"Tha sinn a' fàs sgìth" - muinntir Àird Ghobhar uair eile gun sheirbheis aiseig cheart

Tha gearanan aig daoine a tha a' fuireach an Àird Ghobhar gu bheil iad a' fulang leis nach eil seirbheis aiseig aca ach do luchd-coise a-mhàin.

Tha am MV Maid of Glencoul, am dàrna bàta air an t-slighe thar na Linne Duibhe aig a' Chorran, briste agus feumach air càradh.

Tha am prìomh bhàta, an MV Corran, mar-tha san doc.

Tha seo a' fàgail gum feum daoine ann an carbadan siubhal na mìltean mòra nas fhaide airson faighinn ann.

Tha e na bhriseadh-dùil don fheadhainn a bha an dòchas deagh chosnadh a dhèanamh bho àm na Nollaige agus na Bliadhna Ùire.

Nam measg tha Màiri Anna NicUalraig, a tha ag ràdh gun robh dùil aca gun tachradh seo.

"Tha luchd-turais agamsa ri tighinn bho mheadhan Shasainn a-nochd fhathast agus feumaidh iad cha mhòr 50 mìle a bharrachd a chur air a' chuairt aca airson ceann-uidhe a ruigheachd," mhìnich i.

Tha beachd ann nach eil am Maid of Glencoul, a tha còrr is 50 bliadhna de dh'aois, freagarrach airson na tha de thrafaig air an t-slighe ghoirid agus na dh'fheumas i de sheòlaidhean a dhèanamh gach là.

Thuirt Màiri Anna NicUalraig: "Tha sinn a' fàs sgith. Tha sinn ag iarraidh a' bhàta mhòr air ais, An Corran, a chaidh a thogail a dh'aona-ghnothaich."

Tha An Corran shìos aig deas agus càradh bhliadhnail ga dheanamh oirre.

"Tha i air a bhith air falbh fad mhìosan gun cheann-là cinnteach dhi tilleadh," thuirt Màiri Anna.

"Chan eil sinn a' faighinn seirbheis choileanta."

Tha Comhairle na Gàidhealtachd air gealltainn gun dèan iad obair air na cidheachan air gach ceann den chaolas airson na bàtaichean dealain a bhios air an t-slighe fhathast.

Ge-tà, tha dragh ann nach tòisich an obair sin gu an t-earrach agus nach deach na bàtaichean a choimiseanadh fhathast.

Thuirt Màiri Anna: "Faodaidh tu tilleadh thugam ann an 2029 agus tha mi glè chinnteach gur e an aon chòmhradh a bhios againn."

Dh'iarr Comhairle na Gaidhealtachd an leisgeul a ghabhail airson an t-suidheachaidh agus thuirt iad gu bheil iad a' cur cabhaig air càradh an MV Corran agus ris a' phròiseas airson laimrigean agus bata-aiseig ùr dhan Chorran.