पुतिन चौथ्यांदा राष्ट्राध्यक्षपदाच्या लढतीत

रशियाचे राष्ट्राध्यक्ष व्लादिमीर पुतिन यांनी पुढील वर्षी होणाऱ्या निवडणुकांसाठी आपली उमेदवारी जाहीर केली आहे.

कार उत्पादक कामगारांच्या एका सभेत पुतिन यांनी ही घोषणा केली.

ते म्हणाले, "रशियाच्या राष्ट्राध्यक्षपदासाठी होणाऱ्या निवडणुकीसाठी मी उभा राहीन."

पुतिन 2000 सालापासून कधी राष्ट्राध्यक्ष तर कधी पंतप्रधान म्हणून रशियात सत्तारूढ आहेत.

पुढील वर्षी होणाऱ्या निवडणुकीत पुतिन जिंकले तर ते 2024 पर्यंत सत्तारूढ असतील.

रशियन टीव्ही पत्रकार सेनिया सोबचाक यांनीही आपण या निवडणुका लढवणार असल्याचं सांगितलं आहे. पण ओपिनियन पोल्स पुतिन सहज जिंकतील असं भाकित करत आहेत.

पैशाच्या अफरातफरीच्या प्रकरणात दोषी सिद्ध झाल्यानंतर रशियातले प्रमुख विरोधी पक्षनेते अॅलेक्सेई नवाल्नी यांना निवडणुक लढवण्यासाठी बंदी घालण्यात आली आहे.

नवाल्नी म्हणतात की, हे सगळं राजकीय हेतूने प्रेरित आहे.

बहुतांश रशियन नागरिक पुतिन यांना हीरो मानतात. सिरियातल्या यादवी युद्धात केलेल्या लष्करी हस्तक्षेपामुळे त्यांनी जगात रशियाची प्रतिमा उंचावली असं अनेक रशियन नागरिकांचं मत आहे.

युक्रेनपासून क्रिमीया प्रांत वेगळा करण्याचंही श्रेय लोक पुतिन यांना देतात.

पण पुतिन यांचे टीकाकार मात्र म्हणतात की, पुतिन भ्रष्टाचाराला खतपाणी घालत आहेत. क्रिमीयाच्या बेकायदेशीररित्या केलेल्या विभाजनामुळे रशियाला आंतरराष्ट्रीय टीकेला सामोरं जावं लागत आहे, असंही हे टीकाकार म्हणतात.

पुतिन यांचा प्रवास:गुप्तहेर ते राष्ट्राध्यक्ष

तुम्ही हे वाचलंत?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.)