د شربت ګلې د خوشې کولو امر شوی دی
د پاکستان د کورنیو چارو وزیر چودري نثار وايي، د شربت ګلې په نامه د هغې افغانې مېرمنې په ضمانت د خوشې کولو امر یې کړی، چې په ۱۹۸۰ مو کلونو کې یې د کډوالۍ پر مهال اخیستل شوي انځور نړېوال شهرت خپل کړ.
نوموړې د جعلي پاکستانۍ پېژندپاڼې د درلودو په تور په پېښور کې نیول شوې وه.
د عکس سرچینه، Alamy
رپوټونه وايي هغې د دغه جرم تر سره کول رد کړي دي.
ښاغلي نثار ویلي، شربت ګله پر بشري دلایلو خوشې کېږي، خو دی نه غواړي چې اړونده قضیه یې ختمه شي، ځکه په تړاو یې یو شمېر چارواکي په اداري فساد کې پر ښکېلتیا تر شک لاندې دي.
د شربت ګلې یاد شوی انځور د نیشنل جیوګرافیک مجلې پر پښتۍ خپور شوی ؤ، چې د جګړو له امله د کډوالۍ په یوه نړیوال سمبول بدل شوی ؤ.
د دغه انځور اخېستونکي سټیف مېککري د هغې نیول کېدل له انساني حقونو سرغړونه بللې.
شربت بي بي په ۱۹۸۴ کال کې افغانستان کې د جګړې پرمهال له خپلې کورنۍ سره پاکستان ته کډواله شوه او د پېښور په ناصرباغ کمپ کې اوسېده.
د عکس سرچینه، AFP/Getty
نوموړې هغه مهال مشهوره شوه چې نشنل جیوګرافیک په ۱۹۸۵ کال کې د هغې انځور خپلې مجلې کې خپور کړ. هغه مهال شربت ګله ۱۲ کلنه وه.
د انځور تر خپرېدو وروسته تر ۲۰۰۲ کال پورې د شربت ګلې ځای ځایګی څرګند نه و، خو وروسته همغه عکاس چې په ۱۹۸۵ کال کې یې انځور اخستی و، د هغې پلټنه پیل کړه.
نشنل جیوګرافیک چینل په ۲۰۰۲ کال کې د هغې د شنو سترګو له امله یو مستند فلم جوړ کړ چې ورپسې بیا دغه افغان مېرمنه د افغانستان د جګړې "مونالیزا" په نوم مشهوره شوه.
