'Unknown Gunmen' egbuola otu 'inspector' na mwakpo isi ụlọọrụ ndị uweojii n'Umuahia
Ndị omekome nwara ịwakpo ọdọ ndị uweojii a na-akpọ 28 Mobile Force n'Umuahia egbuola otu onye uweojii n'ụtụtụ Mọnde.
Atụmatụ ndị omekome ịbanye n'ime ọdọ ndị uweojii ahụ gbara ọnyụpa dịka ndị uweojii chụpụrụ ha.
Ọnụ na-ekwuru ndị uweojii n'Abịa steeti bụ Geoffrey Ogbonna, gwara onye ntaakụkọ BBC na ọ bụ n'isi ụtụtụ, dịka ọ na-akụ elekere otu, ka ndị a bịara njem a.
Ogbonna sị; "Ndị a ji n'abalị bịa mana ndị uweojii dị njikere mere ha jiri chụlaa ha."
Onye ntaakụkọ BBC gbara mbọ ịbanye n'ebe ahụ e mere mwakpo ahụ mana ndị uweojii gbachichara ebe ahụ nke mere na ọ hụghị ohere ọ ga-eji banye.
Mana, ndị uweojii kwuru na ọ bụ ụgbọala bekee na-akpọ "gun truck" ka ndị omekome a ji bịa, ma kwukwaa na ọ bụ uwe ndị agha ka ha yi n'oge ha na-eme mwakpo a.Ndị uweojii Abịa steeti sị ka ndị mmadụ gbaara ha ama maka ndị a ha sị na ụfọdụ n'ime ha bu mgbọ egbe ndị uweojii gbara ha gbalaga.
Ebe a ndị omekome a wakporo dị nso n'isi ulọọrụ ndị uweojii n'Umuahia nke Bekee kpọrọ Command Headquarters.
Abịa Steeti dị n'Ọwụwa Anyanwụ Naịjirịa bụ ebe ndị omekome amabeghi ndị ha bụ na-awakpo, na-egbu ndị uweojii ma na-agba ụfọdụ ụlọọrụ gọọmentị ọkụ kemgbe Ọktoba nke afọ 2020.
