اسد الله جلالزى له غزني څخه

	ځايي چارواکي وايي د جگړې په ترڅ کې د امريکايي ځواکونو دوه ټانکونه هم ويجاړ شوي

سيمه ييز چارواکي وايي په جلېز ولسوالۍ کې د ځمکنيو عملياتو او بمبارۍ په ترڅ کې پنځه وسله وال طالبان هم وژل شوي دي.

د ميدان وردگو د امنيت امر اصف بڼوال بي بي سي ته وويل تېر ماښام د امريکا په مشرۍ ايتلافي او افغان ځواکونو په اسماعيلخېلو سيمه کې د مشکوکو وسله والو په ضد عمليات وکړل. دۀ زياته کړه چې په بمبارۍ او ځمکنۍ جگړه کې د طالبانو له مرگ ژوبلې سربېره، ولسي خلکو ته هم د سر زيان اوښتى.

دۀ وويل په لس تنو وژل شويو او ټپي شويو ملکي کسانو کې ماشومان هم شته.

د ښاغلي بڼوال په خبره، د جگړې په ترڅ کې د امريکايي ځواکونو دوه ټانکونه هم ويجاړ شوي، خو ايتلافي سرتېرو ته يې د مرگ ژوبلې په اړه څه ونه ويل.

هاخوا د وسله والو طالبانو يوۀ وياند، ذبيح الله مجاهد، وويل چې د جلېز په جگړه کې يې د امريکايي او افغان ځواکونو څلور گاډي ويجاړ کړي او پکې سپارۀ سرتېري يې وژل شوي دي.

په وروستيو اوونيو کې په ميدان وردگو کې د حکومت د مخالفو وسله والو خوځښتونه زيات شوي دي، چې افغان او نړيوال ځواکونه يې پوځي عملياتو او ځينې وخت مخامخ جگړې ته اړ ايستلي دي.