پر خواله رسنیو د ښځو حقونو ته کمپاین؛ "یا ټول یا نه"
د عکس سرچینه، SOCIAL MEDIA
- Author, تورپېکۍ غرنۍ
- دنده, بي بي سي
افغانستان کې د طالبانو له خوا د ښځو پر زدکړو او کار بندیز له اعلان وروسته پر خواله رسنیو کمپاین پیل شوی دی.
د دغه کمپاین ګډونوال پر خواله رسنیو د "یا ټول یا نه" یا "آل اور نن" په نامه هشټګ کاروي او د ښځو د حقونو غوښتنه کوي.
پر خواله رسنیو د یاد هشټګ کاروونکي وايي، موخه یې د ښځو د حقونو غوښتنه او د ښځو د کار او زدکړو د بندیز پر وړاندې غږ پورته کول دي.
په دغه هشټګ کې د افغانانو تر څنګ ځینې بهرنیانو هم برخه اخیستې او افغانستان کې یې د ښځو ملاتړ کړی دی.
پر خواله رسنۍ د دغه کمپاین پیلوونکي په زدکړو او کار کې د مېرمنو په شمول د ټولو افغانانو پر ګډون ټینګار کوي او وايي، دا د ټولو مسولیت دی چې "په دغه کمپاین کې برخه واخلي."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
افغانستان کې د طالبانو حکومت د ډسمبر میاشت پر شلمه داسې حال کې د نجونو د پوهنتونونو د بندولو اعلان وکړ چې د یو شمېر ښځینه محصلینو ازموینې نیمګړې پاتې شوې.
په پوهنتونو کې د نجونو زدکړو له ځنډولو وروسته، د روانې ډسمبر میاشتې پر ۲۴ مه د طالبانو اقتصاد وزارت په یوه مکتوب کې پر هغو ښځو تر "دویم امره" د کار بندیز ولګاوه چې په کورنیو او بهرنیو این جیوګانو کې کار کوي.
دغو بندیزونو په کور دننه سربېره په نړیواله کچه د خلکو غوسه راوپارولې او پر طالبانو یې غږ کړی چې ژر تر ژره دې خپله پرېکړه بېرته واخلي.
د طالبانو د حکومت له لوري د افغان نجونو او ښځو پر زدکړه او کار د بندیز پرضد د نړیوالو غبرګونونو په درشل کې د ملګرو ملتونو مشر ویلي چې دا پرېکړه له بشر حقونو سرغړونه ده او باید لغوه شي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
انتوني ګوتېرېش پر خپله ټوېټر پاڼه لیکلي "د ښځو او نجونو د محرومولو او خاموشولو کړنې دوام لري چې دا کار د افغان ولس د کړاو او لویې رنځونې او د بالقوه افغانانو د بې توانه کولو لامل ګرځي."
د ملګرو ملتونو امنیت شورا بیا ویلي، په افغانستان کې پر مرستندویه کارمنو ښځو محدودیتونه له افغان ولس سره د طالبانو د ژمنو خلاف عمل او د نړیوالې ټولنې د تمو برعکس چاره ده.
امنیت شورا ویلي، د مرستندویه ټولنو پر ښځینه کارکوونکو د کار بندیز به پر بشري کړنو لوی او سم لاسي اغېز ولري.
له دغو بندیزونو وروسته یو شمېر این جیوګانو او بهرنیو بنسټونو افغانستان کې د خپلو فعالیتونو د بندولو اعلان هم کړی دی.
