ټرمپ ایران ته: که څه وکړئ زر برابره سخت ځواب به درکړو
د عکس سرچینه، EPA
د امریکا ولسمشر ډونلډ ټرمپ ایران ته خبرداری ور کړ که د هېواد د ګټو پرضد یې کوم ګام پورته کړي، زر برابره سخت ځواب به ورکړي.
ډونلډ ټرمپ خپل ټوېټر کې لیکلي، د ځینې رپوټونو له مخې تهران ښايي د امریکا پر وګړو یا ګټو د برید لپاره پلان جوړوي.
ښايي د ولسمشر ټرمپ ټوېټ د پولیټیکو خپرونې د رپوټ غبرګون کې وي.
دې رسنۍ ځانګړي رپوټ کې دعوه کړې چې ایران سوېلي افریقا کې د امریکا سفارت په نښه کول غواړي.
خو د سوېلي افریقا حکومت هم دې رپوټ ته د دوشنبې په ورځ غبرګون کې وویل دا رپوټ ارزوي.
د ډونلډ ټرمپ له ټویټ مخکې د امریکا حکومت د دې رپوټ په هکله څه نه دي ویلي.
پولټیکو د یوه امریکايي چارواکي له خولې ویلي، ایران په سوېلي افریقا کې د امریکا د سفیر لانا مارکس پر وژلو فکر کوي.
د دې رپوټ له مخې ایران هڅه کوي د سپاه پاسداران د قدس ځواکونو د مشر قاسم سلیماني د وژل کېدو غچ واخلي چې د تېر کال د ژمي لومړيو کې د امریکا بې پیلوټه الوتکې په بغداد هوايي ډګر کې په نښه کړ.
ښاغلي ټرمپ دوو پرلپسې ټوېټونو کې لیکلي: "د رسنیو د رپوټونو له مخې ایران ممکن د یوې هدفي وژنې یا پر امریکا د ګوزار پلانول غواړي، چې د ترهګر قومندان قاسم سلیماني غچ واخلي، هغه هم د داسې سړي چې د امریکايي پوځیانو د وژلو لپاره یې راتلونکي پلانونه جوړول او هم یې کلونه کلونه مرګ او رنځ پیدا کړی و. د متحده ایالتونو پرضد هر ډول برید به د ایران پرضد زر برابره برید سره مخ شي. "
د سوېلي افریقا غبرګون
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د سوېلي افریقا څارګره اداره هم دغه هېواد کې د امریکايي سفیر جان انا مارکس د وژلو د پلان په هکله رپوټ ته غبرګون ښيي.
دغه اداره خپل بیان کې زیاتوي، د رپوټ له خپرېدو خبر دي او د دې هېواد او ښکېلو هېوادونو خلکو ته ډاډ ورکوي چې مسله ارزوي.
سوېلي افریقا نور په دې هکله څه نه وايي، خو ټینګار کوي:
"باید پام وکړو چې د تور ډول او یاد شوی ګواښ موږ ته اجازه نه راکوي چې د پلټنو په هکله نورې خبرې وکړو."
ایران څه وايي؟
په دا مهال د ایران د بهرنیو چارو وزارت ویاند سعید خطیب زاده وايي، د قاسم سلیمان د وژنې دوسیې حقوقي تعقیب روان دی:
"د ایران اسلامي جمهوریت لکه څنګه چې بیا بیا ویلي د سردار سلیماني د مجرمانه او بزدلانه وژنې په تړاو په ټولو کچو نړیوال حقوقي تعقیب روان دی."
د هغه په خبره، "دا ترهګریز ګام نه بښل کېږي او نه هېرېږي. "
د ایران د سپاه پاسدران د بهرنۍ څانګې یا قدس ځواکونو مشر قاسم سلیماني د جنورۍ په دریمه په داسې مهال چې د عراق د حشد شعبي دوه مهم قومندانان هم ور سره وو له بغداد هوايي ډګر د وتلو پرمهال د امریکا د بې پیلوټه الوتکې برید کې ووژل شول.
