Feumar sguir de Shealg "bhorb" a' Ghuga a rèir luchd-strì

Na fir ann an Sùlasgeir a' spìonadh nan gugannan

Bidh Sgioba Shùlaisgeir a' spìonadh nan gugannan, gan sailleadh agus gan cur ann am baraillean ann an Sùlasgeir

Bidh a' bhuidheann Protect the Wild a' togail fianais taobh a-muigh Pàrlamaid na h-Alba ann an Dùn Èideann feasgar Disathairne an aghaidh sealg a' ghuga.

Tha sgioba à Nis air a bhith a' dol a Shùlasgeir, eilean beag mu 40 mìle tuath air Eilean Leòdhais, a h-uile samhradh airson nan ceudan bhliadhnaichean far am biodh iad uair a' marbhadh nam mìltean de dh'iseanan sùlaire.

Tha an luchd-iomairt ag argamaid nach eil an cleachdadh a dhìth tuilleadh mar a bha uair airson biadh a chumail ri sluagh a bha bochd.

'S e argamaid nan sealgairean gu bheil e mar phàirt den dualchas aca.

Fireannaich air na creagan ann an Sùlasgeir agus iad ann a' sealg a' ghuga

'S e argamaid nan sealgairean gu bheil an t-sealg mar phàirt den dualchas aca

Ann an agallamh san Scotsman as t-samhradh an-uiridh, thuirt Iain "Dods" MacPhàrlain, a tha air a bhith an Sùlasgeir còrr is 40 turas bho 1974, gum "biodh iad a' dèanamh fiughair a h-uile bliadhna" ris an turas.

Chuir e a' dìon air mar a bhios iad a' marbhadh nan iseanan, ag ràdh gu bheil e luath agus chaidh e às àicheadh gu bheil e an-iochdmhor.

Tha dragh air gu bheil gnàthasan eileanach a' sior dhol à bith.

Ge-tà, tha Protect the Wild agus luchd-glèidhteachais eile ag ràdh nach e "traidisean" a th' ann ach "cleachdadh borb le dìon laghail fhathast".

Sùlairean agus isean sùlaire air creigGetty Images

Feumaidh Sgioba Shùlaisgeir tagradh a chur gu NàdarAlba a h-uile bliadhna gus am faigh iad cead airson na seilge; am-bliadhna cha d' fhuair iad cead ach airson 500 isean a spadadh.

Thuirt a' bhuidheann riaghaltais gun do lùghdaich iad an àireamh bho 2,000 airson fàs a thoirt air na tha na de na h-eòin an dèidh buaidh flù nan eun.

Cha deach an t-sealg air adhart ann an 2020 air sgàth Covid.

Cha motha a chaidh na fir a Shùlasgeir ann an 2022 agus flù nan eun air buaidh mhòr a thoirt air eòin-mhara sna h-Eileanan an Iar agus Hiort, le sùlairean gu sònraichte a' fulang.

A-rithist, ann an 2023 agus 2024 cha deach na fir ann agus dragh mu bhuaidh a' ghalair a' leantainn.

Tha an luchd-glèidhteachais a' toirt cuireadh do dhaoine a dhol còmhla riutha feasgar Disathairne.

"A dh'aindeoin agus gu bheil e follaiseach gu bheil gu leòr den phoball na aghaidh is gu bheil àireamh nan sùlairean ann an Sùlaisgeir a' strì, tha Riaghaltas na h-Alba fhathast a' leigeil leis an t-sealg a dhol air adhart.

"Seallaidh sinn don riaghaltas gu bheil fiadh-bheatha na h-Alba feumach air dìon, chan e balbhachd," thuirt am brath naidheachd aca.

Chuir faisg air 23,000 duine gu ruige seo an ainm ri athchuinge ag iarraidh air Pàrlamaid na h-Alba ìmpidh a chur air ministearan gun an t-sealg a cheadachadh tuilleadh.