ټرمپ: شمالي کوریا امریکایي زندانیان خوشې کړي
د عکس سرچینه، Reuters / AFP
د امریکا ولسمشر ډونلډ ټرمپ پر خپله ټوېټر پاڼه اعلان کړی چې شمالي کوریا درې تنه امریکایي وګړي له بنده خوشې کړي.
ولسمشر ټرمپ لیکلي، امریکا ته په بېرته راستنېدو به د دې درېیو کسانو تود هرکلی کوي.
د امریکا د بهرنیو چارو وزیر مایک پومپیو دا مهال د شمالي کوریا پلازمېنه پیونګیانګ کې دی، او داسې ګڼل کېږي چې د امریکایي زندانیانو د خوشې کېدو لپاره یې د شمالي کوریا له چارواکو سره مخامخ خبرې کړي.
ټاکل شوې ده چې د امریکا ولسمشر ډونلډ ټرمپ د شمالي کوریا له مشر کېم جونګ اون سره وګوري. ولسمشر ټرمپ په یوه ټویټ کې اعلان کړی چې د دې کتنې لپاره نېټه او ځای ټاکل شوي، خو نور جزیات یې نه دي ورکړي.
د دې درې تنو کوریایي نژاده امریکایي وګړو نومونه کېم هاک سونګ، ټوني کېم او کېم ډونګ چُل ښودل شوي.
دوی د شمالي کوریا د دولت ضد کړنو په تور نیول شوي ول، او ویل کېږي چې په زندان کې شاقه کار ته اړ ایستل شوي دي.
د عکس سرچینه، Reuters
کېم هاک سونګ په ۲۰۱۷ کال کې له شمالي کوریا سره د دښمنۍ په تور نیول شوی و.
ولسمشر ټرمپ پر خپله ټوېټر پاڼه لیکلي چې د درې واړو کسانو روغتیایي وضعیت ښه دی.
ټونې کېم په ۲۰۱۷ کال کې او کېم ډونګ چُل په ۲۰۱۵ کال کې د جاسوسۍ په اړه نیول شوي وو.
د ولسمشر ټرمپ او کېم جونګ اون تر خبرو وړاندې په دوه اړخیزه خبرو کې د زندانیانو برخلیک یوه مهمه موضوع وه.
د روانې میاشتې په پيل کې داسې رپوټونه رامخې ته شوي ول چې دا کسان له زندانه یوه هوټل ته لېږدول شوي، او له همدې کبله یې د خوشې کېدو تمې ډېرې شوې وې.
بل لور ته سویلي کوریا د دې زندانیانو د خوشې کېدو هرکلی کړی، او هیله یې څرګنده کړې چې دا ګام به د راتلونکو دوه اړخیزو خبرو لپاره ګټور وي.
