पोटनिवडणूक निकाल : उद्धव म्हणतात 'स्वबळावर' तर फडणवीस म्हणतात 'सेनेसह लढू'

सोमवारी पार पडलेल्या पालघर आणि भंडारा-गोंदिया लोकसभा पोटनिवडणुकांचे निकाल आता लागले आहेत.

पालघरमध्ये सत्ताधारी भाजप आणि शिवसेनेमध्ये लढत होती, तर भंडाऱ्यात राष्ट्रवादी आणि भाजप एकमेकांसमोर ठाकले होते. पालघरमध्ये भाजपचा विजय झाला आहे.

महाराष्ट्रातल्या पालघर आणि भंडारा-गोंदिया लोकसभा पोटनिवडणुकाचे निकाल लागले आहेत. त्या पार्श्वभूमीवर शिवसेना पक्षप्रमुख उध्दव ठाकरे यांची पत्रकार परिषद होत आहे.

शिवाय, उत्तर प्रदेशच्या कैराना आणि नागालँडमध्ये लोकसभेच्या जागांसाठी लढत होत असून, देशभरातल्या इतर 10 विधानसभा मतदारसंघांतील पोटनिवडणुकांचाही निकाल आज लागले आहेत.

उत्तर प्रदेशच्या कैराना मतदारसंघात भाजपच्या उमेदवार पिछाडीवर असून राष्ट्रीय लोकदलाच्या उमेदवार आघाडीवर आहेत.

मतदान यंत्रामध्ये बिघाड झाल्याने काही ठिकाणी बुधवारी फेरमतदान घेण्यात आलं होतं. तेही निकाल आज लागणार आहेत.

भाजपचे खासदार चिंतामण वनगा यांच्या निधनामुळे पालघरची जागा रिकामी झाली होती, तर भाजपला सोडचिठ्ठी देत नाना पटोले यांनी खासदारकीचा राजीनामा दिल्यामुळे भंडारा-गोंदिया लोकसभा मतदारसंघात पोटनिवडणुका झाल्या.

दिवसभर अशाप्रकारे झाल्या घडामोडी

सायंकाळी 6.40 - 'EVM बिघाडाचा सगळ्यात मोठा फटका भाजपला'

EVM बिघाडाचा सगळ्यात मोठा फटका भाजपाला बसला अशी तक्रार पत्रकार परिषदेत मुख्यमंत्री देवेंद्र फडणवीस यांनी केली आहे.

मुख्यमंत्री म्हणाले -

सायंकाळी 5.05 - उद्धव ठाकरे यांची भाजपवर चौफेर टीका

उद्धव ठाकरे यांची पत्रकार परिषद शिवसेनाभवनात झाली.

त्यात, भाजपला आता मित्रांची गरज नाही. शिवरायांचा अपमान योगींनी केला. त्याबद्दल भाजपनं खुलासा केलेला नाही, असं ठाकरे म्हणाले.

निवडणूक आयोगाच्या भू्मिकेबद्दल ठाकरे यांनी प्रश्न उपस्थित केले आहेत.

हा मी पराभव मानत नाही, असंही ठाकरे म्हणाले.

उद्धव ठाकरे यांची पत्रकार परिषद लाइव्ह येथे पाहता येईल.

दुपारी 4.40 - समविचारी पक्षांना कौल मिळाला - अजित पवार

"भंडारा-गोंदियामध्ये आघाडीसाठी सगळं जुळून आलं. नाना पटोले स्वत: उमेदवार असल्यासारखे लढले. समविचारी पक्षांनी मतविभागणी होणार नाही हे पाहिलं पाहिजे. पालघरमध्ये मात्र काँग्रेसचे कार्यकर्ते असलेले राजेंद्र गावित हे अगदी कालपर्यंत पक्षात होते. त्यांना भाजपमध्ये घेऊन उमेदवारी देण्यात आली. आघाडीचा उमेदवार पहिल्यापासून मागे पडला होता. " असं अजित पवार यांनी पत्रकार परिषदेत सांगितलं.

दुपारी 4.10 - उध्दव ठाकरे यांची पत्रकार परिषद

पालघरच्या निकालाच्या पार्श्वभूमीवर शिवसेनेचे पक्षप्रमुख उध्दव ठाकरे हे पत्रकार परिषद घेणार आहेत. त्यात ते काय बोलतात याकडे सगळ्यांचं लक्ष लागलेलं आहे.

दुपारी 4.00 - 'पुढे जाण्यासाठी दोन पावलं मागे यावं लागतं'

पोटनिवडणुकीत झालेल्या पराभवावर प्रतिक्रिया देताना गृहमंत्री राजनाथ सिंह म्हणाले, "मोठी झेप घेण्यासाठी दोन पावलं मागे यावं लागतं. आम्ही भविष्यात मोठी झेप घेऊ."

