هلمند کې د "اتلانو" په نوم زر کسیزه پوځي قطعه جوړه شوه
د عکس سرچینه، MOD
- Author, خوشحال تایب
- دنده, بي بي سي
په هلمند کې تر وروستیو سختو جګړو او درنو تلفاتو وروسته افغان حکومت اوس په دغه ولایت کې یوه زر کسیزه قطعه جوړه کړه.
د "اتلانو " دغې قطعې غړو ته به د ملي امنیت په چوکاټ کې زده کړې ورکول کېږي او بیا به مخامخ له مخالفینو سره د جګړې کرښو ته لېږل کېږي. د افغان چارواکو په وینا ټاکل شوې چې په مهمو پوځي دندو کې ونډه واخلي.
د هلمند سیمه ییز مسؤلین تمه ښيي د اتلانو قطعه چې په هلمند کې بلده ده، د سیمي امنیت په خوندي کولو کې به مثبت رول ولوبوي.
د هلمند والي ویاند عمر ځواک په وینا دا چاره د ولس په غوښتنه ترسره شوې ده او په تشکيلاتو ډېری د سیمې بلد خلک دي.
خو د هلمند د ولایتي شورا مشر عطاالله افغان بیا د دغو کسانو د روزنې په اړه اندېښنه لري. ښاغلی افغان وايي که د دغې زر کسیزې قطعې غړو ته روزنه ور نه کړل شي او ښه سمبال نه شي نو ښايي له تمې سره سم پایله ونه لري.
د عکس سرچینه، MOD
هلمند له تېرو شاوخوا شلو کلونو راهیسې د سختو جګړو شاهد و. دلته د دفاع وزارت قول اردو او د پولیسو او ملي امنیت ستر پوځي ځواکونه پراته دي.
د پوځي چارو شنونکی عتیق الله امرخیل په وینا د اتل په نوم زر کسیزه قطعه ملیشو ته ورته ده. د ښاغلي امر خېل په وینا ملیشه ځواکونو وړاندې تر دې په افغانستان کې ښه پایله نه ده لرلې.
وړاندې تر دې هم په هلمند کې د "سونګوریانو " په نوم یوه قطعه موجوده وه چې په بېلابېلو عملیاتو کې ګډون کړی.
په هلمند کې د وروستیو سختو جګړو له امله لسګونه زره کسان له خپلو مېنو بې ځایه شوي. چې په اړه یې ملګرو ملتونو، او نورو نړیوالو سازمانونو او هېوادونو اندېښنه ښودلې ده.
