سعودي پخوانی وزیر د "یو میلیارد ډالرو مقابل" کې خوشی کړی

سعودي چارواکو د ملي ګارد پخوانی وزیر شهزاده متعب بن عبدالله له درې اونیزه بند وروسته، د "برابرښت معاملې" په لړ کې خوشی کړی دی.

وړاندې د سې شنبې په ورځ د سعودي یوه چارواکي د متعب د خوشي کولو په اړه خبر افشا کړ، چې وايي نوموړي حکومت ته څه باندې یو میلیارد ډالر ورکړي دي.

۶۵ کلن شهزاده متعب د راتلونکي پاچا په سترګه کتل کېږي. نوموړی خپل پلار پاچا عبدالله ته تر ټولو ګران او نژدې کس و او د خپل پلار واکمنۍ کې هم د واکمنې کورنۍ تر ټولو لوړ پوست ګومارل شوی و.

یوه سعودي چارواکي چې په هېواد کې د فساد د قضیو څېړلو ګډون کوونکی و، ویلي شهزاده متعب له حکومت سره د برابرښت هوکړه کې خپل فساد منلی دی.

دی وايي، که څه هم په ډاګه نه ده چې متعب به حکومت ته څومره پیسې ورکوي، خو تر یو میلیارد ډېرې اټکل شوې دي.

دغه چارواکي رویټرز خبري اژانس ته ویلي، د فساد قضیه کې درې نور تورن کسان هم له ورته برخلیک او معاملې سره مخامخېدونکي دي، چې یو پکې د سعودي د شاهي مراسمو پخوانی مشر محمد الطبیشي دی.

ځینې باوري سرچینې وايي، د سعودي لوی څارنوال د ځینو کسانو د خوشي کولو ژمنه کړې او لږترلږه پنځه نور کسان به تر قضايي تعقیب لاندې وي، چې تر اوسه یې هویت نه دی ډاګیزه شوی.

چارواکو د نومبر پر څلورمه د شهزاده ګانو او اوسنیو او پخوانیو وزیرانو په ګډون لسګونه کسان د فساد قضیې څېړلو په یوه کمپاین کې ونیول.

د سعودي وليعهد: ترهگري د اسلامي عقيدې نوم بدوي

"د بلک واټر څېړونکو بندي سعودي میلیاردر سر په تندي ځوړند کړي"

د سعودي او ایران سړه جګړه کومې خواته ځي؟

پیسې د ازادۍ مقابل کې: سعودي کې د بندي شهزاده ګانو او سوداګرو شتمنۍ

دا کسان وروسته تر هغه ونیول شول چې د سعودي پاچا سلمان بن عبدالعزیز د خپل زوی وليعهد شهزاده محمد په مشرۍ د فساد ضد یو کمیسیون جوړ کړ.

په نیول شویو کې ۱۱ شهزاده ګان، یو میلیاردر ولید بن طلال او څلور اوسني وزیران او لسګونه پخواني نور وزیران دي.

سعودي چارواکو د نیول شویو کسانو د فساد اړوندو پیسو کنګل کولو امر کړی او د هغوی فساد اړوند شتمنۍ یې د حکومت په نوم کړې دي.

لاندې د نیول شویو شهزاده ګانو او سوداګرو لیست دی: