سعودي شهزاده خالد بن طلال له بنده خوشې شو
د عکس سرچینه، AFP/Getty Images
رپوټونه وايي، سعودي عربستان د میلیاردر ولید بن طلال ورور خالد بن طلال تر کابو یوه کلن بند وروسته خوشی کړ. ویل کېږي د خبریال جمال خاشقجي د وژلو له کبله پر سعودي تر فشار وروسته خالد خوشی شوی دی.
شهزاده خالد د سعودي د پاچا سلمان بن عبدالعزیز لمسی دی.
د شهزاده خالد بن طلال د خوشي کېدو خبر د هغه د کورنۍ درېیو غړو پر ټویټر خپور کړی، د هغه انځورونه یې خپاره کړي چې تر خوشي کېدا وروسته د کورنۍ غړي ماچي کوي او خپل زوی په غېږ کې نیسي.
د خالد ورېرې شهزادګۍ ریم پر ټویټر لیکلي: "الحمد لله چې ته روغ یې"، او د کورنۍ له غړو سره یې د شهزاده خالد انځورونه خپاره کړي دي.
د عکس سرچینه، AFP/Getty Images
د سعودي حکومت تر اوسه په ښکاره د هغه د نیول کېدو او یا چې څه ډول خوشی شوی، په اړه څرګندونه نه ده کړې.
۲۰۰ شهزادګان
"وال سټریټ جورنال" ویلي، شهزاده خالد کابو ۱۱ میاشتې د سرکوبولو په هغو عملیاتو کې ونیول شو، چې په تېره نومبر میاشت کې د سعودي پر واکمنې کورۍ ګڼ ګوته نیوونکي پکې ونیول شول.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
په نیول شویو کې ۲۰۰ شهزادګان، چارواکي او سوداګر هم وو چې د ریاض ریټز کارلټن هوټل کې ساتل کېدل.
د سعودي حکومت وايي، دا نیونې د فساد ضد کمپاین په لړ کې شوې، خو مخالفین یې بیا واييو چې دا د شهزاده محمد بن سلمان له خوا د خپل واک ډېرولو په پار هڅې دي، چې خپل سیالان وځپي.
شهزاده ولید بن طلال هم د نیولو شویو په نوملړ کې و، چې د تېرې جنورۍ لومړیو کې له حکومت سره د نا اعلان شوې مالي هوکړې تر لاسلیکولو وروسته خوشی شو.
له شهزاده ولید بن طلال سره د شوې معاملې په څېر، سعودي چارواکو له نورو ګڼو نیول شویو کسانو سره هم د هغوی د خلاصون په اړه مالي معامله کړې ده.
د عکس سرچینه، EPA
شهزاده خالد بن طلال داسې مهال خوشی شوی، چې پر سعودي عربستان د ترکیې استانبول کې د سعودي کونسلګرۍ د ننه د خبریال جمال خاشقجي د وژل کېدو په اړه د نړیوالو له خوا فشارونه او غوسه ډېره شوې ده.
څارونکي واييو د خاشقجي قضیې ته د سپتمبر ۱۱ له پېښې وروسته تر ټولو ناوړه دیپلوماتیکه شخړه ګڼل کېږي چې دا مهال سعودي عربستان ورسره مخامخ دی.
د تېرې جمعې په ورځ د ترکیې ولسمشر رجب طیب اردوغان وویل، د خاشقجي د وژلو امر د سعودي حکومت د "مشرتابه" له خوا شوی، خو د شهزاده نوم یې نه دی اخیستی.
