په وژل شويو او ټپي شويو خلکو کې ماشومان او ښځې هم شته

سيمه ييز خلک وايي تر ٥٠ زيات خلک، چې ښځې او ماشومان هم پکې دي، د گرشک ولسوالۍ حيدر اباد کلي کې کې وژل شوي دي.

د امريکا په مشرۍ د ايتلاف ځواکونو يوۀ وياند بي بي سي ته وويل دوى د ولسي خلکو د مرگ ژوبلې په اړه پلټنه پيل کړې ده.

د بهرنيو پوځونو نور وياندان وايي په هلمند کې بمباري د ايتلاف ځواکونو کړې، خو د ناټو ځواکونو د ملاتړ لپاره.

په لسگونو ځايي ييزو اوسېدونکو په سيمه کې د بي بي سي خبريال ته پر ټيليفون وويل چې د دوى په گمان له ٥٠ تر ٨٠ کسانو ملکي وگړي د گرشک په بمبارۍ کې وژل شوي دي.

د هلمند د پوليسو مشر حسين انډيوال ولسي خلکو د گڼې مرگ ژوبلې خبره تاييد کړه، خو دۀ هم کره شمېره ورنه شوه کړاى.

د سيمې خلک وايي تېره ورځ حيدر اباد ته نژدې د وسله والو طالبانو او بهرنيو ځواکونو تر منځ نښته وشوه، خو بمبارۍ پنځه ساعته وروسته له دغې جگړې پيل شوې - هغه مهال چې طالبانو سيمه پرې ايښې وه.

له ٥٠ تر ٨٠  په لسگونو ځايي ييزو اوسېدونکو په سيمه کې د بي بي سي خبريال ته پر ټيليفون وويل چې د دوى په گمان له ٥٠ تر ٨٠ کسانو ملکي وگړي د گرشک په بمبارۍ کې وژل شوي دي.

دوى وايي د مړو جسدونه يې له خاورو را ايستلي او غواړي چې ولايتي مرکز، لشکرگاه ته، يې چارواکو د ښوولو لپاره يوسي. خو وايي بهرنيو ځواکونو سيمه کلابنده کړې او څوک وتلو ته نه پرېږدي. په بمبارۍ کې د ټپيانو شمېره هم خورا لوړه ښوول کېږي.

د پوليسو مشر، حسين انډيوال، وايي دوى لاهم د پېښې په اړه پلټنه کوي او دا چې دوى پر بمبارۍ نه و خبر او بهرنيو ځواکونو پر خپل سر دغه کار کړى.

په وروستيو اونيو کې په زياتېدونکي توگه د بهرنيو ځواکونو په پوځي عملياتو کې د ولسي خلکو د مرگ ژوبلې راپورونه ورکړل شوي، چې ډېرى پېښې يې په سويل کې وې.

افغان حکومت په بيا بيا ويلي چې نور د خپلو ملکي وگړو مرگ ژوبلې ورته له زغمه وتلې.

يوه اونۍ مخکې په همدې ولسوالۍ کې د ٢٥ ولسي خلکو له وژل کېدلو وروسته ولسمشر حامد کرزي نړيوال ځواکونه په پوځي عملياتو کې پر بې پروايي او خپلسريتوب تورن کړل.

له وروستۍ پېښې پرته سږ ميلادي کال د وژل شويوي ولسي خلکو شمېرې له ٢٤٠ تر ٣٢٠ پورې ښوول کېږي.