozi Adichie.

Dis dey come afta Adichie personal account on di death of her son bin go viral on Saturday 10 January.

Di Lagos State govment condole wit di family of di author and say Govnor Babajide Sanwo-Olu don direct di Health Facility Monitoring and Accreditation Agency (HEFAMAA) to immediately commence thorough, independent, and transparent investigation into di circumstances wey surround di incident, "with a view to unravel di immediate and remote causes of di death".

Special Adviser to di Govnor on Health, Dr Kemi Ogunyemi say in line wit dis directive, HEFAMAA don since commence investigation and don visit di facility involved as part of di ongoing inquiry. Di agency go conduct comprehensive review of all allegations and reports wey relate to di incident.

"Di investigation go examine di allegations raised, including compliance wit established clinical protocols, professional conduct, patient safety standards, and di roles and responsibilities of all parties wey dey involved. Findings of di investigation go dey public as soon as di process dey concluded, for di interest of transparency and public accountability," di statement tok.

Di Lagos State govment assure di public say any individual or institution wey dem find guilty of negligence, professional misconduct, or regulatory violations go face di full wrath of di law, in accordance wit existing legal and regulatory frameworks.

"While di investigation dey go on, di Govment urge di public to remain calm and avoid speculation, as due process dey dey followed to ensure fairness, justice, and credibility of outcomes."

Euracare Hospital respond

Meanwhile, Euracare Hospital don respond to di allegations wey Chimamanda Ngozi Adichie sama dem ova di death of her son.

For one leaked detailed personal account, Adichie say her son for dey alive if no be di incident for Euracare Hospital on 6 January.

Adichie tok-tok pesin Omawumi Ogbe tell BBC say di personal account wey dey currently circulate for local media bin dey shared by Adichie within closed circle of family and friends, and add say e no dey intended for public release.

"While we dey saddened say such deeply personal account of grief and trauma bin dey leaked, di details therein highlight di devastating clinical failures di family now dey forced to confront. We hope say di substance of dat message, wey detail di gross medical negligence wey lead to dis tragedy, remain di central focus even as we look forward to di truth and accountability."

For statement wey dem send to BBC, Euracare say some report about di incident dey inaccurate as dem sympathise wit di family.

Di hospital describe diasef as reputable centre for complex medical care, and say dem get internationally trained professionals.

"Di patient, wey bin dey critically ill, bin dey referred to our facility for specific diagnostic procedures after e receive treatment for a period of time at two paediatric centres.

"Upon arrival, our medical team immediately provide care in line wit established clinical protocols and internationally accepted medical standards, including di administration of sedation wia clinically indicated," di statement tok.

Euracare say in di course of Nkanu care, dem work collaboratively wit external medical teams as recommended by im family and ensure say all necessary clinical support bin dey provided.

"Despite dis concerted efforts, di patient sadly pass away less dan 24 hours afta e present for our facility."

Di hospital say dem don commence detailed investigation wey dey in line wit dia clinical governance standards and best practices.

Euracare say dem remain committed to engage transparently and responsibly wit all clinical and regulatory processes.

"We recognise say di family dey grieve irreplaceable loss and we go continue to support dem in any way wey go bring comfort during dis devastating period."

BBC News Pidgin bin report say Adichie and her family announce di death of her son Nkanu Nnamdi, one of di twin boys wey di renowned author bin announce dia births for 2025.

According to one statement from Omawumi Ogbe wey be di tok-tok pesin for Adichie, Nkanu die on Wednesday, 7 January, "afta brief illness".

"Di family dey devastated by dis ogbonge loss, and we dey beg make dia privacy dey respected during dis incredibly difficult time," di statement tok.

'We dey demand thorough, transparent investigation, and consequences' - Adichie sister-in-law

For interview wit Arise News, Dr Anthea Esege Nwandu wey be Chimamanda Ngozi Adichie sister-in-law say dem bin admit Nkanu for Atlantis Pediatric Hospital for Lagos State. She say Nkanu bin dey stabilised and plan bin dey to move am go Johns Hopkins Hospital for Maryland, United States.

Dr Nwandu say dem refer dem go Euracare Hospital wia di boy suppose do MRI and wia dem go put 'central line' ahead of im travel to di US.

"For di MRI suite, dem report say im bin dey restless. To do di MRI scan, you need make patient dey still, so e receive IV sedation for di imaging. Shortly afta dat, di medical director tell Chimamanda say e receive too much sedation," Dr Nwandu tok.

She also allege say dem no monitor di pikin well and accuse di hospital of negligence.

Dr Nwandu say wetin dem want na justice.

"Nkanu no fit come back, e don go. But we no want make im death be in vain. Apologies no dey enough, to take responsibility no dey enough. We dey demand thorough, transparent investigation, and consequences."