واشنګټن کې د افغان سفارت د دېوال بیا رغونه؛ بهرنیو چارو وزارت د فساد ادعا رد کړه
د افغانستان بهرنیو چارو وزارت په امریکا کې د افغان سفارت دېوال رغولو کې د اداري فساد په تړاو رپوټونه رد کړل.
دغه وزارت یوه خبرپانه کې وايي، د روڼتیا خوندي کولو او د حساب ور کولو اصل په پام کې نیولو لپاره ژمن دي، چې د پروژې اړوند ټول سندونه د هر اړخیزې څېړنې لپاره لویې څارنوالۍ او د پلټنې سترې ادارې ته وسپاري.
واشنګټن کې د افغانستان سفارت هم د پژواک خبري اژانس دا رپوټ رد کړی چې وايي، د دې سفارت دېوال جوړولو کې فساد شوی دی.
دا سفارت وايي، د دېوال لپاره ځانګړې شوې پیسې یوازې د یوه دېوال نه بلکې د سفارت د دریو دېوالونو پر جوړولو او رغولو لګول شوې دي.
وړمه ورځ پژوک خبري اژانس یوه څېړنیز رپوټ کې دعوه وکړه چې امریکا کې د افغانستان سفارت د ۷۰ متره دېوال رغولو ته د یوه شرکت ۸۸ زره ډالري وړاندیز رد کړی او دا کار یې د بلې کمپنۍ له لارې د یو میلیون اته لکه، ۲۵ زره ۸۳۹ ډالرو سره کړی دی.
د دې خبري اژانس رپوټ زیاتوي، افغان سفارت د دې دېوال جوړولو ته یو میلیون پنځه لکه او ۸۶ زره ډالر، د ارزولو لپاره یې ۱۲ زره ۷۵۰ ډالر او د خاورې ازمویلو ته ۲۱ زره ۲۵۰ ډالر، د تخنیکي سلاکارۍ لپاره ۶۴ زره ۸۳۹ ډالر او د تړون او تخنیکي سلاکارۍ لپاره یو لک پنځوس زره ډالر لګولي دي.
خو واشنګټن کې افغان سفارت د خبرپاڼې خپرولو سره وايي، دا پیسې یواځې پر یو دېوال لګول شوې نه دي، بلکې درې دېوالونه دي، چې څنګلورې ودانۍ پرې تکیا دي او هم د سفارت تخریب شوې ودانۍ او ګاونډ کې کور دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
افغان سفارت زیاتوي، کوم شرکت چې لومړیو کې ۸۸ زره ډالر وړاندیز کړي و، دا پیسې د دیوال جوړولو او نورو زیانمنو برخو لپاره نه وې، "بلکې دغه شرکت یوازې د ختیځ دیوال د ړنګې برخې د کنډوالو لرې کولو او د هغه د ېوال د نورې برخې د زیانمنېدو د مخنیوي لپاره لنډمهالې رغونې ته دا پیسې غوښتې وې".
افغان سفارت دا هم وايي، چې امریکا کې افغان سفیرې رویا رحماني د تړونونو غوره کولو کې رول نه درلود او یوازې وړاندیزونه یې ټول کړي او کابل ته استولي چې د ملي تدارکاتو کمېټه یې په تړاو پرېکړه وکړي.
د افغانستان د ملي تدارکاتو کمېټه د ولسمشر په څار کار کوي او د افغان حکومت ټول تړونونه باید د دې کمېټې په څار تصویب شي.
پژواک خبري اژانس افغان سفارت کې د مالي او اداري څانګې د ډیپلوماټانو له خولې دا هم وايي، چې د قراردادي شرکتونو پیسې نېغې شرکت ته نه ور کول کېږي بلکې د سفارت له مالي برخې د چک له لارې دریم کس ته ور کول کېږي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
خو واشنګټن کې افغان سفارت وايي، د دې دېوال د جوړولو پیسې د پژواک د ادعا خلاف دریم کس ته نه دي ور کول شوې.
"سفارت د چکونو د کاپیو په ګډون ټول داسې سندونه هم واک کې لري چې ثابتوي پیسې قراردادي شرکت ته نېغې ور کړل شوې دي".
پژواک خبري اژانس د یوې سرچینې له خولې وايي، "د دې پروژې د پیسو ناوړه کارولو لپاره رویا رحماني د دېوال د جوړولو مسوولیت له یو کس اخیستی او هغه بل کس ته یې د دې پروژې د څارونکي په توګه سپارلی چې د مالیې د پخواني سرپرست همایون قیومي سلاکار و".
