ارمینیا: ترکیې مو جنګي الوتکه غورځولې

ارمینیا وايي، ناګورنو قره باغ سیمه کې د جګړې پر مهال د ترکیې یوې جیټ الوتکې د دوی یوه جنګي الوتکه غورځولې ده.

د ارمینیا بهرنیو چارو وزارت وايي، د ترکیې یوې ایف - ۱۶ ډوله الوتکې د ارمینیا په خاوره کې د دغه هېواد ایس یو - ۲۵ ډوله جنګي الوتکه وېشتلې او پیلوټ یې وژل شوی دی.

ترکیه- چې په دغه شخړه کې د اذربایجان ملاتړ کوي- د ارمینیايي الوتکې وېشتلو تور ردوي.

د یوې ناندریزې غرنۍ سیمې ملکیت پر سر دغه جګړه کې له تېرو دریو ورځو راهیسې د ملکي کسانو په ګډون نژدې ۱۰۰ کسان وژل شوي دي.

نړیواله ټولنه دغه سیمه د اذربایجان ملکیت مني، خو د ۱۹۸۸ - ۹۴ کلونو تر منځ د پخواني شوروي اتحاد د دې غړو هېوادونو له خپلمنځي جګړې وروسته د ارمینیايي توکمه کسانو له لوري کنټرولېږي.

اذربایجان وايي، په هوايي ځواک کې یې ایف ۱۶ ډوله الوتکې نشته، خو ترکیه دغه ډول الوتکې لري.

دغه جګړه چې درې ورځې مخکې پیل شوه اوس داسې ښکاري چې له ناګورنو کره باغ سیمې بهر ته خپرېږي، ځکه د دواړو هېوادونو ځواکونه د یوه بل پر خاوره د مخامخ بریدونو تورونه پورې کوي.

دواړه هېوادونه دغه راز پر یوه بل د جګړې پیلولو تور پورې کوي.

ترکیه برالا د اذربایجان ملاتړ کوي، خو روسیه چې په ارمینیا کې پوځي اډه لري او له اذربایجان سره دوستانه اړیکي لري، د سملاسي اوربند غوښتنه کوي.

د ارمینیا دفاع وزارت ویانده شوشان ستیفانیان وايي، د دغه هېواد ایس یو - ۲۵ ډوله الوتکه د سې شنبې پر ورځ ګهیځ مهال وویشتل شوه او ''اتل پیلوټ یې ووژل شو. ''

ترکیه څه وايي؟

ترکیې سملاسي دغه تور رد کړ او 'بې بنسټه ' یې وباله.

د ترکیې د ولسمشر رجب طیب اردوغان سلاکار فهریتین التون وايي:

''ارمینیا باید د بې ځایه پروپاګند پر ځای سملاسي له هغو سیمو ووځي چې اشغال کړې یې دي. ''

تر اوسه د الوتکې ویشتل کېدو کوم ثبوت نه دی وړاندې شوی او اذربایجان یې د وړاندې کولو غوښتنه کړې.