दुकानातून चिकन घरी आणल्यावर ते नळाखाली धुणं धोकादायक?

चिकनचा कोणताही पदार्थ करण्यापूर्वी चिकन धुणे धोकादायक असतं का? संशोधकांनी याचं उत्तर होकारार्थी दिलेलं आहे.

चिकन न धुता शिजवणं धोकादायक असल्याचं आपल्याला वाटतं. पण खरंतर बाजारातून आणलेली चिकन वाहत्या नळाखाली धुण्यातही काही धोके असू शकतात.

चिकन दुकानातून आणल्यावर सर्वप्रथम ते स्वच्छ धुण्यात येतं. त्यानंतर त्यापासून आवडता पदार्थ तयार केला जातो. पण संशोधक इशारा देतात की, अशा प्रकारच्या स्वच्छतेमुळे फूडड पॉयझनिंग म्हणजेच अन्नातून विषबाधा होऊ शकते.

नळाखाली धुण्याचे धोके

ब्रिटिश फुड स्टँडर्ड एजन्सी (एफसीए) म्हणते की, मांस धुताना मांसावर असलेल्या जीवाणूंमुळे (बॅक्टेरिया) तुमच्या हाताला संसर्ग करू शकतो आणि ते पोटात जाऊ शकतात.

कच्च्या चिकनमध्ये सॅल्मोनेला आणि कॅम्पिलोबॅक्टर यांसारखे जीवाणू असू शकतात. चिकन नळाच्या पाण्याखाली धुताना त्यावर पाण्याची धार असल्यास ते जीवाणू स्वयंपाकांच्या भांड्यांवर, आपल्या अंगावरील कपड्यांवर आणि रुमालावर संक्रमित होऊ शकतात.

उदा. सिन्कच्या बाजूला सुरी असेल तर ज्या पाण्याने चिकन धुतले जात आहे ते पाणी सुरीवर पडेल आणि सुरीवर जीवाणू संक्रमित होतील. त्यानंतर त्याच सुरीने आपण आंबा किंवा सफरचंद कापतो आणि ते खातो. परिणामी, ते जीवाणू आपल्या पोटात जातात.

कॅम्पिलोबॅक्टर आरोग्याला अपायकारक असतात

अन्नातून होणाऱ्या विषबाधेसाठी कारणीभूत असणारा कॅम्पिलोबॅक्टर हा एक प्रमुख जीवाणू आहे. कच्च मांस, ताज्या भाज्या आणि शुद्ध न केलेल्या दुधातून हे जीवाणू संक्रमित होऊ शकतात.

कॅम्पिलोबॅक्टर जीवाणूचा संसर्ग झाल्यास आरोग्याला अपाय होतो. अतिसार, पोटदुखी, ताप आणि उलट्यांचा त्रास होऊ सकतो.

काही प्रकरणांमध्ये हा आजार काही दिवसांत बरा होतो. पण काहींच्या आरोग्यावर मात्र दीर्घकालीन परिणाम होतात.

इरिटेबल बॉवेल सिण्ड्रोम :कॉम्पिलोबॅक्टरमुळे इरिटेबल बॉवेल सिण्ड्रोम होतो. याचा संसर्ग झाल्यास ओटीपोटात वेदना होतात, पोट जड होते, गॅस धरतात, अतिसार होतो आणि बद्धकोष्ठता होते.

गॅम्बेअर सिण्ड्रोम : गॅम्बेअर सिण्ड्रोम हा कॅम्पिलोबॅक्टरमुळे होणारा अजून एक आजार आहे. क्वचित वेळा या आजारात आपली प्रतिकारक यंत्रणा आपल्या मज्जासंस्थेवर हल्ला करते.

कॅम्पिलोबॅक्टरमुळे मृत्यूसुद्धा होऊ शकतो. विशेषतः लहान मुलं किंवा वृद्ध व्यक्तींसाठी हा धोकादायक असू शकतो.

काय काळजी घ्यावी?

दुकानातून आणलेलं चिकन, न धुता सुयोग्य तापमानावर शिजवण्यात यावं. चिकनवरील रक्ताच्या डागांचा त्रास होत असेल तर पेपर टॉवेलने ते काढावे. त्यानंतर पेपर टॉपेल काळजीपूर्वक कचऱ्याच्या डब्यात टाकावे.

कच्च मांस फ्रिजमध्ये काळजीपूर्वक ठेवावं. हे मांस इतर पदार्थांमध्ये मिसळलं जाऊ नये याची काळजी घ्यावी.

चॉपिंग बोर्ड, सुरी आणि चिकनचे तुकडे करण्यासाठी वापरण्यात येणारी पातेली वा भांडी धुवून घ्यावी.

मांस धरलेले हात कपड्यांना किंवा अॅप्रनला पुसू नका. साबण आणि गरम पाण्याने हात नीट धुवावे. त्यानंतर जीवाणूंचा संसर्ग होणार नाही.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)