لویه څارنوالي: د سږ کاله له پيله تر اوسه ۱۶ څارنوالان وژل شوي

د افغانستان لویه څارنوالي وايي چې روان لمریز کال او په ځانګړې توګه وروستۍ میاشت د دغې ادارې د کارکوونکو لپاره خونړۍ وه. د لویې څارنوالي په کارکوونکو وروستی برید تېره ورځ د کابل ولایت په قرباغ ولسوالۍ کې شوی.

دغه برید چې د نا معلومو وسله والو له لورې د لویې څارنوالۍ اړوند څلورو څانوالانو د سپرلۍ پر موټر وشو، په پایله کې یې دوه تنه ووژل شول او دوه نور یې ژوبل شول.

لویه څارنوالۍ کې ښځینه کارمنې ډېرې شوې دي

ولسي جرګه او لویه څارنوالي یو بل ته له خپلو دريځونو تېرېږي

د افغانستان د لویې څارنوالۍ په خبره چې تر برید لاندې نیول شوي څارنوالان له کابل څخه د بګرام عدلي او قضايي مرکز ته د دندې لپاره روان وو.

د افغانستان د لویې څارنوالي ویاند جمشید رسولي بي بي سي ته وویل چې د روان لمریز کال له پیل څخه چې تر اوسه یې شاوخوا اته میاشتې تېرې شوې، د دغې ادارې اړوند ۱۶ تنه څارنوالان د هېواد په بېلا بېلو سیمو کې هدف ګرځول شوي او وژل شوي دي.

که څه هم تر اوسه کومې وسله والې ډلې د تېرې ورځې د برید مسؤلیت ندی منلی، خو ښاغلی رسولي په اداري فساد کې ښکېلې ډلې، د نشه یي توکو قاچاق کوونکې او تښتوونکې یا اختطافچي ډلې د څارنوالانو په نښه کولو تورنوي.

د هغه په خبره چې څارنوالان له دغو ډلو سره د مبارزې په لومړۍ کرښه کې دي.

ښاغلي رسولي وویل چې تر اوسه د سلګونو ترهګرو او مافیايي بانډونو دوسیې څارنوالانو څېړلې او قانون ماتوونکي یې زندان ته استولي دي.

د لویې څارنوالي د معلوماتو له مخې چې په افغانستان کې له تېرو څه باندې لسو کلونو راپدې خوا ۱۴۰ څارنوالان د هېواد په بېلا بېلو سېمو کې د هدفي بریدونو له امله وژل شوي دي.