Ụlọikpe Mkpegharị agwala Nnamdi Kanu lawa, na ikpe amaghị ya

Ụlọikpe Mkpegharị nọ n'Abuja enyela ntuziaka ka a tọhapụ Nnamdi Kanu si na ikpe amaghị ya n'ụbọchị Tọzde, abalị 13, nke ọnwa Oktoba.

A kachapụla ebubo 15 niile goomenti Naijiria boro Nnamdi Kanu

Ụlọikpe mkpegharị nke Abuja akụchapụla ebubo ndị fọrọ n’ebubo ndị gọọmentị Naịjirịa nwere n’isi Nnamdi Kanu bụ onyendu otu the Indigenous People of Biafra (Ipob)

N’ikpe a ekpere n’ụbọchị Tọọzde bụ ụbọchị 13 nke ọnwa Ọktoba, 2023 nke ọkaikpe Jummia Hannatu Sankeey nọ n'isi ya, ya ndị ọkaikpe abụọ ọzọ kwuru na nwụchị Nnamdi Kanu na mba Kenya na mkpọghachịte ya na Naịjirịa megidere iwu.

Ndị ọkaikpe ahụ nyere iwu ka a tọhapụ Kanu dịka ha kwusiriike na nwuchi ya megidere iwu.

Cheta na gọọmentị Naịjirịa nwụchiri Kanu n’afọ 2021 na mba Kenya ma bọkwasị ya ebubo 15 nke gụnyere ebubo ịkpa nkata ikposa ọchịchị Naịjirịa.

N’ụbọchị 8 nke ọnwa Eprel, 2022 ọkaịkpe kụchapụrụ ikpe asatọ n’ime 15 ahụ mana Kanu si n’aka ndị ọkaiwu ya nke onyeisi ha bụ Mike Ozekhome mere mkpea banyere ebubo ndị a nke akara ya bụ CA/ABJ/CR/625/2022, ma na-arịọ ka akụchapụ ebubo asaa fọrọ dịka ha achịtaghị aja.

Dịka ha mechara mkpesa a n’ọnwa Sepụtemba, e bubatara ikpe ahụ gaa taa bụ ụbọchị 13 Ọktoba bụ ụbọchị ụlọịkpe kwupụtara ma nye iwu ka a tọhapụ Nnamdi Kanu n’ihi na usoro nwụchi ya ezịghị ezi ma daa iwu.

Ụlọikpe ahụ kwuru na ebubo 15 ndị ahụ ekwupụtaghị ebe, ụbọchị, oge nakwa ụdịrị mmehie a sị Kanu mere tupu a nwụchịe ya n’ụzọ dara iwu ma kọghachịte Naịjirịa.

Ha gara n’ihu kwuo na gọọmentị Naịjirịa ekweghị kwupụta ebe a nwụchịrị Nnamdi Kanu agbanyeghị ụdịrị ebubo ndị ha boro ya ma kwuo na mkpọghachịte ya n’ụdịrị ‘ntọrọ’ megidere ikike dịrị ya.

Ha kwukwara na etu na usoro e ji nwụchi ma kpọghachite Kanu esoghi n’ihe ụlọikpe ukwu tinyere anya tupu amalite ikpe ya ikpe ebe ahụ nke na-ezịghị ezi dịka ha si kwuo.

Ndị ọkaikpe ahụ kwukwara na ụlọikpe ukwu ahụ etinyeghị anya n’okwu na inweta nakwa mgbado ụkwọ n’ikike nnwụchi Kanu gara adị ire naanị n’ala Naịjirịa ma kwuo na nke a mere na ikpe ahụ na-aga n’ihu n’ụlọịkpe ukwu nke Abuja kwesịrị ịkwụsịtugodi.

Cheta na Ozekohome kwuru na mkpesa ha gbadoro ụkwụ na akụkụ akara 15 nke iwu banyere nwụchị bụ ‘Extradition Act’ na gọọmentị etiti kwesịrị ikpechapụ Kanu ikpe nke nwere ebubo ise ha nwere n’isi ya tupu ọ gbapụ Naịjirịa.

Ọkaiwu gọọmentị Naịjirịa bụ David Kaswe kwuru n’ọnwa Sepụtemba na mkpesa ndị ahụ achịtaghị aja.

N'ikpe a, ọkaikpe mbụ na nke abụọ kwuru okwu kọwara na nke a pụtara na aga akwụsịgodị ikpe Kanu na-aga n'ihu n'ụlọikpe ukwu nke Abuja bụ ebe gọọmentị etiti Naịjirịa bugara ya bụ ikpe n'ihi usoro nwuchi ya ahụ dara iwu.

Ha kwuru na ikike ụlọikpe ukwu ahụ n'ịkpe ikpe a achịtaghịzị aja ma ncha.

Etu ndị mmadụ si anabata ozi mpụtara ikpe a

Ọnụ na-ekwuru otu Ohanaeze ndigbo bụ Alex Ogbonnia gwara BBC Igbo na mkpebi a ụlọikpe mkpeghari mere akpatala ọtụtụ ọṅụ n’ama dịka o ji anya ya hụ ka ndị mmadụ na-enwe aṅụrị n’ụzọ kemgbe ozi mpụtara ikpe a gbara n’ọha.

Ọ gwara BBC Igbo “Ndị mmadụ na-enwe aṅụrị n’ihi ọgụ Kanu na-alụ abụghị ọgụ nke onwe ya mana ọ bụ nke mmadụ niile ọkachasị ndị ọbụla Naịjirịa na-akpagbu.”

Ọ gara n’ihu kwuo “Obi dị m mma maka etu ụlọikpe a siri were ịkwụwa aka ọtọ kpee ikpe a ghara ile ihu onye ọbụla anya”

Ogbonnia kwuru na ọṅụ juru ya obi n’ihi mpụtara ikpe a nwereike ịmetụta ntuliaka nke 2023 n’ụzọ dịka nnwụchi na ndobe Kanu n’ụlọ nga so n’ihe na-eche ndị mmadụ kemgbe banyere ntuliaka 2023.

Dịka ozi mpụtara ikpe a na-efesa, akụkọ aṅụrị nakwa ọṅụ na-adapụta ọkachasị n’akụkụ Ọwụwa Anyanwụ Naịjirịa.

Onye ntaakụkọ BBC Igbo n’Umuahia gbara ama nke dịka o kwuru na ụda mkpọn’ala Bekee bụ 'Fireworks' na-akpọtụ n’akụkụ Afaraukwu bụ obodo Kanu dị n'Umuahia nakwa n’akụkụ Umuahia ndị ọzọ.

N’ogige ụlọikpe mkpegharị nke Abuja ahụ, ọtụtụ ndị nkwado Kanu pụtakwara n’igwe na-enwe anụrị ma na-agụ egwu ọnụ maka etu ya bụ ikpe siri gaa agbanyeghị na ekpechara ya bụ ikpe nke malitere n’elekere atọ nke ehihe n’ebe ime mgbede.

Ụfọdụ ihe ndị dị mkpa n'ikpe mkpegharị a e kpere n'ọnwa Sepụtemba

Obere ntọala banyere ikpe a