د يمن پر دفاع وزارت بريدونو لسګونه وژلي
د يمن پر دفاع وزارت يو لړ بريدونو د چارواکو په وينا لږترلږه ۵۲ کسان وژلي او ۱۶۲ نور ټپيان کړي دي.
د صنعاء باب الیمن سيمه کې زاړه ښار ته پر ورغلي لارې د ودانيو غونډ دروازو سره لومړی د يوه ځانمرګي موټر بم چاودنه او بيا دننه روغتون کې وسله واله نښته شوې ده.
روغتيايي سرچينو ويلي لږترلږه دوه تنه بهرني روغتيايي کارکوونکي د وژل شویو ترمنځ دي.
د دفاع وزیر محمد ناصر دمګړۍ د واشنګټن په سفر دی.
عیني شاهدانو ویلي، سخته درنه چاودنه یې واورېده، چې شېبه وروسته سیمې ته روغتیايي امبولانسونه ورسېدل.
تر اوسه کومې ډلې د برید پړه پر غاړه نه ده اخیستې خو یمني چارواکو د دغو بریدونو پړه په عربي ټاپووزمه کې پر القاعدې شبکې اچولې ده.
د حکومت یو بل وزیر بیا پړه د پخواني ولسمشر علي عبدالله صالح په ملاتړو اچولې.
امنیتي چارواکي وايي وسله وال کسان يې ټول وژلي او سیمه یې په خپله ولکه کې راوستې.
د وزارت یوې سرچینې رویټرز خبري اژانس ته وییلي چې ځانمرګي خپل موټر هغه مهال په دروازه را دننه کړو کله چې کارکوونکو په وزارت کې کار پیل کړی.
دا پېښه د هغو وسله والو تر بریدونو وروسته شوې، چې یمني چارواکي او امنیتي کسان یې په نښه کړي وو. د رپوټونو له مخې پر یمني چارواکو بریدونه ډېر شوي دي.
په دې وروستیو کې یمني امنیتي ځواکونه د سیمه ییزو یاغیانو او له القاعدې اورپکو سره په جګړه بوخت دي. دا په داسې حال کې ده چې حکومت هڅه کوي د قانون نه مراعتول او په پوځ کې درځونه کنټرول کړي.
له واکه د مخکني ولسمشر علي عبدالله صالح تر لیرې کېدا وروسته د یمن لنډمهالي حکومت پرمهال سیاسي او امنیتي بې ثباتي ډېره شوې ده.
د حکومت پرضد څو ځلې ولسي لاریونونه وشول.
