Myth Buster: Ọ bụ eziokwu na e nwere ihe dịka "ịgha mmadụ pin"?

9 Mee 2022

N'ọdị nso a ka onye na-eme ejije Nollywood a ma ama bụ Chiwetalu Agu pụtara kwuo na ndị iro ya chọrọ iji ọgwụ gbuo ya.

O kwuru na onye amụma si n'ime ahụ ya wepụta ọtụtụ kịrịkịrị ntụtụ, okwute, ego ayoro, na ọtụtụ ihe ndị ọzọ, bụ nke o kwuru na ndị iro ya tinyere n'ahụ ya.

Chiwetalu kwuru na ọ bụ n'akụkụ ahụ ya dị icheiche - obi ya, ubu ya, afọ ya - ka onye amụma ahụ si wepụta ihe ndị a.

Nke a mere ka nrụrịtaụka malite na soshal midia, dịka ọtụtụ na-ajụ ma ọ bụ eziokwu na ụdị ihe dị otu a nwere ike ime.

Dịka Chiwetalu si kwuo "ndị iro m niile mere m ihe a, kamgbe ewepụtachara ihe ndị a n'ahụ m, onyeisi ha anwụọla, ndị ọzọ nọzị ọdị ndụ ọnwụ ka mma."

Mana ọ bụ eziokwu na e nwere ihe dịka ịgha mmadụ pin?

Ihe dibia ọdịnala kwuru maka nke a

Otu dibia ọdịnala aha ya bụ Duruagwu Ukaejuoha gwara BBC Igbo na ọ bụ eziokwu na e nwere ike iji ọgwụ tinye mmadụ ihe dị icheiche n'ime ahụ ya.

"Ọ bụ ajọ ọgwu, a na-agwọ ya agwọ. Ihe e ji agwọ ya bụ ede rere ere," Duruagwu kwuru.

Skip Akachasị Gụọ and continue reading

Akachasị Gụọ

End of Akachasị Gụọ

Mgbe BBC jụrụ Duruagwu etu o si bụrụ ihe kwere omume na a ga-eji ọgwụ tinye ntụtụ na ihe ndị ozọ n'ahụ mmadụ, o kwuru na "ọbụghị ihe niile ka anya na-ahụ".

Duruagwu kwukwara na ọbụghị dibia niile nwere ike iwepụta 'pin' a ghanyere n'ime ahụ mmadụ.

"Ị ma na e kere ọrụ eke, mụ onwe m nwere ọrịa ndị m na-agwọ, anaghị m agwọ onye a ghara 'pin' mana a ma m ndị dibịa nwere ike ịgwọ ya."

Ihe dibia bekee kwuru gbasara ịgha 'pin'

N'aka nke ọzọ dibia bekee aha ya bụ Mcginger Ibeneme kwuru na enweghị ihe dịka ịgha mmadụ pin.

Dkt Ibeneme bụ ọkachamara n'ihe gbasara ọrịa na-efe efe; ọ bụkwa onye kwenyere n'okpukperechi omenala Igbo.

O kwuru sị: "Ọ bụ eziokwu na m kwenyere n'omenala, ekwenyere m na ịgwọ ọgwụ dị, mana enweghị ihe dịka ịgha mmadụ 'pin'."

"Nke mbụ bụ na a bịa na mmụta ọgwụ oyibo, o kweghị omume na mmadụ ga-etinye ihe dịka ntụtụ n'ime ahụ mmadụ, na-emerụghị onye ahụ ahụ."

"Ihe a ndị mmadụ na-akpọ ịgha 'pin' bụ magomago ndị dibịa na-eme iji rie ndị mmadụ ego."

"Ụfọdụ na-arịa ọrịa, ha agaa ụlọọgwụ ma ha enwetaghị ọgwụgwọ, ha agakwuru ndị dibịa adigboroja ndị ga-asị ha na a ghara ha pin."

"Dibia ahụ ga-akpụrụ ntụtụ kpụjuo ọnụ ya, ọ bịa mezie ka ọ bụ n'ahụ onye ọrịa ahụ ka o si ewepụta ntụtụ ndị ahụ."

Dkt Ibeneme kwuru na onye ọbụla na-arịa ọrịa na-achọ ihe ọ ga-eme ka o nweta ọgwụgwọ, ọ bụ nke a na-eme ka ha kweta ihe ọbụla ndị dibịa adịgboroja a na-ekwu, mana n'ezie, onweghị ihe dịka ịgha mmadụ 'pin'.