تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
بلجیم کې خلک په موټر وهل شوي، ۶ کسان مړه دي
د بلجیم سویل کې د 'سټرېپي براکژنېرې' په نوم یوه کوچني ښار کې د خلکو پر ګڼې ګوڼې موټر خېژول شوی او تر اوسه دې پېښه کې د شپږ کسانو مړینه تایید شوې ده.
دا ښار د پلازمېنې بروکسل د سویل په شاوخوا ۵۰ کیلومترۍ کې پروت دی.
د رپوټونو له مخې دغه کسان چې شمېر یې شاوخوا ۲۰۰ تنو ته رسېده، د یکشنبې سهار یوه کارنیوال کې د ګډون لپاره راټول شوي وو.
د پولیسو یوې ویاندې بي بي سي ته ویلي چې پېښه کې ګڼ نور کسان ټپیان هم دي، چې د ځینو ټپونه ژور دي.
د دې پېښې په اړه څېړنې روانې دي خو پولیسو دا رد کړې چې ترهګریز برید دې وي.
د ځايي پولیسو یوې ویاندې کرېسټینا لانونکو ویلي: "دا یوه پېښه ده، ویرجنه پېښه. موټر خلک ووهل او غوښتل یې ادامه ورکړي، خو ژر د پولیسو لخوا ودرول شو."
هغې زیاته کړې چې چلوونکی او موټر کې نور سپاره کسان نیول شوي دي.
وړاندې د بلجیم ځینو رسنیو داسې رپوټونه ورکړي وو چې ګوندې دا پېښه د پولیسو لخوا د دغه موټر د تعقیب پر مهال چې د تښتېدو هڅه یې کوله، رامنځ ته شوې ده.
خو امنیتي سرچینو دا رپوټونه رد کړي دي.
د بلجیم کورنیو چارو وزیرې انلیس ورلیندېن پر خپل ټویټر لیکلي: "د نن سهار په دې پېښه کې د وژل شویو او ټپي شویو له کورنیو او ملګرو سره ژوره خواشیني څرګندوو."
هغې زیاته کړې چې د یوه ښکلې مېله په غمیزه اوښتې او دوی وضعیت له نږدې څاري.