दुपारी 3.00 - पालघरमध्ये भाजप विजयी

भाजपचे उमेदवार राजेंद्र गावित यांना पालघर मतदार संघात विजय मिळवला आहे.

दुपारी 1.00 - पालघरमध्ये EVM मशीनमध्ये दोष असल्याची सेनेची टीका

#पालघर पोटनिवडणुकीत मतदार याद्यांचे घोळ होते. 50 ते 60 हजार मतदारांची नावं यादीतून गायब होती. मतदान संपल्यानंतर 12 तासांच्या आत निवडणूक आयोगानं मतदानाची टक्केवारी बदलली. हे सगळं शंकास्पद आहे, असा आरोप शिवसेनेचे खासदार संजय राऊत यांनी केला आहे.

दुपारी 12.40 - पालघरमध्ये कौल स्पष्ट

#पालघर लोकसभा पोटनिवडणुकीच्या मतमोजणीत 16 व्या फेरीअखेर भाजपच्या राजेंद्र गावित यांनी स्पष्ट आघाडी घेतली आहे. 22000 मतांची ही आघाडी आहे.

सकाळी 11.45 - केरळच्या जागेवर CPIMची मुसंडी

#केरळच्या चेंगान्नूर मतदारसंघातल्या पोटनिवडणूक निकालाचा कल स्पष्ट होऊ लागला आहे. मतमोजणीच्या पहिल्या काही फेऱ्यांमध्ये CPIMने 14229 मतांनी आघाडी घेतली आहे.

सकाळी 11.40 - कर्नाटकातील एका जागेवर काँग्रेस आघाडीवर

#कर्नाटकातल्या राजराजेश्वरी नगर मतदारसंघात झालेल्या पोटनिवडणुकीत काँग्रेसच्या उमेदवारानं 46218 मतांची आघाडी घेतली आहे.

सकाळी 11.35 - पालघरमध्ये भाजपच्या गावितांना 17 हजारांची आघाडी

#पालघर : मतमोजणीच्या नवव्या फेरीनंतर भाजपचे राजेंद्र गावित यांनी 17843 मतांची आघाडी घेतली आहे. शिवसेनेचे श्रीनिवास वनगा पिछाडीवर आहेत.

सकाळी 11.15 - कैरानामध्ये भाजप पिछाडीवर, रालोदला मोठी आघाडी

#कैराना : लोकसभा पोटनिवडणुकांमध्ये महाराष्ट्राबाहेर कैराना मतदारसंघाकडे साऱ्या देशाचं लक्ष होतं. इथे राष्ट्रीय लोक दलाच्या उमेदवार तबस्सूम हसन भाजपच्या उमेदवार मृगांका सिंग यांच्यापेक्षा 16 हजार मतांनी आघाडीवर आहेत.

सकाळी 11.00 चौथ्या फेरीनंतर भंडारा- गोंदियात राष्ट्रवादी आघाडीवर

#भंडारा गोंदिया लोकसभा मतदारसंघाच्या पोटनिवडणुकीनंतरची मतमोजणी सुरू झाल्यापासून राष्ट्रवादी काँग्रेस अल्पशा का होईना आघाडीवर आहे. मतमोजणीच्या चौथ्या फेरीनंतर ही आघाडी 3959 मतांची आहे. दुसऱ्या क्रमांकावर भाजप आहे.

सकाळी 10.15 भंडारा गोंदियात राष्ट्रवादी आघाडीवर, भाजप दुसऱ्या स्थानावर

#भंडारा- गोंदिया मतदारसंघात राष्ट्रवादी काँग्रेस सध्या 3100 मतांनी आघाडीवर आहे. भाजप दुसऱ्या स्थानावर आहे.

सकाळी 10.00 : पालघरमध्ये भाजप आघाडीवर

#पालघर - पहिल्या काही फेऱ्यांचे निकाल बाहेर आले असून त्यानुसार पालघर मतदारसंघात भाजपचे उमेदवार राजेंद्र गावित आघाडीवर आहेत. शिवसेनेच्या वनगा यांच्यापेक्षा 10,000 मतांनी गावित आघाडीवर आहेत.

सकाळी 8.40 : देशभरात निकालांबद्दल उत्सुकता

कर्नाटक, पश्चिम बंगाल, पंजाबमध्येही महत्त्वाच्या पोटनिवडणुकांचे निकाल आज अपेक्षित.

सकाळी 8.32 : भंडारा गोंदियात मतमोजणी

भंडारा गोंदियात मतमोजणीला सुरू झाली आहे.

सकाळी 8.26 : पालघरमध्ये मतमोजणी

पालघरमध्ये मतमोजणीला सुरू झाली आहे.

सकाळी 8 : मतमोजणीला सुरुवात

देशभरातल्या चार लोकसभा आणि 10 विधानसभा पोटनिवडणुकींचे निकाल आज लागणार. मतमोजणीला सुरुवात

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.)