Drònaichean gan cleachdadh air loidhne-dealain ùr Leòdhais is na Hearadh
Tha cleachdadh nan drònaichean a' ciallachadh nach eil na h-uimhir de mhilleadh ga dhèanamh air a' mhointich
- Air fhoillseachadh
Dh'innis SSEN gu bheil drònaichean a' fàgail gu bheil obair-togail na loidhne-dealain ùr eadar na Hearadh is Leòdhas air a bhith nas luaithe agus nas fheàrr dhan àrainneachd.
Tha dùil aig a' chompanaidh chumhachd gur e seo a' chiad turas a chaidh an teicneòlas a chleachdadh san dòigh seo san Rìoghachd Aonaichte.
Tha a' chompanaidh Aureos, a fhuair an cùmhnant airson earrann den loidhne, air a bhith a' coimhead ri dòighean-obrach ùra a lorg airson pròiseactan ann an àrainnean dùbhlanach a lìbhrigheadh.
Tha drònaichean air a bhith a' giùlain nan càballan eadar na crainn ùra a' fàgail gu bheil an obair nas luaithe agus nach eil na h-uimhir de mhilleadh air talamh mòintich na cois.
Leis an deagh adhartas seo, tha dùil gun tèid dàrna leth den loidhne-dhealain 132kV, 58km de dh'fhaid, beò sna beagan mhìosan air thoiseach agus gum bi an obair buileach deiseil ro dheireadh na bliadhna.
- Tùs an deilbh, HELIGUY
1 de 3
Thuirt Anndra Ewing, Manaidsear Pròiseict le SSEN: "Leis an teicneòlas seo, tha obair a bha uair a' toirt làithean ga dèanamh ann am beagan uairean de thìde.
"'S urrainn dhuinn an loidhne ùr a thoirt seachad nas luaithe, gun na h-uimhir de charbadan agus luchd-obrach a bhith a' dol air cuid den talamh mhòintich as cugallaiche ann am Breatainn.
Tha e ag ràdh gu bheil an loidhne ùr a' dol "an àite bunstructair a th' air a bhith ann bho 1990".
"Neartachaidh seo an lìonra agus bheir e piseach air seasmhachd an dealain do dhachaighean agus gnothachasan air feadh nan Eilean Siar," thuirt e.
