नोरा फतेहीचा जॅकलिन फर्नांडिसविरुद्ध अब्रूनुकसानीचा दावा, 200 कोटींचं 'ते' प्रकरण काय आहे?

अभिनेत्री-डान्सर नोरा फतेही हिने अभिनेत्री जॅकलीन फर्नांडिसविरुद्ध अब्रूनुकसानीचा दावा केला आहे. सुकेश चंद्रशेखर फसवणूक प्रकरणातील जबाबात जॅकलीनने नोरा फतेही हिचं नाव घेतलं होतं. यावर आक्षेप घेत नोरा फतेहीने तिच्याविरुद्ध कोर्टात धाव घेतली आहे.

जॅकलीन फर्नांडिस ही कुहेतूने खोटा जबाब देत आहे, असा आरोप नोरा फतेहीने केला.

सुकेश चंद्रशेखरच्या प्रकरणात तपास संस्थांकडून नोरा फतेही आणि जॅकलीन फर्नांडिस या दोघांचीही चौकशी करण्यात आली होती. या पार्श्वभूमीवर नोरा फतेहीने केलेल्या आरोपांमुळे चित्रपट क्षेत्रात खळबळ माजली आहे.

जॅकलिन मिळाला होता अंतरिम जामीन

अभिनेत्री जॅकलीन फर्नांडिसला दिल्लीतल्या पटियाला हाऊस कोर्टानं 50 हजारांच्या जात मुचलक्यावर सप्टेंबर महिन्यात अंतरिम जामीन मंजूर केला आहे.

200 कोटी रुपयांच्या मनी लाँडरिंग प्रकरणात ईडीने सुकेश चंद्रशेखरविरोधात पुरवणी आरोपपत्र दाखल केलं होतं. या आरोपपत्रामध्ये अभिनेत्री जॅकलिन फर्नांडिसचं पण नाव आहे.

सुकेशने आजवर अनेकांना गंडा घातल्याचं समोर आलं होतं. ईडीनं काही महिन्यांपूर्वी कारवाई केल्यानंतर सुकेश चंद्रशेखरचे अनेक बॉलिवूड सेलिब्रिटीजबरोबर संबंध असल्याचं समोर आलं होतं. प्रामुख्यानं जॅकलिन फर्नांडिसचं नाव यात समोर आलं.

या प्रकरणी ईडीने जॅकलिनची अनेक तास चौकशीही केली होती. 26 सप्टेंबर 2022 रोजी पुन्हा जॅकलिन दिल्लीतल्या पटियाला हाऊस न्यायालयात हजर झाली.

जॅकलिन एनआयए न्यायाधीश शैलेंद्र मलिक यांच्या न्यायालयासमोरही हजर होईल. कारण सुकेश चंद्रशेखर मनी लॉन्ड्रिंग प्रकरणात पूरक चार्जशीटही दाखल करण्यात आली आहे.

अतिरिक्त सत्र न्यायालय शैलेंद्र मलिक यांनी जॅकलिनच्या जामीन याचिकेवर ईडीकडून उत्तर मागितलं आहे.

दरम्यान, या प्रकरणी जेव्हा जॅकलीनचं नाव पहिल्यांदा समोर आलं होतं, तेव्हा तिने एक निवेदन प्रसिद्ध करून माझ्या खाजगीपणाचा भंग होईल असे फोटो प्रसिद्ध करू नका असं आवाहन केलं होतं.

200 कोटींचे नेमके प्रकरण काय?

सुकेश चंद्रशेखर यांच्यावर सध्या सुरू असलेली कारवाई ही 200 कोटी रुपयांच्या मनी लाँडरिंग प्रकरणी होत आहे. उद्योगपती शिविंदर सिंग यांच्या पत्नी आदिती यांच्याकडून 200 कोटी उकळल्याचा आरोप सुकेश यांच्यावर आहे.

आदिती सिंग यांनी दिलेल्या तक्रारीनंतर याप्रकरणी कारवाई करण्यात आली होती. रेनबॅक्सी उद्योग समूहाचे प्रमोटर शिविंदर सिंग हे एका प्रकरणात तुरुंगात कैद असल्यानं त्यांना सोडवण्यासाठी म्हणून सुकेश यांनी वसुली केल्याचं सांगण्यात आलं.

पीएमओ आणि गृहमंत्रालयातील अधिकारी असल्याचं सांगत फोनद्वारे फसवणूक करून सुकेश चंद्रशेखर यांनी आदिती यांना फसवलं होतं. विशेष म्हणजे तुरुंगातून तंत्रज्ञानाचा वापर करून सुकेश हा सर्व प्रकार करत असल्याचा आरोप त्यांच्यावर आहे.

कारवाई करण्याची भीती दाखवत सुकेश यांनी वसुली केल्याचाही आरोप आहे. या संपूर्ण प्रकरणाचा तपास सध्या ईडी करत असून या तपासादरम्यान काही सेलिब्रिटींची नावं समोर आली आहेत.

जॅकलिन आणि सुकेश यांचे काही फोटोदेखील व्हायरल झाले होते. त्यानंतर ईडीनं जॅकलिन फर्नांडिसला चौकशीसाठीही बोलावलं होतं. त्यावेळी जॅकलिननं तिला सुकेशनं काही गिफ्ट दिल्याची माहिती ईडीला दिली होती

एएनआयच्या वृत्तानुसार या गिफ्टमध्ये गुचीच्या तीन बॅग, जिमवेअर आऊटफिट, लुईस विटनचे लक्झरी शूज, दोन जोडी डायमंड रिंग्ज, ब्रासलेट्स यांचा समावेश असल्याचं ईडीनं चार्जशीटमध्ये म्हटलं होतं.

