بي بي سي نيوز کابل

	ځايي اوسېدونکي وايي خلکو د ١٠ وژل شويو مړي خښول چې الوتکو يې د جنازې پر مراسمو بمونه وغورځول

د وټه پور ولسوالۍ د څانگار کلي اوسېدونکي وايي کليوالو د بهرنيو ځواکونو په بمبارۍ کې د لسو وژل شويو ولسي خلکو مړي ښخول چې پر ځنازه کوونکو بيا بمبارۍ وشوه او شاوخوا پنځه ويشت کسان پکې مړه شول.

د ناټو ځواکونه وايي دوى په سيمه کې بمباري کړې ده، خو د ولسي خلکو د مرگ ژوبلې په اړه معلومات نه لري.

د دغو دوو بمباريو په اړه چارواکي، ځايي اوسېدونکي او ناټو ځواکونو خبرې ضد او نقيض دي.

د کونړ والي شالېزى ديدار وايي د ناټو ځواکونو په بمباريو کې ګڼ شمير ملکي وګړي مړه او ټپيان شوي. دۀ وويل په هوايي او ځمکنيو بريدونو کې وسله والو طالبانو ته هم درنه مرگ ژوبله اوښتې ده.

ښاغلي ديدار بي بي سي ته وويل: ''کوم راپور چې موږ ترلاسه کړى هغه دادى چې شل نفر مخالفين مړه او ١٦ زخميان دي. په دي جګړه کې ٢٥ نفر ملکي وګړي هم شهيدان شوي.''

د کليوالو په وينا، د ملکي خلکو لس تنه په لومړنۍ بمبارۍ کې ووژل شول، چې نهه تنه يې د يوې کورنۍ و.

يوۀ اوسېدونکي، شفيق الله خاطر، بي بي سي ته وويل دى په سيمه کې و چې بهرنيو الوتکو د لسو کسانو د جنازې پر مراسمو بمونه وغورځول.

سپين ږيري او مشران  کله چې موږ هغه لس کسان ښخول، طيارو بيا بمباري پيل کړه او پنځه ويشت خلک يې بيا ووژل. په وژل شويو کې يې ځينې ځايي مشران، علما او سپين ږيري هم وو شفيق الله خاطر، يو ځايي اوسېدونکى

هغه وايي: ''کله چې موږ هغه لس کسان ښخول، طيارو بيا بمباري پيل کړه او پنځه ويشت خلک يې بيا ووژل. په وژل شويو کې يې ځينې ځايي مشران، علما او سپين ږيري هم وو.''

د ناټو ځواکونو يوۀ وياند ولسي خلکو ته د مرگ ژوبلې راپورونه رد کړل او زياته يې کړه چې سرتېري يې په کونړ کې له څو خواوو تر بريد لاندې راغلي ول. دۀ وويل له بريد وروسته دوى اړ شول چې د 'اورپکو' ځايونه چې يو کور هم پکې و په بمبارۍ کې په نښه کړي.

وياند ډگرمن جان توماس وويل: ''لومړني راپورونه ښيي چې يو شمېر ياغيان وژل شوي دي. دم گړۍ، موږ هېڅ شواهد نه لرو چې ولسي خلکو ته دې مرگ ژوبله اوښتې وي.''

په وروستيو اونيو کې په افغانستان کې د ولسي خلکو مرگ ژوبله خورا لوړه شوې، چې د راپورونه له مخې، لوى دليل يې د بهرنيو ځواکونو لخواوو بمباريانې دي.