Why Ghana Speaker adjourn sitting again till further notice

Speaker of Parliament, Alban Sumana Bagbin, don suspend Parliament sitting till further notice once again since di October 22 adjournment.

Di Speaker make dis decision on Thursday sake of di absence of Members of Parliament from di New Patriotic Party (NPP).

According to di Speaker, dia absence leave di House witout di quorum to conduct business of di day.

“We no get business bifor us to transact. In view of di failure of di business committee to sit…we dey once again adjourn di House.

"I proceed once more to adjourn the meeting indefinitely," di Speaker tok.

Speaker of di parliament for October 22 bin suspend di House proceedings till further notice afta one chaotic scenes for di chamber over gbege about which party go hold di parliamentary majority.

Bifor di suspension, di lawmakers bin discover say four MPs bin don switch allegiance and go run for different parties for di 7 December general election.

Speaker Alban Bagbin den declare say dia seats dey vacant, e bin argue say di constitution no allow MPs to defect.

For normal parliament, di decision – wey dey challenged for court – mean say opposition National Democratic Congress (NDC) don become di majority party.

President Nana Akufo-Addo New Patriotic Party (NPP) bin ask di Supreme Court to question di Speaker move weather e align wit di constitution.

Court den ask di Speaker to suspend im declaration until dem decide - e never clear wen dia judgement go come.

To suspend parliament sitting get significant implications as e mean say goment no fit get approval for important funding and laws, wey fit affect how di kontri dey run for di coming year.

Gbege as NDC MPs occupy majority side again, as dem wait arrival of NPP caucus

Tori be say as Parliament bin meet again on Thursday morning to sit, only MPs from di National Democratic Congress (NDC) bin present for di chamber by 8:30 a.m.

Dem bin take di seats wey dey di majority side wey normally dey reserved for di caucus wey get di majority numbers.

Di New Patriotic Party (NPP) members bin never land dia dat time.

Some NDC members bin raise worry about di absence of di NPP MPs das dem see di situation as lack of commitment by di governing party to parliamentary business.

Na di Speaker Alban Bagbin bin call di session to address some pending issues, including budgetary allocations and legislative reforms, wey don dey delay sake of di recent parliamentary issue.

Di whole drama bin show di ongoing power struggle between di two parties.

Di NDC MPs don maintain say dia attendance na just to show say dem dey committed to settle di national issues.

Meanwhile, di NPP MPs delay don add to di tensions wey already dey within di House.