तसंच तिला एक कारही दिली होती, ती तिनं परत केल्याचं ईडीला सांगितलं होतं. तसंच ईडीच्या आरोपपत्रानुसार सुकेश चंद्रशेखरनं अभिनेत्री नोरा फतेही हिला एक बीएमडबल्यू कार गिफ्ट केल्याचं सांगण्यात आलं.

कोण आहे सुकेश चंद्रशेखर?

बेंगळुरूच्या भवानीनगरमध्ये राहणारा चंद्रशेखर हा एका मध्यमवर्गीय कुटुंबामध्ये जन्माला आला होता. 12 वीनंतर तो शाळेतून ड्रॉपआऊट झाला. त्यानंतर त्याने रियल इस्टेटमध्ये काम करायला सुरुवात केली.

दरम्यान, सुकेशच्या वतीनं जाहीर करण्यात आलेल्या निवेदनामध्ये त्याने आपण ठग नसल्याचा दावा केला होता. त्याच्यावर लावण्यात आलेले इतरही आरोप त्याने फेटाळले होते.

अल्पवयीन असतानाच त्याने कार रेस आयोजित करायला सुरुवात केली होती. तेव्हापासूनच तो वरीष्ठ पोलीस अधिकारी असल्याचं सांगत अनेकांची फसवणूक करत होता, असा त्याच्यावर आरोप आहे.

2007 मध्ये बेंगळुरूमध्ये जवळपास 100 लोकांना बंगलोर विकास प्राधिकारणाचं काम करून देतो, असं सांगत फसवल्याप्रकरणी त्यांना सर्वप्रथम अटक झाली होती.

2017 मध्ये एका गंभीर प्रकरणामध्ये सुकेश चंद्रशेखरला अटक करण्यात आली होती. त्यावेळी सुकेशनं निवडणूक आयोगामध्ये संपर्क असल्याचा दावा करत एका राजकीय पक्षाची फसवणूक केली होती.

दक्षिणेतील AIADMK या पक्षाच्या शशिकला गटाला निवडणूक आयोगाकडून दोन पानं असलेलं निवडणूक चिन्हं मिळवून देण्याचा दावा सुकेश यांनी केला होता.

एका हॉटेलमधून याबाबतची डील करत असल्याचा आरोप त्यावेळी करण्यात आला होता. तसंच एका हॉटेलमध्ये त्यांच्या खोलीतून एक कोटींपेक्षा अधिक रक्कमही जप्त करण्यात आली होती, असं नवभारत टाईम्सनं म्हटलं आहे.

एवढंच नव्हे तर सुकेश यांनी अनेक नेत्यांचे नातेवाईक असल्याचा बनाव करत अनेकांना गंडा घातल्याचेही आरोप त्यांच्यावर झाले आहेत.

सुकेश हे लोकांना मोठ्या नेत्यांची नाव सांगून फसवायचे. काही जणांना त्यांनी एम. करुणानिधी यांचे आपण नातू असल्याचंही सांगितलं होतं, असं समोर आलं आहे.

सरकारी अधिकारी, अमित शहांच्या कार्यालयातील कर्मचारी आणि अगदी जयललितांच्या राजकीय कुटुंबातील असल्याचा दावा करताना त्याने खोटे फोन नंबर वापरून हे खरं असल्याचं दर्शवण्याचा प्रयत्न केला.

स्पुफिंग अॅपच्या मदतीनं सुकेश यांनी हे केल्याचं सांगण्यात आलं आहे. जॅकलिनला त्यानं केलेल्या कॉलचा नंबर हा अमित शहांच्या ऑफिसचा दर्शवला होता. सुकेश हे सर्व या अॅपच्या माध्यमातून करत होते.

200 कोटी रुपयांच्या वसुली प्रकरणात त्यांनी तुरुंगातूनच सर्वकाही केल्याचा आणि त्यासाठी तुरुंगातील कर्मचाऱ्यांना लाच दिल्याचाही आरोप आहे.

कोण आहे जॅकलिन फर्नांडिझ?

बहरीनमध्ये जन्म, ऑस्ट्रेलियात माध्यमशिक्षण, नागरिकत्व श्रीलंकेचं आणि भारतीय चित्रपटांमध्ये काम असा जॅकलिन फर्नांडिझचा प्रवास आहे. तिचे वडील श्रीलंकेचे आहेत, तर आई मलेशियाची आहे. 2006मध्ये जॅकिन मिस युनिव्हर्स स्पर्धेत सहभागी झाली होती.

'अलादिन' या चित्रपटाद्वारे जॅकलिनने हिंदी चित्रपटात पदार्पण केलं. 'मर्डर 2' हा चित्रपट बॉक्स ऑफिसवर यशस्वी ठरला. यानंतर तिने हाऊसफुल 2, रेस 2 तसंच हाऊसफुल 3, जुडवा 2 या चित्रपटांमध्ये काम केलं.

'झलक दिखला जा' या डान्स रिअॅलटी शोमध्ये जॅकलिन परीक्षकाच्या भूमिकेत दिसली होती.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)